Hmangaihna Nen Ni 40
- Rick Warren
- Oct 09, 2023
Eng kawngah emaw tal i kiang vela mite khan i lungawi lohna an thlen ngei ngei dawn. Engvangin? Tumah famkim kan awm loh avangin!
Chutiang anih chuan engtinnge mi lungawi lote kan enkawl ang? Miten min tih lungawi loh laiin engtinnge hmangaihnain a chhan?
Galatia 6:1-ah chuan heti hian min hrilh, "Unaute u, in zinga mi tu emawin thil a lo tisual a nih chuan nangni thlarau mite hi a hnenah kalin a tihdik leh theih nan pui rawh u. Mahse fimkhur ula, nangni pawh suala tlu turin thlem in ni dah ange." (NCV)
Tilungawi lotu che hmangaihna nen i chhan let dan tur chu tlawmna nen a ni, tehna nen ni lovin.
Engtinnge midangte dam takin thu khirh tak tak i sawipui theih ang? I hmangaihten an tihtur ni hauh lo an ti tih i hmuhin engtinnge i hmachhawn ang? Bible chuan chaltlai tak leh zah lo taka ti lovin zaidam takin, zah tak chunga ti turin min ti.
He thil hi i rilruah vawng reng rawh:
Dik + chhanna chaltlai = Dik lo
Eng anga dik pawh ni la awmzia a nei lo. Chaltlai taka i chhan chuan tuma'n engnge i sawi an ngaithla lo. Mahni thiamchanna lam ngawt an ngaihtuah ang! Tilungawi lotu che i hneh duh anih chuan zaidam tak leh hmangaihna nen i chhan let a ngai.
Thufingte 15:4-ah chuan heti hian kan hmu, "Ṭawngka nêm chu nunna thing ang a ni a; lei daw thei erawh chuan thinurna a chawk tho ṭhin." (NLT)
Midangte, a bik takin kan fate kan biak dawnin duhthlan tur kan nei vek. Ṭawngkam na tak hian eng anga nasain naupangte a hliam theih tih hi i hria em? An nunah rei tak ser i siamsak thei. Mahse Bible chuan ṭawngka nêmin hliam a tuam damin min a ṭanpui thei tih min hrilh. Chuvang chuan i fate an lo chet hnawk deuh pawhin i rilru put hmang ang ang an chungah leihbuain ang nghal buan buan suh. An thil tihin nghawng a neih theih dan hrilfiah la. Tidam thei leh ṭanpui thei turin i awka uluk rawh, chaltlai taka ṭawng lovin. Zawldawh rawh.
Nupaa kan inneihnaah pawh hian chutiang tho chu a ni. Ṭawngkam na tak leh thin khei takte hmang lovin ṭawngkam nem leh dam tak hmang ṭhin a nupa kara harsatna hi engzat nge kan pumpelh ang le?
Kan ṭawngkam leh inchhan danah nemnl zawk leh zawldawh zawka inbiak dan kan zir a ṭul hle mai.
Ngaihtuah zui atan.
Midangte hmachhawn tur harsa tak an awmin- entir nan, mite an dik lohna hriattir turin - chaltlai tak ni lo, zaidam tak leh nêm taka i hmachhawn theih nan engin nge pui che?
Nitin i thusawi ṭhin kha ngaihtuah teh. Ṭawngkam dawn nuam engzat nge i sawi?
Miin an tihlung nih loh lai che kha ngaihtuah teh. Engtinnge chhanna nemin buaina tireha rah duhawm zawk a chhuah ang?
[Lettu: Mapuia Fanai]

No comments:
Post a Comment