Saturday, March 4, 2023

THIL TLEM ZAWK TIIN I HLENCHHUAH A TAM ZAWK THEI

 Hringnun I Nunchhuah Pui Ngei Tur

Rick Warren

March 4, 2023


"Thil engkim tih ka tan a thiang a, nimahsela thil engkim tih a tha kher lo." 1 Kor 6:12


I nunah hian ramri fel tak kham i duh chuan, a khat tawkin i zar thenkhat i sahthlak a ngai thin a.


Nun tih hahdamna atana ka tih thin pakhat chu Rose par khawi hi a ni a. Kum tharah rose par tha zawk neih ka duh chuan a zar thenkhat ka tan a ngai thin a, a bik takin January thla chawlhkar thumna velah a ni thin. Kum khat atana a zar thenkhat ka tan hian, chungah chuan zar tam tak a kuhmum te nen parchhuah mai tur an la awm teuh thin a. Chutiang anga par la chhuah si lo han tan chu a harsa ka tih thin zia chu i hrethiam pha angem? Hrehawm ka ti thin hle a - mahse ka tih a ngai tih ka hre si a ni.


Engvang hian nge huan siamte hian an thlai thenkhatte hi hetianga an tih thin le? An thlai hriselna atan leh kum thara rah tam zawk an chhuah theihna atan a ni. Zar thlak then a nih loh chuan kum tharah rah a hlawk thin lo a ni.


Kum tin mai hian thil thar chin thar zar i chhuah thin a. Kum liamta lama i tih ngai lohte i ching thar a, chutiang chuan i chin belh zel thin a. Mahse engnge i paih then tak le? Eng zar nge i tan tak le? Thenkhat tan then lo chuan i neih belh zel ngawt thei lo a ni - i tih thin thenkhat paihthen lo chuan.


Huan ka siama ka thil zir thuruk pakhat chu hei hi a ni- a zar i tan hian a zar thi tawh i tan a ni ngawt lova, a nung tha lai i tan thin a ni.


Chutiang tho chu i nunah pawh a ni. A chang chuan thil i tih thin la tha em em thenkhat i bansan a ngai thin a. Hriselna tha leh rah tha zawk chhuah tura i tih tawp a ngaih chang a awm a ni.


Paula chuan 1 Kor 6:12ah, "Thil engkim tih ka tan a thiang a, nimahsela thil engkim tih a tha kher lo" a lo ti a. 


Pathian hian duhthlan theihna a pe che a. Engkim i ti thei a ni. I kalchhuakin, i hun chu a let 10 a khatin i siam thei a. Pathian chuan a dang hauh lovang che. Mahse chu chu a hlawkthlak kher lem lo a ni.


Mi tamtak tan chuan, 'aih' tih hi 'aw' tih aiin a har thin a. Hunte, chakte, inpekna  i neih loh avangin leh Pathian malsawmna nitin atana remchanna thar atan 'aih' tih i zir i duh thei a. 


Engkim hi i tih theih loh avangin, a dik ber tih i tum tur a ni a. Mahni i inzawh a: ka hun leh thaah hian Pathianin engnge ti tura min duh? tih a ngai thin a ni.


Nun awmze nei tura pawimawh chu duhthlanna hi a ni a. Awmze nei tak nitur chuan, engnge i tih tur i thlan fel a ngai a, i tih loh turte nen. Thudik tak chu: i tih tlem khan i hlen tam zawk ang tih hi!


I nuna i thiltih thenkhat hi sahthlak a changin a ngai fo a. Nangmahin i ti lo a nih chuan, Pathianin thil eng emaw hmangin,  engtirna'n, thil tawn eng emaw emaw, harsatna emaw hmangin  a tihsak ngei ang che.  A chhan chu i theihna bakah thlatin, kumtin i nung thei lo. Thufingte 20:30 chuan, "Pem khawpa vuakna chuan thil tha lo a tleng fai a, Vuakna chuan pumpui chhûngril lamte pawh a fan" a ti a. 


Vawiina i nun hi uluk takin en la, zar i thlak ngaite han en la. Tichuan hun thar herchhuakah  hriselna tha leh rah tha zawk i nei ngei thei ang.


Ngaihtuah zui atan...


I nunah Pathianin natna lo thlengte i zar thenkhat sahthlak nan engtin nge a hman thin?


Theihloh chin i nei tih hi engvanga pawm harsa nge a nih? Engvanga 'aw' tih hi 'aih' tih aia harsa nge nile?


I nunah thiltih thin tha si thenkhatte, a dangte tana hmun siamsakna turin engte nge sahthlak ngai le?


(Lettu: Msa)

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...