Monday, March 6, 2023

HRINGNUN HMAN DAN ṬHA BER CHU HMANGAIHNA HI A NI

 _Hringnun i nun chhuahpui ngei tur ni_

- Rick Warren 

- March 6, 2023


"Hmangaihna hi in tum ber ni rawh se!" (1 Korinth 14:1, NLT)


Mihringte hian hriat reng theihna leh theihnghilh zung zung theihna mak tak mai kan nei a. Natna kan tawrh apiangte hi lian tham pawh ni lo mahse kan hre reng a- mahse chung natnaten min zirtir erawh kan theihnghilh leh thuai si ṭhin. Chung zirlaite chu zir nawn ngaiin kan awm leh fo ta ṭhin a ni.


Chuvang chuan Davida anga hetianga ṭawngṭai hi kan ngai leh ṭhin, _"Kan dam chhûng nite chhiar dan tûr min zirtir ang che, Finna thinlung kan neih phah hialna tûrin."_ (Sam 90:12)


Tunkar chhoah hian hringnun leh inlaichinna kawnga kan zir chhuah, mahse kan theihnghilh leh nghal fo ṭhin pathum kan zir dawn a ni.


Heng thil pathumte hian i nun zirchianga i phurrit chhawk turin a pui dawn che a ni. I zira a taka i nunpui chuan nun hrisel zawk i nei ang a. Chhungkaw hlim zawk i din ang. I eizawnnaah hlawhtlinna hmel i hmu ang a. Mi zawng zawngin heng hi kan zawm chuan khawvel hi awmze nei zawka kalin inlaichinna duhawm tak a lo pung ang.


Vawiin hian chu thudik hmasa ber chuan bul kan ṭan dawn a ni: *Hringnun hman dan ṭha ber chu hmangaihna hi a ni*


1 Korinth 14:1-ah chuan, "Hmangaihna hi in tum ber ni rawh se!" (NLT) tih kan hmu. Hmangaihna hi i ngaih pawimawh ber ni rawh se ti pawhin kan sawi thei ang. Dah pawimawh ber la. I thiltum berah hmang rawh. I damchhanah ruat la. "Hmangaihna hi ka tum tam tak zinga mi a ni" ti reng reng suh. I thiltum 10 zinga pakhatah dah mai suh. I tum berah dah rawh!


Engvangin nge Pathianin hmangaihna hi i tum ber  ni rawh se a tih? Chhan pahnih a awm:


A hmasa zawkah chuan Pathianin hringnun awmzia chu hmangaihna hi a ni tiin a sawi. Bible chuan, _"Tin, mi retheite chawm nan ka sum zawng zawng pe vek mah ila, ka taksa pawh kang turin inpe mah ila, hmangaihna ka neih si loh chuan ka tan engmah a sawt lo vang."_ tiin a sawi (1 Korinth 13:3). Mi tam tak chuan hmangaihna hi inlaichinnaa kan telh theih chuan kan telh ve tur ni lek fang anga kan ngai hi mak ka ti ṭhin. Mite nena hun ṭha tak tak hmang lovin a theih hram chuan nam liam mai kan tum ṭhin. Mahse Pathian tan chuan hmangaihnaa inlaichinna hi nun peng khat mai ang a ni ngawt lo. Pathian chuan hmangaihnaa inlaichinna hi hringnun awmzia niin a sawi a. Hringnun hi hmangaihna a ni a ti a ni.


A pahnihnaah chuan, Pathianin hmangaihna i dah pawimawh tur a ni a tih chhan chu hmangaihna hi chatuan daih a tihte zinga mi a nih vang a ni: _"Chutichuan, heng pathum, rinna te, beiseina te, hmangaihna te hi a awm reng ang; tin, hengahte hian a ropui ber chu hmangaihna hi a ni."_ (1 Korinth 13:13). I thih hnuah thil hlu tak hnutchhiah i duh em? I nunah danglamna siam i duh em? I chhuahsan tur khawvelah hian a ṭha zawnga hriat reng tur hnutchhiah i duh em? I nun kha hmangaihnain chhung khat mai rawh.


Nitin hian i damchhung ni chhiar dan turah thutlukna tam tak i siam a ngai fo ṭhin. Hmangaihna kan thlan hi a dik fo ṭhin. Hmangaihna i thlan hian Isua i lo ang ṭhin a ni.


Ngaihtuah zui atan.

Hmangaihnaa inlaichinna i siamah khan engnge i dah pawimawh le? Engnge a finfiahna?


Vawiin hian lo thi dawn ta la miten engnge i hnutchhiah ni a an sawi ang le? Mite i hmangaih dan hi an sawi ber a ni ang em?



Mite i hmangaih a ni tih i lantir theihna engte nge ni ang le?


[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...