Saturday, September 30, 2023

HMANGAIH HUN ṬHA BER CHU TUN HI A NI

 Hmangaihna nen ni 40

- Rick Warren

Sept 30, 2023


"A phute tan thâtna ui suh, I kuta tih theihna a awm phawt si chuan.

I thenawm hnênah, "Kal leh ta rih la, lo kal leh rawh, Naktukah ka pe ang che," ti suh, I kawl reng si chuan." Thufingte 3:27-28

Inhmangaih tawn hun tha ber chu tun hi a ni. Naktuk emaw, nakkin emaw, engtik niah emaw, tun hun thenkhatah emaw, i rilruah a khah deuh hunah emaw pawh a ni lo. Tunah a ni.

"Ka sum zawng zawngte ka khawl anga, ka thih hunah chuan mi dangte tanpuina atan ka sem vek ang" an tihte hian ka hrethiam thin lo.

Eng vangin nge chutiang chuan an tih? Engah nge pek fo mai zawk kha nuam an tih loh? An dam lai ngei khan thilpek pek hlimna kha engah nge an hriat loh? I lak atanga pekchhuak i tum - i sum, hun, chakna, eng thil dang pawh nise - tunah pe rawh!

Kum eng emaw zah liamtaah khan, kan kohhran Saddleback kohhran chuan tih hmasawn a ngai hle tih leh kan bungruate pawh kum 15 chuang te an ni tawh tih hretu nupa pakhat hnen atangin cheque kan dawng nawlh mai a. Cheque dollar maktaduai chanve lai atan a ni nghe nghe a. Tah chuan thuziak, "Carpet thar neih pawh a tha ngawt ang" tih te hi a inziak a ni.

Khang nupate khan an thih hnu aiin an dam lai ngei hian an thilpek avangin hlimna nasa tak an dawng ngei ang. Chuvang chuan a ni, "I dam lai ngei hian thilpek pe la, a kalna chin pawh i hre thei ang" tih hi ka sawi ve fo thin. Chu chuan hlimna min pe bawk thin.

Mi tam tak tan chuan hmangaihna hi dollar 500000 atana cheque ziah ang kha a ni ve lem lo. I tan chuan hmangaihna chu damdawi inah damlo kan te, mi khawhar tak hnena lehkhathawn thawn te, i thawhpui kawlh ve tak laka dawhtheih te pawh a ni ang. Hmangaihna ni a i hriat apiang, tunah ngei hian ti ang che.

Bible chuan, "A phute tan thâtna ui suh, I kuta tih theihna a awm phawt si chuan. I thenawm hnênah, "Kal leh ta rih la, lo kal leh rawh, Naktukah ka pe ang che," ti suh, I kawl reng si chuan" a ti a. 

Pathian hian i chhehvelah hian hmangaihna i lantir theihna turin a dah thina ni tih hi i hre tawh em? A chang chuan kan nunah hian han dah khawtlai mai theih thil a awm  thin a, hun tha zawk a tana khek ngai chite. Mahse hmangaihna lantir erawh khek ngai suh.

Hmangaih zir hi Pathianin he leia a dah chhan che a ni a, thil dang zawng zawng aiin a pawimawh tur a ni.

Hmangaihna lantir hi khawtlaitir suh la. Ti khawmuang lo la. Ti mit lo la. Tunah ti ang che.

Ngaihtuah zui atan... 

Mi dangte hnenah hmangaihna i lantir theih nan vawiin hian engnge tih ngai i neih?

Tunah hian hmangaih mai theih lohna tura daltu che engnge awm?

Pathian hian tunah hian i tih mit atan a duh, amah pe tura a dil che engnge i nunah awm le?

(Lettu: Msa)

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...