I Kawng Zawh Lai Zawh Chhuah Dan
By Rick Warren
— July 07, 2023
“Tui thuk i dai laiin ka awmpui zel ang che, tui lian pawhin a chim pil lo ang che. Meiah kal tlang mah la, i kang lo ang, meialhte chuan a hliau na lo ang che." [Isaia 43:2]
Hun harsa paltlangin i nun khan thil lian tham eng emaw zat a la chan dawn. Eng vangin? Thil inthlak danglam a awm loh chuan a ṭhan theih loh; channa tel lo chuan a inthlak theih loh a; natna tel lo chuan thil a danglam thei lo a, lu sunna tel lo natna a awm thei lo.
Kum 27 chhung chu ka fapa tan ṭawngṭaiin, a rilru lam harsatna chu a lo dam theih nan nitin ka ṭawngṭai ṭhin. Matthew-a kha nun hrehawm leh na tak tuarin a nung a. Kan ram chhunga doctor thiam ber berte kan panpui a, damdawi tha ber berin kan enkawl bawk. Kan tana ṭawngṭai ṭhin mi sang fe an awm bawk. Chhungkuaa rinna nghet leh chak, kan tana ding tlat pawh an awm.
Chuti chung chuan he Leiah hi chuan Matthew-a a lo dam leh theihna tura ka dilna chu chhanin a awm lo. Vanrama Pathian ang chhung a luh rualin a dam nghal ang tih ka hria. Eng vangin nge khatiang taka nasa kha a tuar? Awmzia a nei lo a ni ber.
Matthew-a a thih hnu chuan chanchinbu pakhatah chuan hetiang hian ka ziak a, “Chhanna nei vek chunga amah tel lova nun hman ai chuan ka zawhna neih engmah min chhansak lo chunga amah nena len dun chu ka thlang zawk a ni,” tiin.
Thil lian tham tak i chan chang chuan, chawplehchilha a chhanna emaw a hrilhfiahna emaw awm ang ang dap chu a chakawm ṭhin: Engah nge min kalsan? Engah nge ka hna ka chan? Engah nge ka cancer? Engah nge? Engah nge? Engah nge?
I nat tak tak chuan a sawifiahna chuan a tidam lo vang. A sawifiahna i mamawh lo. Pathian i mamawh mai zawk. A thlamuanna leh awmpuina chu i mamawh zawk daih.
Pathian chuan hetiang hian a sawi, “Tui thuk i dai laiin ka awmpui zel ang che, tui lian pawhin a chim pil lo ang che. Meiah kal tlang mah la, i kang lo ang, meialhte chuan a hliau na lo ang che." [Isaia 43:2]
I hrehawm ngawih ngawih a ni thei, mahse i chhe vek lo ve. Mei chuan a kang lo vang che, a chhan chu Pathian chuan i natna leh lusunnaah chuan a awmpui che.
I kiang hnai taka awm tu emaw kha naktukah thi dawn sela, a thih chhan tur i hriat vang chuan i natna a tihkiam phah miah lo vang. A hrilhfiahna chu dap ruai suh. I mamawh ber lo!
Khawvel chhunga thil chi hrang hrang thlengte chhan bul hriattir vek che chu Pathianin a intiam lo. Isua zuitu zawng zawngte chu anmahni maia paltlang tur chuan a ti ngai miah lo thung.
Ngaihtuah zui atan.
Eng emaw a chhan bul i zawt mawlh mawlh chunga chhanna la neih loh i nei tawh em? Vawiina fianrial thuzir i zawh hun chuan heng zawhna te hi engtin nge a chhan ang?
Pathian chuan nangmah hnaih taka a awm thu engtin nge a hrilh che?
Natna leh channain a tlakbuak chang che chuan hun kal tawha Pathianin i mamawh a pek dan che chu ngaihtuah nawn ang che. Hun kal tawha Pathian intumchawp a nihnaah chuan hun lo la awm turah lainatna leh khawngaihina i chang dawn tih engtin nge i hriat ang?
*Lettu* : Peka

No comments:
Post a Comment