Ni 50 Chhung Rinna
- Rick Warren
- Sept 10, 2023
Hei hi thudik mak tak chu a ni: Rinna i neih rualin i ringhlel thei tho bawk.
Marka bung 9-naah chuan mi pakhatin a fapa dam lo Isua hnena a hruai thu kan hmu. Isua a pa hnenah chuan a rin phawt chuan a fapa a tihdam theih thu a hrilh a. Chu pa chuan heti hian a chhang, "Ka ring e, ka rinhlelhnaah mi pui ang che" tiin (Marka 9:24)
Pathianah rinna i nghah rualin i zam thei a, i hlauthawng thei bawk. Huaisenna hi hlauhna awm lohna hi a ni ringawt lo. Hlau chung chung pawha i tih ngamna kha huaisenna chu a ni. Khi pa pawh khi rinna leh rinhlelhnain a khat a ni. A rinhlelhna zawng zawng nen tlang takin Isua a pan a, Isuan thilmak a hmuhtir ta a ni.
Ringtu/Kristian ṭha tak ni turin rinna tam tak i neih kher a ngai lo- a chhan chu i rinna lenzawng kha thil danglamna thlentu a ni lo tlat. A pawimawh zawk chu khawiah nge i rinna i dah tih kha a ni. Pathian ropui takah rinna ta tak tê tal i neih kha a ngai a ni.
Mi pakhat chuan heti hian min zawt a, "Baptisma chana kohhrana tel ka duh, mahse zawhna leh rinhlelhna ka neih zawng zawngte hi baptisma ka chan hmain ka hriatfiah vek a ṭul i ti ve em?" tiin. Ngai lul lo ve. Kum 60 dawn kristian ka lo ni ta a, chutichung chuan zawhna tam tak ka la nei! Engkim i hriatfiah vek a ngai hmasa kher lo. I rinna neih ang zelin bul i ṭan a ni.
Matthaia 17:20-ah chuan heti hian kan hmu, "Tih tak meuhvin ka hrilh a che u, anṭam mu fangkhat ang rin in neih chuan, he tlang hnenah hian, ‘Heta tangin sawtah sawn va insawn rawh,’ in ti ang a, a insawn mai ang; in tan tih theih loh reng engmawh a awm lo vang,"
I rinna chu eng anga chak lo leh dawrawm ang pawhin hre mahla, hruai chhuak tur chein a tawk reng a ni. Engvangin maw? A chhan chu i beisei aia nasa daihin Pathian i nunah thil a tithei tlat. I thu a ni lo hrim hrim bawk. Pathianin rinna nei turin a duh che a. Mahse a chunga rinna i nghah pawh a duh a ni.
Krista lama zawi muanga ke i pen hlek pawh khan rinhlelhna, hnualna leh beidawnna lak ata a dah hla zel ang che. Vawiin hian rinna nen hmalam pan rawh.
Ngaihtuah zui atan.
Rinna i ngah tawk lo ni a i inhriat avangin i hnathawh lai emaw i ṭawngṭai mek lai eng kha nge i bansan le?
Pathian lovah engah nge rinna i nghah len zawk le?
I dinhmun chu eng anga khirh pawh nise engtinnge vawiin hian Pathianah rinna i nghat a ni tih lantir turin ke i pen ang?
[Lettu: Mapuia Fanai]

No comments:
Post a Comment