_Ni 40 Chhung Pathian Thuah_
- Rick Warren
- July 02, 2023
_"Tin, zingah khawvar hma daihin a tho va, a chhuak a, thlaler hmunah a va kal a, chutah chuan a ṭawngṭai a."_ (Marka 1:35)
Ringtu i nihna anga Pathian i hriat chian leh zualna tur chuan amah nen hun tam zawk i hman a ṭul. Mahse chu chu engtik hunah nge ni ang?
Chhanna ho tê mai chu hei hi a ni: Hun ṭha ber chu i ṭhat ber hun lai kha a ni! Ni khata i hun neih ṭha ber kha Pathian tan pe rawh- i rilru a thatho lai ber leh i harhfim lai ber kha.
Nilênga i tihtur tih zawh vek hnua Pathian nena inpawlna neih kha rilru chuan a awn riau mai thei. Mahse i hun hman zawh loh, hun chuang bang chauh kha Pathian tan hlan suh. I hun ṭha ber kha a phu asin.
I hun ṭha ber kha midangte hun ṭha ber nen a inang kher lo mai thei. Mi ṭhenkhat chu zingah an rilru a fim em em laiin ṭhenkhart chu tlai lamah an rilru a fim viau thung. Mahse, mi tam ber tan chuan zingkar hi kan hun neih ṭhat ber a ni.
Isua pawh kha zingah a tho a, a Pa hnenah a ṭawngṭai ṭhin: _"Tin, zingah khawvar hma daihin a tho va, a chhuak a, thlaler hmunah a va kal a, chutah chuan a ṭawngṭai a."_ (Marka 1:35)
Bible-ah hian Pathian ṭih mi, mipa leh hmeichhia zingah, zinga thoa Pathian be ṭhin kan hmu. Chung zinga mi ṭhenkhatte chu han tarlang ila. Heta Bible chang tarlante hi han keu la, zinga Pathian nen an inbiak dan engnge ni tih i hmu thei ang.
• Abrahama: Genesis 19:27
• Mosia: Exodus 34:4
• Joba: Joba 1:5
• Hanna and Elkana: 1 Samuel 1:19
• Jacoba: Genesis 28:18
• Davida: Sam 5:3; 57:7-8
Bible-in zing taka Pathian nena inpawlna hi eng ang chiahin nge a sawi tih i hriat duh chuan hengte hi chhiar bawk la, Sam 143:8, Isaia 26:9 leh Ezekiela 12:8.
Nitin Pathian pawla fianrial hun vawi 1 i hmang ṭhin anih chuan vawi 2 hman han tum teh- zingah vawi 1, zanah vawi 1. Isua zuitu nih zirtu pawl _The Navigators_ tih dintu Dawson Trotman chuan tlai lama fianrial hun a hmanin he thu tawi hi a hmang ṭhin: HWLW, a lampum chu, "His Word The Last Word" (a awmzia chu, ni khat atana ka thu hriat hnuhnung ber chu Pathian thu hi a ni). Kumtluanin he thu hmang hian nitin a hun hmang Pathian thuin a khar ṭhin a ni.
Hun i bituk chen chu engpawh nise vawng dik chat chat zel rawh. I nitin hun hman dan turah ruahman tel la- midang hmuh hun i insiam ṭhin ang khan Pathian biak hun insiam ṭhin rawh.
Ṭawng dangin sawifiah dawn ta ila, Isua nen inhmuh hun insiam ṭhin rawh! I hun ṭha ber zawng la, i calendar-ah chhinchhiah la, bahlah lovin hmang ṭhin ang che.
Ngaihtuah zui atan.
Pathian nen fianrial hun i hmang tawh ṭhin em? Engnge a an? Engnge chona thar pe che?
Engtik hunah nge i rilru a harhfim ber? Chu hunah chuan engtinnge fianrial hun hmang tura i ruahman ang?
I calendar han en teh. Karleh chhunga nitin Pathian nena fianrial hun i hman dan tur han chhinchhiah teh le.
[Lettu: Mapuia Fanai]

No comments:
Post a Comment