Monday, July 3, 2023

FIANRIAL HUN HMANNA TUR THLANG ULUK RAWH

 _Ni 40 Chhung Pathian Thuah_


- Rick Warren 

- July 03, 2023



_"Tin, ani chu a chhuak a, a dan pangngaiin Oliv tlangah chuan a kal ta a; zirtirte pawhin an zui a."_ (Luka 22:39)


Pathian nena fianrial hun hman hi hun khirh leh chipchiar tak anih kher a ngai lo. Mahse fianrial hun ṭha tak i hman reng theihna tur leh hun hlawk thei ang bera i hman theihna turin thil hriat ngai erawh a awm. Chung zinga pakhat chu fianrial hun hmanna tur hmun dik i thlan thiam hi a ni.


Bible kan keu chuan Abrahaman Pathian biakna hmun bik a neih thu ka hmu: _"Tin, Abrahama chu zîng takah LALPA hmaa a dinna hmunah khân a han chho va"_ (Genesis 19:27).


Isua pawh Olive tlanga Gethsemane huanah a ṭawngṭai ṭhin thu kan hmu. _"Tin, ani chu a chhuak a, a dan pangngaiin Oliv tlangah chuan a kal ta a; zirtirte pawhin an zui a."_ (Luka 22:39)


Pathian pawlna turin tlang emaw huan emaw i nei hnai vai lo mai thei, mahse hmun fal leh fianrialah i hman a ṭha a ni. Chu hmunah chuan mahni chauhin i awm thei a, a reh raih bawk a, engmahin a tibuai phak bawk lovang che. Tunlai khawvel thawm tam tak awm tawh karah chuan hetiang hmun neih hi a har tawh mai thei, mahse a ṭul si a ni.


Chu fianrial hmunah chuan tumah tibuai si lovin a ringa i ṭawngṭai theih a ngai. Lehkha chhiar theih turin eng ṭha tak a awm pawh a ṭul ang. Tin, nuam sa lutuk ni si lovin hahdam taka i awm theihna i thlan thiam a ṭul. I khum kha hetiang fianrial hun hmanna atana thlan tur dik a ni lo tiin kan sawifiah thei bawk ang.


Pathian pawlna hmun tura i thlan chu a tan leh i tan hmun bîk a ni tur a ni. Chu hmuna chu Isua nen in inpawlna hmun tur anih avangin hun kal zelah i tan a hlu telh telh dawn a ni.


Pathian nung i biakna hmun anih dawn avangin chu hmun chu hmun thianghlim a lo ni ang. Pathian i tawhna hmun kha Abrahaman Pathian a tawhna hmun tluka thianghlim a lo ni ang. Biak inah kher fianrial hun i hman a ngai lo. Mi ṭhenkhat chuan lirthei dahna hmun reh raih maiah fianrial hun an hmang ṭhin, a ṭhenin inchhung hmun ruak laiah te, a ṭhen an in kawmchar lamah te, a ṭhenin an inbul infiamna hmunah te, chutiang zelin. Heng hmunte hi an tan chuan hmun thianghlimah a lo chang ṭhin a ni.


I bul hnaiah fianrialna tur hmun zawng la, chu hmun chu vawiin aṭang hian Pathian pawlna hmun thianghlim atan hmang rawh.


Ngaihtuah zui atan.


Eng hmun nge- hun kal tawhah emaw tun hunah emaw- Pathian pawl nana i hman avanga hmun thianghlim lo ni ta le?


I inah emaw i in bul hnaiah emaw hmun fianrial, Pathian nena inpawlna tur hmun i nei em le?


Chu hmun chu Pathian nena inpawlna hmun atana hmang turin engnge i tih ang le? (Êng te, ṭhutna leh lukham te, Bible leh pen te, lehkha phekte i mamawh mai thei.)


[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...