Hmangaihna nen ni 40
By Rick Warren
September 28, 2023
Pathian chuan hmangaihna nun chu mihringin a nun a hman theih dan kawng ṭha ber niin a sawi a. Nimin lam khan, chu chu eng vangin nge a dik theih tih kawng hnih hmangin kan zir a nih kha. Pakhatna, hmangaihna chuan i rinna a nemnghet, Pathian chhungte zingah chuan i tel ve ngei a ni tih a nemnghet. Pahnihna, hmangaihna chuan i nun a phuarkhawm, i nun peng hrang hrangte kha nghet takin a phuarkhawm a ni.
Khawvela i awm chhan hmangaihna awmzia tih i zir chhan tur kawng hnih a awm:
Pakhatna, hmangaihna chuan i sual man bat a tlaksak che. Bible chuan I Petera 4: 8 ah chuan hetiang hian a sawi, “Thil dang zawng aiin thinlung taka inhmangaih tawn uar rawh u, hmangaihnain sual tam tak a khuh si a.”
Isua Krista hmangaihna chuan i sualte a khuh a, Tichuan nangmah ngei pawh midangte phuar phelhsak turin a phut che a. Ngaihdam i nih tawh avangin midangte i lo ngaidam thei ta a ni.
Bible-a Lal Davida kan hmuh kha mi famkim a ni chiah lo. Dik tak chuan, vawi tam a dai sual zawk. Dawt a sawi a. Mi a bum a. Mi nupui a chhuhsak a. A uire a. A sual khuh nan midang a that hial a nih kha!
Mahse, Davida khan a tihsual chang chuan a pawm zung zung a, a sim thuai bawk. Thil dik kha a ti reng bik lo va, mahse a tawpkhawkah chuan, Lalpa kha a zawng a, thil dik ngei kha tih a duh leh ṭhin.
Pathian chuan Davida kha a rilru ang pu mi a nihzia a sawi hial a. Engtin nge Pathianin Davida ang mi chutiang chuan a sawi theih? A chhan chu Davida khan Pathian a hmangaih a, a tawpah chuan, Pathian chuan a sual kha a khuhsak leh ṭhin a ni.
Mi famkim nih tum aiin thinlung zawng zawnga Pathian hmangaih tum kha a pawimawh hmasa zawk. Dik tak chuan, Pathian zawk khan i famkim thei lo tih a hria a. I thinlung zawng zawngin Pathian i hmangaih em? Nangmah i inhmangaih angin i vengte i hmangaih em? Chutianga i tih theih chuan, hmangaihna chuan sual tam tak a khuhbo ngei ang.
Pahnihna, hmangaihna chatuan atan chhan let a ni thin.
Hmangaihna chu chatuan daiha thangkhawk a ni; Dik tak chuan, i nuna awm reng tur thil awm chhun chu a ni.
Chuvang chuan, tun dinhmuna thil pawimawh tak chu inlaichinna a ni – Pathian leh midangte nena inlaichinna chu. Dik tak chuan, Bible ngei pawhin hmangaihna tel lo nun chu hlutna nei lo leh awmze nei lo ti hialin a sawi: “Ka neih zawng zawng mi retheite tân pe vek mah ila, hâl tûrin ka taksa pawh inpe mah ila, hmangaihna ka neih si loh chuan ka tân eng mah a ni lo vang,” tiin.[I Korinth 13: 3]
Tichuan inlaichinna chu eng vangin nge kan ngaih pawimawh loh ang? Hringnun hi hmangaihna thu hla ni bera kan ngai a nih chuan engvangin nge kan hmangaihte tan chuan hun kan neih theih loh? A chhan chu kan buai a ni. Ngaih pawimawh ber ni lem lo tur kan ngaih pawimawh ber chang a tam hle, tichuan kan inlaichinna chu kan ngaihthah zui ṭhin.
Mahse eng mahin hmangaihna chu a luahlan thei lo vang. Hringnun hi thil ropui tih emaw hna tam tak thawh emaw mite hriat nih emaw a ni ber lo. Hmangaihna a ni ber. I buaina chuan chu chu theihnghilhtir che suh se.
Ngaihtuah zui atan.
“Thinlung zawng zawnga” Pathian hmangaih tih chu eng nge a awmzia ni ta ber?
I buaina avang chuan engtiangin nge mite nena in inlaichinna chu tihchhiat a nih?
Pathian hmangaihna chuan i sualna a hliahkhuh ang, Pathian thinlung ang i lo neih theih nan engnge thinlung taka sim ngai i neih?
[ Lettu : Peka]

No comments:
Post a Comment