_Ni Sawmnga Chhung Rinna_
- Rick Warren
Sept 2, 2023
Tunlai hunah chuan engnge dik a dik lo hi sawi hran a har ta hle mai. Thute hi a bul hrang hrang atangin in ang lo nuai hian kan dawng a. Zirna te, thiamna te, zirchianna te, ngaihdan zawnna te inang lo a awm thup mai.
Thil hi a chiang lo nuai a nih pawhin, he thutakah erawh hi chuan kan chiang thei ang: Pathian thuhnuaiah a awm a ni tih hi.
Bible chuan, "Chutichuan, unaute u, Lalpa lo kal hma loh zawng chhel takin awm rawh u. Ngai teh u, lo neitu chuan ruah tui tla hmasa leh hnuhnung chu a hmuh hma loh chuan chhel takin lei rah hlu tak chu a nghak thin. Nangni pawh chhel takin awm rawh u; in thinlung tinghet rawh u; Lalpa lo kalna chu a hnai tawh si a. Unaute u, thiam loh changa in awm loh nan, inphun suh u; ngai teh u, Roreltu chu kawngka bulah a ding reng a ni" ( Jak 5:7-9) a ti a.
Engvangin nge Jakoba hian a thu hmun eng emawzatah hian Lalpa chu a lo kal leh dawn tih a sawi fo thin? A chhan chu, Pathian hi engkim chunga thuneitu ber a ni tih a tihfiah vang a ni.
Hmanlai chanchin hi Pathian thawnthu a ni a. A bial kual chu a ni lova. Khawvel chanchin hi a ngilin a kal a, a tawpna a pan mek a ni. Pathian chuan ruahmanna a nei a. Pathian chuan tum a nei a. Engtik niah emaw chuan Isua hi a lo kir leh dawn a ni.
Engkim hi hun ruat ang zelin a kal a. Engtikah nge a lo kir dawn kan hre lo, mahse Bible hian a rawn kal hmasak aiin a lo kal lehna tur hi a sawi uar a. Chumi awmzia chu, kan nun kan hman hi nitinin a thlak danglam tur a ni a. Beiseina sang tak nei chungin kan nung tur a ni.
I dinhmun chu i thunun zo lo emaw, i na emaw pawh ni se, Pathian ban phak loh a awm lo. Dawhthei la, Pathian hun ruat hi a tha ber zel. A tlai ngai lova, a thu thu a ni.
PHILLIPS chuan Jakoba 5:8 hi lachhawngin, "Dawhthei la, i thinlung chu thil chiang fakah chuan hahdamtir ang che" a ti.
Eng nge thil chiang fak chu ni le? Isua hi a lo kal leh dawn a ni tih hi. Chu chu engmahin a dal thei lo. Tu mahin an thei lo. Eng thuneihna mahin a thei lo. He khawvel chanchin hi Pathian kutah a awm a, Isua'n a lo kir leh dawn tih a tiam hian hun chiang lovah pawh inrinngamna a pe ang che.
Eng thil dangah mah i innghat thei dawn lova i hriat chuan, he thutakah hian lo innghat la: Pathian kutah a awm tiin. Tin, engkim siamtha tur leh siam thar turin engtikah emaw Isua a lo kir leh ang tih nen hian.
Ngaihtuah zui atan...
Isua a lo kal leh dawn tih beiseina nei chunga nun hi eng nge a awmzia?
Pathian kutah khawvel hi a awm tih hriat hian rinngamna a pe che em? Engvangin?
Eng dinhmunah nge Pathian thu thu a ni tih i hriat a tul? Chumi hmunah chuan Pathianin hna a thawk tawh mek a ni tih i hmuthiam thei em le?
(Lettu : Msa)

No comments:
Post a Comment