Sunday, March 5, 2023

INRAWLH TLEM LA, PATHIANAH RINNA NGHAT ZAWK RAWH

 _Hringnun i nun chhuahpui ngei tur chu_

- Rick Warren 

- March 5, 2023



"Unaute u, Asia rama kan chunga buaina lo thlen thû kha hre lova in awm kan duh lo ve: khatia tuar zawh rual loh khawpa phurritin min delh beh reng lai khân, dam rêng pawh kan in beisei tawh lo va. Ni e, thih chauh hmabâkin kan inhria a, mahse keimahnia innghat lova, mitthite kai thotu Pathian chauh kan rin theihna tûr a lo ni a." (II Korinth 1:8-9)


I nunah mamawh belh tam tak i nei em? Hmuh theih dan kawng khat chu thil tih tlema Pathian rin tam a ni. 


Engvangin nge chu chuan a puih ang che? A chhan chu Pathianin kum 20 chhunga i tih aia tam kha minute 20 chhung lekin a ti thei a ni.


I nun ngei kha han ngaihtuah teh. Thlen tum leh duhthusam i neihte kha hlawhtlinna hmu si lovin kum tam tak i beiin, i zawngin, i thawk tawh em?Engvangin nge tlem tal i hnungtawlh mai loh? Chawl la, hahdam la, Pathian ring rawh. A thil tih theihte en rawh. I nunah a tan hmun i siam chuan i duhthusamte chu rang zawk leh ṭha zawkin a zawh sak thei ang che.


Lungkham leh phurrit ngah lutuk hlawkna awmchhun chu Pathian ring lo thei lova min nawr hi a ni. I hma lamah kal ngaihna i hre tawh lo a, i theihna leh chaknate a lo bo a ni tih i inhriatchhuahna chuan a ṭhingṭhittir ṭhin che a ni.


Tirhkoh Paula kha Asia rama hnathawk leh rawngbawla a awm lai khan a chau em em a, tlawm mai a inpeih tawh a ni.


II Korinth 1:8-9 ah chuan heti hian a sawi a, _"Unaute u, Asia rama kan chunga buaina lo thlen thu kha hre lova in awm kan duh lo ve: khatia tuar zawh rual loh khawpa phurritin min delh beh reng lai khan, dam reng pawh kan inbeisei tawh lo va. Ni e, thih chauh hmabâkin kan inhria a, mahse keimahnia innghat lova, mitthite kai thotu Pathian chauh kan rin theihna tur a lo ni a."_ tiin.


Pathian chuan i tih theih loh a ti thei a. Isua khan, "I buai chuan tlang i sawn thei" a ti lova. "Rim taka i thawh a i lungngaih em em chuan tlang i sawn thei" a ti bawk lova. "Rinna i neih chuan" tlang i sawn thei ang a ti zawk a ni. (Matthaia 17:20). Buaina ni lovin rinna zawkin hna a thawk zo ṭhin.


Tichuan, engnge i tlang chu ni ta? Laksawn ngai i harsatna chu engnge ni ta? Nangmaha tih vek lo tum ve suh. Thawk tlem la Pathian ring tam rawh.


Ngaihtuah chhunzawm atan.


Engtik lai khan nge i phurrit lutukin Pathian ring turin a nawr che tih i hriatchhuah?


Engtikah nge rinnain tlang a sawn i hmuh tawh, i nunah emaw midang nun pawh nise?


Eng duhthusam leh tum nge tihlawhtling tura nasa taka i lo beih tawh te i tawpsan? Hnungtawlh hreta Pathian hnathawhna hmun siamsak hian engnge a an ang?


*Pathianah hahdamna zawng turin i inpeih em?*


Hahdamna kawng hmasa ber chu Isua Lal leh Chhandamtu a pawma Pathian nena inremna siam hi a ni. He ṭawngṭaina hmang hian bul i ṭan thei:


"Lalpa, ka sualna hian nang nena min ṭhen hrang reng hi ka duh tawh lo. Isua ka rin chuan ka thiltih sualte ngaidamin kan damchhan min kawhhmuh anga, i chhungkuaah min pawmin engtik niah emaw chatuana i hnena chêng turin vanramah min hruai ang tih ka ring tlat a ni.


"Isu, ka sualte i hmaah ka puang a, min Chhandamtu i ni tih ka ring e. Chhandamna chu eng dang ni lovin rinna avanga khawngaihnaa lokal a ni tih i sawi hi ka pawm e. Ka nunah lo lal turin ka sawm a che. Vawiin hian ka nun i tan ka hlan e.


"Min siam angin- muang leh hahdama nuna, ka nun zawnga i rawng bawl ka duh e. Isua hmingin, Amen "


Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia,


[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...