_Ni Sawmnga Chhung Rinnaah_
- Rick Warren
Sept 9, 2023
Rinhlelhna hi kan suangtuahna hmelma a ni.
Naupang mai i nih lai chuan, suangtuahna tha tak i nei thin a. Mahse i kum a tam zel a, i suangtuahnate chu a lo chuai telh telh a. Thil nih theih dan tura i rinte i suangtuah ta ngai lova, a nih ang angin i nung ta mai thin a ni. A hmaa thil awm dan angah i awm ve tawp mai a ni.
Rinhlelhna leh hlauhna hian i nuna Pathian duh dan chu a ti che thei lova. Va hisap tur chuan huaisen a ngai a. Mi tam tak hian ngatinge an suangtuah ngai loh chhan i hria em? Hlawhchham an hlauh vang a ni.
Huaisenna chu i hlauh ber tih ngamna kha a ni a. I hlau lo a nih chuan, huaisenna i mamawh hran lo. Huaisenna chu namen lova i hlau chung pawh a, 'ka ti tho vang' i tihna kha a ni.
Saddleback Kohhranah kan thiltih ropui tak takte hi, tih ka zuam loh tak tak vek an ni. Mahse, "kan ti tho vang" ka ti thin a. Eng vangin? A chhan chu ka nun kha hlauhna inhnehtir ka tum loh vang a ni. Khur chung pawhin hmalam ka pan ta thin a ni.
I hlauh lai pawha thil dik i tih tlatna kha huaisenna chu a ni. "Ka rinhlehna a reh hun ka nghak a ngem aw?" i ti maithei. Mahse hlauhna hmachhawn zawnga i kal a ngai a ni. Nuam lo i tihna zawng zawng haiderin, tih tawp mai tur a ni.
Jakoba 1:5-8 chuan, "In zingah tupawhin finna a tlakchham chuan mi zawng zawng hnena hau lo leh ui lova pe thintu Pathian chu dil rawh se, chutichuan a hnenah pek a ni ang. Nimahsela, ringhlel hauh lovin rinna neiin dil rawh se, ringhleltu chu tuifinriat fawn thli chhem len leh vawrh ang a ni si a.
Chutiang mi, rilru bulbal nei lo, a thil tih zawng zawnga nghet lo mi chuan Lalpa hnenah engmah hmuh i ring suh se" a ti.
I suangtuahna chu hlauhnain emaw rinnain emaw a thunun ngei ngei dawn a. I duhthlanna a ni. Hlauhna kha i inthununtir chuan, i phili buai anga, i hah anga, i mangang reng ang. Hlauhna a i nun i thununtir chuan khawngaihthlak takin i nung dawn a ni.
Chumi aiah chuan, hlauhna chu in thuhnuaitir lo turin thutlukna siam la. Pathian ring rawh. Tichuan i rinna nen hmalam i pan thei anga, i suangtuahna chu thil theihna hrang hrangin i tikhat dawn a ni, a chhan chu Pathian nen chuan engkim tih theih a ni.
Ngaihtuah zui atan...
I nunah thil lian tak Pathian tih atana i duh mahse hlauhnaina chelh beh tlat eng nge awm le?
I rilru leh nunna kha Pathian theihnaah i inhawng ngam tak tak ang em? Eng vangin?
Tawngtainaa Pathian i dilin, a chhanna a pek tur che rinna hmanga lo ring tlat tura a duh che eng nge awm?
(Lettu: Msa)

No comments:
Post a Comment