I Kawng Zawh Lai Zawh Chhuah Dan
- Rick Warren
- July 10, 2023
"An mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang. Thil hmasate chu a ral ta" (Thupuan 21:4)
Beiseina bona khawvel nen kan indo mek a ni.
Thil ṭha lo tak mai ka tawha thil tam tak kan chanin, "Ka tan khawvel a tawp ta" tiin kan ngaihtuah fo ṭhin.
Mahse khawvel tawp a la ni lo ve. Hun rei lo te a liam chauh a ni. I nunah hetiang hun rei lo te liam hi i la tawng fo dawn. Heng hunte hi khawvel tawp hun a la nih loh avangin hun hnuhnung ber angin i ngai ngawt thei lo.
Khawvel tawp hun tak takah chuan Isua hmel a rawn lang anga, khawvel tawp a ni tih hai rual a ni dawn lo. Chuvangin tunah hian khawvel a la tawp lo tih chiang takin i hria.
Engtik niah emaw khawvelah Isua a lokal leh anga, thil dik lo te siamṭhain ba te a rul anga, hliamte a tuam dam bawk ang. Bible-in vanram awm dan tur chiang takin min hrilh. Bible-a lehkhabu hnuhnung ber chuan heti hian min hrilh, "An mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang. Thil hmasate chu a ral ta" (Thupuan 21:4)
Chu ni tur chu nghakhlel takin ka thlir- mahse kan la thleng si lo. Anih chuan he khawvel, keh chhiatna khawvel, nunin awmzia a neih lohna leh indona awm rengah hian engtinnge kan nun ang? He tawp hun thlen hma karah hian engnge i tih tak ang?
Nunin awmzia a neih loh lai pawhin thlamuang takin awm rawh. I hnenah Pathian a awm tih leh a hmangaih che tih i hriat avangin chu chu i tithei ang. A theihnghilh ngai lo che anga, a hmangaihna che a tawp ngai lovang.
Pathian a ṭha a, i tan ruahmanna lian tak i harsatna aia lian a nei tih i hriat avangin khawvel keh chhe tawh karah pawh hlim takin i awm thei ang. I harsatna aiin a siam chhan che kha a lian zawk.
Nun hi indona hlir anih lai leh thil reng reng a harsat a innghirnghona a awm reng karah pawh beiseina nen nung rawh. Amah leh A Fapa Isua ringtute chunga a thutiamah chuan beiseina nei tlat rawh.
Khawvel tawp a la ni lo ve. I tana Pathian thutiam i en rualin muanna, hlimna leh beiseina nen nung rawh.
Ngaihtuah chhunzawm atan.
Vanram ngaih zual bik hun lai neiin i inhria em? Engvangin nge ni a i rin?
Harsatna tam tak kara Isua zuituten beiseina leh hlimna an neih tlat hian mite mit hmuhah eng thu nge a sawi?
Tunah khan i nunah Pathian thutiam eng berin nge awmze bik tak nei le? Engvangin?
Isua Krista hnenah i la inhlan ngai lo anih chuan, engvangin nge vawiin hian i inhlan loh ang? Naktukah engnge thleng dawn i hriat a ngai lo. I hma hunah engnge awm i hriat a ngai kher lo; Kan hmalam hun hi tu kutah nge a awm tih i hriat a tawk! Nangmah Siamtu nena inzawmna ṭha tak i neih chuan hmangaih sawi thiam loh le leh thutiam bawhchhiat theih loh i hmu ang.
A Fapa Isua Krista kalrltlangin Pathianin a ṭhatna a lantir a. Bible chuan heti hian min hrilh, "Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan." (Johana 3:16)
Chatuan nun min tiam i chan theih nan Pathiana rinna nghat turin i inpeih em? I inpeih chuan he ṭawngṭaina hmang hian bul ṭan rawh le: "Lalpa, Isua hi i Fapa a ni tih ka ring e. Ka sualte i hmaah ka puang a i ngaihdamna ka dil e. Isuan ka sualte lak bo a nih theih nan a thi a, nangin i kai tho leh a ni tih ka ring a. Vawiin aṭang hian Isua hi ka chhandamtu a pawmin a hnung zui ka duh e. Min hruai la i duhzawng anga awm turin min pui ang che. Isua hmingin, Amen."
Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia,
[Lettu: Mapuia Fanai]

No comments:
Post a Comment