Hmangaihna Nen Ni 40
- Rick Warren
- Oct 08, 2023
Mi ṭhenkhatte chuan anmahni duh dan ang chauha thil tih an duh ṭhin. Thil tih dan dik leh dik lo an nei hran a, i tih dan apiang kha an tan chuan tih dan dik lo a ni ṭhin. An duh ang i tlin loh chuan i hriat turin an sawi lang ṭhin ang. An lungawina khawp thil i ti ngai dawn lo niin a lang ṭhin.
Anih chuan chutiang mi, phut nei rengte chu engtinnge hmangaihna nen i chhan ang?
Bible chuan kan thil thlir dan aṭangin dawhtheihna a lo chhuak ṭhin a ti: "A ngaihruat thiamnain mi â thin a tihnelsak ṭhin a, Bawhchhiatna haider chu a ropuina a ni" (Thufingte 9:11). Mi, a chawr chhuahna te, a harsatna hmachhawnte leh a phurritte i hriatthiampui chuan an chungah dawhtheihna nasa tak i nei ang.
Mi kan hmuhin, "Hemi hian zinkawng zawh tur a la neih thui zia hi" tih rilru kan pu fo ṭhin. "Hei chen a thleng thei hi a mak ka ti hle mai" tiin kan sawi ngai miah lo thung!
Zawldawhna leh inzah derna awm lohna chhungkuaa sei lian an ni thei. Chhungkaw khawsak rel mumal miah lohna aṭanga chawr chhuak an ni thei, chuvang chuan hei chen an thleng thei hi thil mak a ni hial thei.
Eng phurrit nge an phurh? An dam lo a ni thei. Chhungkuaah harsatna an nei a ni thei. An hna an hloh a ni thei bawk. Nang leh keiin kan hriat hauh loh hian miten phurrit leh harsatna nasa tak an phur a ni thei.
Thufingte 19:11-ah chuan kan bawhchhiatna haider turin min ti. I haider nge i bawhchhiatnate chuan a bawhbet che? Tu emawin a en ringawt che emaw, thil a hrilh theihnghilh che emaw, a hmuh loh vang che emawin i lungni lo ṭhin em? Hmangaihna chuan a en liam ṭhin.
Bible chuan, "Miin i chunga an tiha i duh tur ang bawkin mi chungah pawh ti ve rawh" tiin min hrilh (Luka 6:31). Hmangaihna chuan phut a nei lova a hrethiam zawk ṭhin- chutiang chiah chuan i nawmsam loh emaw phurrit tak i phurh laiin emaw i chungah miten ti ṭhin se i duh ang.
Chuvang chuan i chungah mi an duh duhin i awmtir dawn tihna a ni em? An duhna apiangah an hruai dawn che tihna a ni em? An duh duh an sawi theihna turin engmah lo ang maiin i awm dawn em?
Ni lo e. Hei hi a awmzia chu a ni: tlawm si lovin inphah hnuai thiam rawh. Isua khan thil sawisel rengtu Pharisaite leh sakhaw hruaitute nun kha a zawm hauh lo. Anmahni pawhin an zawm theih loh dante kha miten zawm se an duh a ni. Mahse Isuan thil phut nei rengte kha a innawrtir miah lo.
Tlawm (hmelma hnena inpe ang kha) si lovin a inphah hniam. Chu chu hmangaihna a taka lantir kan tih chu a ni.
Ngaihtuah zui atan.
Mi thil phut nei reng mai nitin deuh thawa i tawn ṭhin kha han ngaihtuah la. Kha mi khan engnge a sual mek ni a i rin? I hriat chian loh chuan han zawt chhin teh. An harsatna sual mek chungchang ngaihtuahpui a i zawh khan engtinnge i thil thlir dan, rilru put hmang leh i chhan danah nghawng a neih?
Thufingte 19:11-a kan hmuh ang hian engvangin nge bawhchhiatna haider chu a harsat viau ni a i hriat? Engvangin nge thu hnuhnung kan neih a ṭul ṭhin?
Mite laka tlawm ni si lova inphah hniam turin engtinnge an harsatna i chhan dan i thlak ang?
[Lettu: Mapuia Fanai]

No comments:
Post a Comment