Saturday, July 8, 2023

I HMING HI PATHIAN KUTAH CHHINCHHIAH A NI

 _I kawng zawh lai zawhchhuah dan_

- Rick Warren

8 July 2023



"Hmeichhiain a fapa, a rila rah chu, khawngaih lohna tûrin a nau a hnute hne lai chu a theihnghilh thei êm ni? Thei e, chungte chuan an theihnghilh a ni thei e, nimahsela kei chuan ka theihnghilh lo vang che. En teh, ka kutphahahte hian ka ziak che hi; i kulh bangte chu ka hmaah a awm reng fo a ni." - Isaia 48:15-16


Nuin a fa a theihnghilh thei lo ang bawk hian, Pathian chuan a theihnghilh thei lo che.


I nu leh pa emaw, i kawppuiin a kalsan tawh che em? Pathian chuan a kalsan ngai lovang che.


I mi rin ber ber ten an hnawl leh si che em? Pathian chuan a hnawl lovang che.


I hringnun zawhpui tur ten an kalsan daih tawh che em?  Pathian chuan a kalsan lovang che.


Hetiang thil i paltlang lai hian Pathianin a kalsan ta che emaw tih mai a awl a. Mahse chu chu a ni thei ngai lovang! Pathianin a hmangaih tura a siam che i ni a. A hmangaih ni tura a siam che i ni.


A nihna takah chuan Pathian hian tattoo ang maiin a kutah i hming a chhu kuau tih i hria em? Bible chuan Isaia 49:15-16-ah chuan, "Hmeichhiain a fapa, a rila rah chu, khawngaih lohna tûrin a nau a hnute hne lai chu a theihnghilh thei êm ni? Thei e, chungte chuan an theihnghilh a ni thei e, nimahsela kei chuan ka theihnghilh lo vang che. En teh, ka kutphahahte hian ak ziak che hi; i kulh bangte chu ka hmaah a awm reng fo a ni" a ti. 


Chu tattoo ang maia ziak chu khawi atanga a neih nge? Kros-ah khan mawle. A kut khenna leh a ban phar chhuak chungin a hmangaihzia che a lantir a. A hmangaih lutuk che a, a na zawk a ni. I tel lova awm ai chuan thih duh hial khawpin a hmangaih che a. Chatuan hmangaihnain a hmangaih che a ni.


Vanramah chuan Isua tih loh tumahin ser an nei ve tawh lo ang a. Krosa a tawrhna ser zawng zawngte kha a taksa khan a pu anga. A hmangaihzia che hriat reng a duh vang a ni. 


I nuna thil thlengte chu i hrethiam vek lovang, mahse hei hi hre reng la: Chhanna i nei lo mai thei. Chhanna pawh i nei reng lovang. Hrilhfiahna pawh i dawng ziah lovang.


Mahse Pathian awmpuina leh hmangaihna i nunah i nei a. Hringnun hi hriatthiam a har hunah pawh, a thutiam chu vawng zel ang che.


Ngaihtuah zui atan...


Pathian kawngte chu 'kan ngaihtuahna piahlam daih' (Isaia 55:8) a ni tih hriatna hian a thiltihte hriatthiamna engtin nge a pek che?


I tawrhnaah chhanna hmu lo mah la Pathian awmpuina che kha a tawk mai em? Eng vangin?


I nunah tunge Pathianin a kalsan lo tih hriat mamawh le? Vawiin hian engtin nge i zirtir ang?


(Lettu: Msa)

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...