Ni Sawmnga Chhung Rinna
- Rick Warren
- Sept 3, 2023
Eng harsatna pawh tawk la a phenah Pathianin hna a thawk reng a ni tih i hriat a ngai. Amahah rinna i nghah a i dawhtheih a pawimawh.
Mahse engtinnge chutiang chuan i tih ang? I nghah laiin engnge i tih ang? A tlai viau ni a i ngaih hunin engtinnge Pathiana rinna nghat turin ke i pen ang?
Bible chuan heti hian a ti, "Chutichuan, unaute u, Lalpa lo kal hma loh zawng chhel takin awm rawh u. Ngai teh u, lo neitu chuan ruah tui tla hmasa leh hnuhnung chu a hmuh hma loh chuan chhel takin lei rah hlu tak chu a nghak ṭhin. Nangni pawh chhel takin awm rawh u; in thinlung tinghet rawh u; Lalpa lo kalna chu a hnai tawh si a."_ (Jakoba 5:7-8)
Lo neitu angin dawh thei taka i nghah a ngai. Lo neitu chuan a nghah mek laiin buh seng turin a inbuatsaih bawk ṭhin. Kan inbuatsaih. Ṭhu mai mai chungin, "Ka buh leh thlaite hi a ṭhang ṭha ang nge ṭhang ṭha lo ang aw" tiin an ngaihtuah lo. An thlaite ṭhang turin an beisei tawp mai a ni. A seng hun taka an buai loh nan seng hun atan an lo inbuatsaih lawk reng a ni.
Tichuan Pathian a chet a i mamawh a pek che i ring ang. Sam 130:5-ah chuan heti hian kan hmu, "LALPA chu ka nghak reng a, ka nunna hian a nghak reng a, A thu pawh ka beisei a ni. "Chu thutiam chu Bible bu pumpuiah hian a awm, Isaia 49:23 ah te hian, "Ka ṭanpuina nghaktute chu beidawngin an awm lovang." (GNT)
Pathianin engnge a tih beiseia i nghah reng le? In nupa kar harsatna siamṭha tur te, sum lama harsatna sukiang tur te, natna tuam dam tur te, in chhungkaw zinga thlarau bo man tur tein i nghak a ni mai thei. Pathianin ti tura beisei taka i nghah mekte kha a tih i ring tak tak em? I nghah laia i inbuatsaih lo anih chuan engmah thleng turin i beisei tak tak lo tihna a ni.
Pathian kan nghak ni a kan inngaih reng lai hian Pathian zawkin min nghak a lo ni fo ṭhin. A malsawmna i dawn turte dawng tura i la inpeih tawk loh avangin thlarau nuna i puitlin hun a nghak a ni fo.
Dawhthei taka Pathian nghahtir theitu che chu a ṭhatna leh khawngaihna hriat reng hi a ni. A thiltih i hmuh theih loh lai leh a muangchang viau ni a i hriat lai pawhin i nunah hna a thawk reng a ni.
Ngawi reng la, Pathian thu kawmngeih la, Isua an tumin bei rawh. Tichuan rah seng turin inbuatsaih rawh.
Ngaihtuah zui atan.
I nunah Pathian hnathawh lo thleng tur engnge i nghah le? Chumi lai chuan Pathianin engnge ti tura a ngha ve reng che ni a i rin?
Pathianin hna thawk tura i nghah chhungin engnge i tih theih le?
Nghah hun chhungin engtinnge Pathian thuin a fuih theih che?
[Lettu: Mapuia Fanai]

No comments:
Post a Comment