_I Kawng Zawh Lai Zawh Chhuah Dan_
- Rick Warren
- July 09, 2023
_"Chuvangin hmuh theih thil, kan vela buaina chi tinrengte chu man en lo va, mahse vana kan chan tur hlimna, kan hmuh theih si loh chu kan en zawk a ni. Heng buainate hi chu a reh thuai ang, mahse hlimna kan la chan tur erawh chatuan atan a ni."_ (2 Kor. 4:18, TLB)
TV show hmuhnawm nawm em em mai pakhat chu 24 kha a ni. A changtu ber, Jack Bauer khan _episode_ pakhat lekah khawvel chhiatna lian tham a ching fel thei. Mahse a hmuhnawm tak tak hmain ka en ngai lo, fakna ka nin tlat avangin. A show pumpui DVD-in ka lei tawp a, fakna tel lovin ka en tluan parh a ni.
Ka nupui Kay-i nen he show 24 chhuak hmasa ber kan en ṭum chuan Jack-an second 5 chauh khawvela chhiatna thleng tur chhanchhuah nan a nei khan thinthiin min awmtir thei lo. "Jack-a hian a thei ang em? Kan mi ngaihsan hun tawpna tur a ni zawk mai ang em?" tih ngawt ka ngaihtuah.
Heti hian ka ngaihtuah ta a, "Ni lo ve. Ṭum 5 lai he show hi a la chhuak dawn" tiin.
Thawnthu tawp dan i hriatin i rilru a veng hawk ṭhin. Thil ṭha lo deuhin a rah chhuak dawn em tih ngaihtuah a ṭul miah loh khan i thil thlir dan leh pawm dan a nghawng a ni.
Hei vang hi a nia khawvel mite ang lovin ringtute chuan khawharna an paltlang ṭhin.
Ringtute an chhungte emaw ṭhiante emaw ringtu vek an chân chuan an sun ṭhin, boral ta kha an ngaih dawn avangin, mahse hmun ṭha zawkah, Pathian nen chatuana leng dun turin an awm ta a ni tih pawh an hria.
Tin, kan hmangaihte tel lovin damchhung kan chhiar tawh dawn avangin kan lungngai bawk a ni. Mahse beiseina nen a ni kan lungngaih ni, thawnthu tawp dan tur kan hriat tlat avangin: engtikah emaw chuan vanramah kan la kal ve anga, Pathian angchhungah chatuanin kan awmho dawn tih kan hre si a.
I chhungte i ṭhen lai pawhin beiseina i nei thei a ni.
Engtin maw? Thlir dan zau zawk i neih a thui tak i thlir a ngai. I ngaihtuah zawng i ennawn a ṭul. Tun chauh ngaihtuah bansanin hmabakah thil tam tak a la awm a ni tih i hriat a ngai.
Tuna mi zawng hi kan hringnun a ni hauh lo! Vawiin leh tuna thil thleng mekte i thlir chuan beiseina reng i nei lovang. Mahse chatuan thlir chunga tuna thil thlengte i zir chian chuan tuna kan nun hi nakin atana kan inbuatsaihna a ni tih i hrethiam ang. Pathianin chatuan nun atan a buatsaih che a ni.
_"Chuvangin hmuh theih thil, kan vela buaina chi tinrengte chu man en lo va, mahse vana kan chan tur hlimna, kan hmuh theih si loh chu kan en zawk a ni. Heng buainate hi chu a reh thuai ang, mahse hlimna kan la chan tur erawh chatuan atan a ni."_ (2 Kor. 4:18, TLB)
Ngaihtuah zui atan.
I nunkawng engah te nge (lungngaihna bakah) chatuan ngaihtuah thlenna hian i thil thlir dan a tihdanglam?
Kristian i nih avang hian i chhungte i chânin emaw i lungngaihnaah emaw i tawrhna a nêp bikin i hria em? Engvangin?
Eng kawngahte nge Pathianin thlarau lama puitlinna kawngah leh chatuan atana inpeih tura a ṭhanlentir che?
*Khawiah nge chatuan hun i hman dawn?*
Bible chuan Pathian Fapa, Isua Krista i rin chauhin vanram i lut thei ang tiin min hrilh. Vanram hi thawh chhuah theih a ni lo: _"Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e."_ (Ephesi 2:8-9)
Isua hnenah i inhlan duh takzet anih chuan heti hian ṭawngṭai rawh le:
"Lalpa, i Fapa Isua Krista ka rin phawt chuan ka sualte ngaihdam a ni ang tiin min tiam a, chuvang chuan min siam chhan ka zir anga, nangin i vanrah min lo pawm ang tih ka ring.
"I hmaah ka sual ka puang a, i ngaihdam ka rawn dil e. Ka sual lak bo anih theih nan ka ai Isua a thi a, nangin i kai tho leh a ni tih ka ring e. Vawiin aṭang hian Isua hi min chhandamtuah ka pawm a, ka Lal atan ka thlang e. Min hruai la, i duhzawnga nung turin min pui ang che. Isua hmingin, Amen."
Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia,
[Lettu: Mapuia Fanai]

No comments:
Post a Comment