_Ni 50 Chhung Rinna_
- Rick Warren
- Sept 4, 2023
_"In dil a, in dil dik loh avangin in hmu lo, in nawmsak nan hman in tum si a."_ (Jakoba 4:3)
Pathianin malsawmnaa vur che a, chu i malsawmna dawn ang zel chuan midangte tan malsawmna thlentu i nih ve a duh bawk. Kan ṭawngṭaina chhanna tura thil pawimawh tak pakhat chu Pathian malsawmna kan dawnte midang, dinhmun ṭha lo zawkte tana luan chhuahah hi a ni.
Thufingte 21:13-ah chuan heti hian kan hmu, _"Mi rethei au thawma beng chhu ngawng chu, ani pawh a au vang a, nimahsela ngaihthlâksak a ni bik lo vang."_ Pathian chuan i kiang vela ṭanpui ngaite i ṭanpui loh chuan ṭanpui i ngaih hunin an ṭanpuina dawn beiseiin awmzia a nei lo a tihna a ni.
Pathian chu hmangaihna a ni a, amah ang turin a duh che a ni. Hmangaihna i nei a ni tih lantirna kawng khat chu mite laka thilphal leh tlawmngaih hi a ni. Pathian rawngbawlna nihna kawng khat Bible hmun tam taka kan hmuh chu hei hi a ni: midangte tana malsawmna thlentu kan nih theih nan Pathianin malsawmnain min vur a ni tih hi.
Entir nan, Pathian hnenah hriselna ṭha i dil a ni mai thei, mahse chu hriselna ṭha chu lo nei ta la engnge i tih ang? Mahni tan chauha dil i ni em, nge ni midangte i ṭanpui theih nan i dil? I eizawnna emaw i sum deh chhuahna kawngah emaw Pathian malsawmna i dilin Pathian malsawmna che kha eng emaw zar a hnenah pek kir leh i inhuam em?
Jakoba 4:3-ah chuan heti hian kan hmu, _"In dil a, in dil dik loh avangin in hmu lo, in nawmsak nan hman in tum si a."_ Ṭawngṭainaah chuan kan rilru puthmang a pawimawh. Engnge i dil tih aiin engvanga ṭawngṭai nge i ni tih a pawimawh zawk.
Thil ṭha tak tana ṭawngṭai si, rilru put hmang dik lova ṭawngṭai hi a awm thei em? Awm thei e. Mahni mimal mamawh thil atan i ṭawngṭai tur a ni lo ka tihna a ni hauh lo. Isuan, "Kan nitin ei khawp min pe ang che" ti a ṭawngṭai turin min hrilh (Matthaia 6:11). Mahse i ṭawngṭaina rilru i thlir a ngai. Malsawmna i dawnte midangte hnenah i pe ve dawn em, nge mahniin i pumbilh dawn?
I mamawh te mai chauh pek che kha Pathian duhdan a ni lo. Pathian nen inzawmna ṭha tak neih te, mite ngaihdam theihna neih te, midangte hnenah Pathian malsawmna kan dawn aṭanga luan chhuahte hi ṭawngṭainaa innghahna pawimawh tak an ni.
Ngaihtuah zui atan.
Isua zuituten Pathian malsawmna an dawn midangte tana an pek chhuah leh i hmu tawh ngai em? Chu chuan engtinnge i nun emaw midangte nun emaw a nghawng le?
Engtinnge Pathianin mal a sawm che? Chu malsawmna chu engtinnge mite i pek ve ang?
Fianrial hun i hman leh ve leh engvanga ṭawngṭai nge i nih ngaihtuah nawn leh rawh. I dilte Lalpan pe ta che sela midangte tan i luang chhuak phal ang em?
[Lettu: Mapuia Fanai]

No comments:
Post a Comment