_Ni 40 chhung Pathian Thuah_
Rick Warren
July 1, 2023
"Nimahsela LALPA chuan Samuela hnênah, "A hmêl lam emaw, a san lam emaw en suh; ani hi chu ka duh lo a ni; LALPA chuan mihring en dan angin a en ve si lo va; mihring chuan pawn lam lan dan an en thin a, LALPA erawh chuan thinlung lam a en zawk thin a ni," a ti a."(1 Sam 16:7)
Hun rei tak Kristian i lo ni ve tawh emaw, i inkhawm ve fo tawh a nih chuan 'fian rial' an tih fo hi i hre tawh ngei ang. Pathian nena hun i hman theihna tura hun i serh hran kha a ni a, chu chu Kristiana i thanlen dawn chuan i tan a tul a ni.
Fian rial hun hman theih dan hrang hrang a awm a, mahse a pawimawh ber chu rilru puthmang dik hi a ni.
Pathian mitah chuan, engnge i tih aiin i tih chhan kha a pwh a. Rilru dik lo chung pawhin thil dik chu a tih theih a. Pathian chuan Samuela hnenah, "A hmêl lam emaw, a san lam emaw en suh; ani hi chu ka duh lo a ni; LALPA chuan mihring en dan angin a en ve si lo va; mihring chuan pawn lam lan dan an en thin a, LALPA erawh chuan thinlung lam a en zawk thin a ni" a ti a. (1 Sam 16:7)
Fianrial a Pathian tawh i tumin, hetiang rilru hi i put a ngai a ni:
*Beiseina.* Pathian i hnaih chuan, duhna thinlung nen a ni tur a ni a. Thian tha tak i hmuh chak ang mai khan. Amah nen in inkawmna tha tak neih beisei tlat la, hun inhman ral chhung khan malsawmna i beisei thei ang. Chu chu Davida beisei a ni a: ' Aw Pathian nang chu ka Pathian i ni a, zing takah ka zawng ang che" (Sam 63:1) a ti a.
*Zahna.* Pathian awmna hmunah hian pawng tlan vak suh. Chumi ai chuan amah nen hun in hman lai mekin, a hmaah i thinlung chu buatsaih la. Zawlnei Habakukka chuan, "LALPA erawhchu a in thianghlimah a awm a ni: Leia mi zawng zawngte chu ngawi thiap rawh se" a ti. (Hab 2:20). I rilru tibuai theitu che kha Pathian zahna nena a hmaah ngawi renga i awmna khan a tih bosak thei che a ni.
*Inring rengin.* Pathian nen hun in hman chu chau tak leh muthlu chungin ni lo se. Chumi ai chuan intiharh hmasa la. Zing kara fianrial hun hi a hma zan atanga inbuaisaihnaah a intan daih a. Mu hma la, inring renga awmin, zing lamah Pathian tawk turin inpeih la. I ngaihtuahna zawng zawng pek kha a phu a ni.
*Thuawih duhna.* Pathian hnen atanga hriat let beiseiin fianrial hun i hmang a, a thusawite chu awih turin thutlukna siam hmasa rawh. Isua chuan, "Tupawh ama duhzawng tih duh chuan, ka thu zirtir hi Pathian tihchhuah nge keima phuahchawpa ka sawi a hria ang" (John 7:17) a ti. Eng ang pawh ni se Pathian duhzawng ti tura i rilru i siam hnuin, Pathian pawl tlat zel ang che.
I fianrialah chuan beiseina te, inrinna te, zahawmna te, thuawih duhna te nen hmang la. In hun hman dunah Pathianin rem a ruat dan hi thlir turin inpeih ve ang che.
Ngaihtuah zui atan...
Eng zawk hi nge i ngaihtuah tam thin- fianrial neih chhan nge ni a, i fianrial a chu?
Rilru dik pu tura i inbuatsaihin, fianrial hunah Pathian hnathawh i tawng tawh em?
Beiseina, zahawmna, inrin reng leh thuawih duhnaah hian, a eng berah nge than len i mamawh le?
(*Lettu:* Msa)

No comments:
Post a Comment