Friday, September 8, 2023

PATHIAN CHU A HUNAH A CHE ṬHIN

Ni 50 Chhung Rinnaah

By Rick Warren

— Sept 8, 2023



“He inlârna hi hun bîk nei a ni a, A thlen hun thlîr reng la, a daw lo vang. A muan pawhin nghâk deuh la, A thleng ngei dâwn, a tlai dâwn lo.” [Habakkuk 2:3]

Pathian chu a hmanhmawh ruai ngai lova, a tlai ngai hek lo. 

A hunah a thleng mai ṭhin. 

Kan hriat thiam loh chang pawhin Pathian hun ruat chu a famkim a. Pathian hun ruat chu kan hre fiah tak tak ngai lo vang, a chhan chu Pathian chu huang dang daiha awm a ni tlat. Hun piah lama awm a ni a, hun thlir dan hrang daih a nei. 

Bible chuan Pathianin hun a hmuh dan chu 2 Petera 3: 8 ah hetiang hian a sawi, “Duh takte u, hei hi theihnghilh suh u, Lalpa tân chuan ni khat hi kum sângkhat ang a ni a, kum sângkhat pawh hi ni khat ang a ni” tiin.

Chu chu hun i hman ṭhin dan nen chuan a inang em? Chaw nghaka kan ṭhut chang chu kum sang eng emaw zata rei ang mai a lo ni ve thei thova, mahse keini mihringte hian chutiang chuan kan chhut kher lo. 

Pathian, hun piah lama awm a nihna chuan keimahniah pawimawhna lian tak a nei. Pathianin a siam lai che khan i thinlungah hmathlir a dah a. Mi tam ber chuan hmathlir ropui tak emaw hmachhawp ropui tak nen bul an ṭana. An nun atan duhthusam leh ruahmanna an nei ṭhin.

Pathian chuan i tan eng hmachhawp nge a lo neih ve? Kum eng emawzat chhung ka lo hmuh ve chu mi ṭhenkhatten hmathlir nena an nun bul an ṭan laiin mi tam takte chuan an hmathlir chu an tlawmsan leh mai ṭhin. A chhan lian tak pakhat chu an tuma anga ranga a thleng lo chu a ni. 


I hmathlir tihchhiatsak vek i lo ni tawh mai thei. I hmathlir a lo kehsawm tawh mai thei bawk. A nih loh pawhin, beidawnna leh hnualna avangin, i hmathlir chu i lo phum bo tawh hial mai thei. I lo hnuchhawn daih tawh thei bawk. 


Pathian chuan chutianga ti tur chuan a duh lo che. Pathianin i nun atana hmathlir a pe che a nih chuan a la thleng ang. A hun ruatah chuan a thlen ngei ngei a ngai, i hun ruatah ni lovin. 

Pathian chuan i mumangah hetiang hian a sawi: “He inlârna hi hun bîk nei a ni a, A thlen hun thlîr reng la, a daw lo vang. A muan pawhin nghâk deuh la, A thleng ngei dâwn, a tlai dâwn lo.” [Habakkuk 2:3]

Saddleback Church kan din khan kum 25 chauh ka la ni a, thil tihfel zung zung duh hun lai kha a la ni. Mahse Pathian chuan I bulah pawh a sawi tur ni awm tak chu ka bulah a lo sawi ve ta a ni: “Aih, tunah chuan a thleng nghal vek thei lo vang. Muangchangin, a tahtawlin, i hmathlirte chu tihpuitlin a ni ang” tiin.  

He thuchah pawimawh tak hi in thinlunga vawng reng turin ka duh che u a ni. 

He thutak hi i thinlungah khawl khawm ang che: Pathian chu a rawn hma viau ngai lo va, a khawtlai viau ngai hek lo.  

Pathian chu a hun takah a lo thleng ṭhin. 

Ngaihtuah zui atan. 

Eng vangin nge ama hun ruatah chauh i ruahmanna chu thlentir a phalsak ni ang? 

A khawtlai palh dawn avangin i hmathlir chu i lo kiansan tawh em? Chu hmathlir chu Pathian pek niin i hria em? 

I duhthusam leh tih tur bik tihhlawhtlin tuma i beih lai chuan eng vangin nge mahni inthunun a harsat em em?  

[Lettu: Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...