Hmangaihna Nen Ni 40
By Rick Warren
September 29, 2023
Mitinin thahrui, rosum, theihna kan nei hrang ṭheuh mai a, mahse hun erawh inzat ṭheuha pek kan ni: kar khat chhung darkar 168 ṭheuh. Sum chu i neih belh thei a, hun erawh i neih belh thei lo. Ni pawh bithliah saa pek i ni a, chuvangin i hun hlut zawng chu engzat chiahah nge i chantir?
Midangte hnena i thilpek theih hlu ber chu anmahni i ngaihsak chu a ni. Tute emaw chunga i ngaihsakna i lantir chuan, “Ka tan i pawimawh. i thusawi kha ka ngaithla chak a. Ka hun hi i phu e,” i tihna a ni daih.
Isua chuan inlaichinna laimu chu thil kan intihsak emaw thil kan inpek tawn emaw chu a ni lo niin a sawi. Hmangaihna dik tak laimu, hmangaihnaa rawng inbawltawnsak chu midangte hnena kan inpektawn chu a ni.
Hmangaihna lantirna ṭha ber chu hun inpek a ni.
Bible chuan I Johana 3: 18 ah chuan hetiang hian a sawi, “Fate u, ṭawngka leh thu chauhvin i hmangaih suh ang u, thiltih leh tihtakzetin ni zâwk rawh se.”
Nu leh pa engzat chiah nge ka sawipui ka hre thei tawh meuh lo, hetiang hian min chhang ṭhin, “Ka hre thiam lo, Rick. Ka chhungte hi an mamawh chu ka pe vek. Engkim petu tha tak ka ni. Nuamsa takin kan khawsa a. Engnge a bak an la beisei cheu” tiin.
I thil la duh cheuh chu ka hrilh ang che: Nangmah kha an duh che!
Nangmah chauhin i hun kha i pe thei. I hun chu engmahin a luahlan thei lo – eng thilpek mahin, eng pawisa mahin, eng thawmhnaw mahin an luahlan thei lo che. Fate chuan thil an mamawh lo, nu leh pa an mamawh. Video game thar chu a chhanna a ni lo. Nangmah kha an mamawh che!
Nangmah hmangaihtu che leh i hmangaih turte tan chuan hun tam zawk engtin nge i pek theih ang?
Thurawn pakhat ka pe teh ang che: TV kha off la, i phone kha dah bo rawh. Mak ka tih deuh chu mi tam tak chuan a tak taka mi kawm chuang lovin an phone hi an khawih an khawih ringawt zel. An chhungte tak tak buaipui chuang lovin midang chhungkaw chanchin an thlir reng thei.
Ephesi 5: 2 chuan hetiang hian a sawi, “Kristan min hmangaiha, Pathian lâwmzâwng thilpêk leh thilhlan rimtui ni tûrin kan tân a inpe ang khân hmangaihna nei ve rawh u,” tiin.
Hmangaihna chu inhlanna a ni. A awmzia chu i duhzawng atan ka duhzawng ka hlan tihna a ni a. Ka hun chu i hun atan ka hlan a ni. Ka duhzawng aiah i duhzawng ka hlan ta bawk. Tuna ka thil tih chak zawng aiin i thil tih chak zawng chu ka thlang ta tihna a ni.
Chu chu inhlanna a ni a. Chu chu hmangaihna a ni.
Ngaihtuah zui atan.
Tun kar chhung hian i chhungte leh ṭhiante chu engtin nge i hun pein i hmangaihna i lantir theih ang?
I hmangaihna chu thiltiha lantir turin i hun hman dan chu eng lai nge i thlak danglam ang?
Krista nun zui chuan hmangaihna thu chu engtin nge i lo zir ve tawh ṭhin?
[ *Lettu* : Peka]

No comments:
Post a Comment