Friday, March 3, 2023

I PHUR TAM LUTUK A NIH CHUAN, IN CHHAWK ṬHEN DAN ZIR RAWH

 _Hringnun I_ _Nunchhuahpui_ _Ngei Tur_ 

By Rick Warren

- March 2, 2023


“ _Engkim mai hian tâwp chin a nei tih ka hre ta a_ .” [Sam 119:96]

Pathianin thawk tura a duh chauh che chu thawk thei turin i nunah khan ramri kham i duh a nih chuan mihring mai i ni tih inhre nawn ang che. Pathian i ni miah lo. Tlawm thei lo i ni hek lo. Theih chin nei i ni!

Sam 119: 96 chuan hetiang hian a sawi, “ _Engkim mai hian tâwp chin a nei tih ka hre ta a_ ,” tiin. 

Pathian chu i ramri tur bithliahtu a ni. I ṭhatna turin bithliah a siam a – a chhan chu a hmangaih che. I theihna chin bithliah chu pawm loh aiin pawm a ṭha zawk daih a ni. 

Lungngaihthlak takin, mihringte hian kan theihna chin bithliah pawm dan kan thiam tawk lo hle. Kan inchhut lian lutuk fo mai a, kan hmaa harsatna awm te pawh kan ngainep mah mah fo bawk. Chung zawng zawng bakah chuan, Khawtlang inrelbawlna, “I thei vek ang! I nei thei vek! I duh duh angin awm rawh!” min titu sukthlekah chuan kan cheng a. Mahse chu chu a dik ngawt lo. Pathianin ni tura a duh ang che chu i ni thei ngei a, i duh ang ang erawh i ni thei ngawt lo. I nunah khan ramri a awm. 

A hmasa berah chuan tisa ramri mumal tak a awm. Chaw ei lovin thla ruk i khawsa thei lo, nangmah leh nangmah infuih engang mah la. I tisa ramri chu ngaihtuahna ropui eng ang pawh nei mah la, tiam chin nei a ni. 

Thinlung ramri nei i ni. Chu chu i nunah chuan a lan dan mai aia hmuh fiah har a ni. Mi tam tak chuan anmahni harsatna leh mite harsatna chu phurh kawp an tum ṭhin. I thinlungah chuan mi engzat fakau nge i phurh theih tehlul ang le? An harsatna chu eng ang takin nge i phurhsak theih? I rin aia tlem daih a ni ang. 

Rilru thuhlaah pawh theih chin nei i ni. Thil ṭha lo tak mai chu thu kan dawnna hrang hrang radio, TV leh internet te chuan bengvarna tur chi hrang hrang an thun mawlh mawlh a. Chuvangin, khawvel hmun hrang hranga mite chu ngaihtuahna seng thei lovin an awm. An phur thei tawh lo. 

Hun bithliah nei pawh i ni bawk. Hun hman dan zirna hmunah vawi tam kal tawh mah la, ni khatah darkar 24 aia tam i nei ngai chuang lo vang. Chu hun ṭhen eng emawzat chu mutna atana i hman a la ngai zui. 

Hetiang hian i ngaihtuah mai thei, “Ka theih chin piah lam ka hnaih chuan Pathian chuan min lo hrilh thei sela aw” tiin. 

Pathian chuan inenfiahna eng a pe tawh che! Hming hrang hrang a nei: natna, hahna, chauhna, hlim lohna, thinrimna. Heng zinga eng emaw berte hi i pai a nih chuan, i phur chu a rit mah mah tihna a ni ang a; i nunah khan eng emaw a nasa mah mah a ni ang. 

Tichuan, i nunah khan eng ramri nge i kham ang? Ramri kham dan chu - theih chin nei i nih avangin ramri kham i mamawh a ni tih inhriatna a awm a ngai. I tum ram thleng thei lo leka buaipui eng emaw i ngah lutuk chuan i nun tan awmzia a awm lo vang. 

I theih chin bithliah hre turin finna Pathian hnen atangin dil ṭhin ang che. Tichuan i nunah chuan ramri kham la – phur zang zawka i khawsak hun chuan a nawmzia i tem dawn nia. 

Ngaihtuah zui atan. 

Eng vangin nge Pathianin bithliah a siamsak che? Eng vangin nge i thawh zoh vek a phal mai loh? 

I nunah khan ramri zau zawk nei turin eng nge i paih ṭhen ngai a, i bansan ṭul nia i hriat? 

I chak lohna i hriat chhuah tawhte chu eng nge ni? Engtin nge i hmuh chhuah ang? Engtiangin nge i lawmna chu i lanchhuahtir? 

[ *Lettu* : Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...