_Hringnun I Nunchhuahpui Ngei Tur_
By Rick Warren
March 10, 2023
Phurrit tak phur chungin i khawsa mek a nih chuan, heng hi a chhan an ni thei ang: Thunun i tum lutuk a ni thei ang. I tih theih vek niin i ngai a ni mai thei. Hetiang deuh hi i pawm dan a ni mai thei, “Chutiang a nih ngai chuan keimah thu a ni e. Ka siam ṭhat a ngai. A vaiin ka hmerkhawm a ngai a ni” tiin.
Ka ṭhian, khawvel leh leilung kalphung enkawltu ber hi i ni lo asin. Tha i thawh tam ngai tlat nia i inhriat ang zelin nangmah leh nangmah kha i intihah deuh mai mai ang.
Isua chuan i tan hmathlir dang a nei: “ _Ka nghâwngkawl bât ula, ka hnênah zir rawh u; thuhnuairawlh tak leh rilru inngaitlâwm tak ka ni si a; tichuan, in thlarau tân chawlhna in hmu ang. Ka nghâwngkawl chu a nuam a, ka phur pawh a zâng a ni_ ,” tiin [Matthaia 11:29-30]
Nang chuan, “Lo nghak lawk rawh. Thil dang la mai rawh aw? A va huhphurhawm em. Ka thei tawh lo vang. Ka phur tam tawh lutuk!” i ti a ni thei.
Matthaia 11-a Isuan a thusawi kha i han ennawn leh dawn teh ang, a nghawngkawl bat tura a tihna che kha. Lo neitu nu leh pa nei i nih loh chuan nghawngkawl awmzia chu i hre thiam ngai lo vang. Nghawngkawl chu thing sakhat ran pahnih bawlhbawmtu a ni a, an phurrit chu a sem rual ṭhin a ni. Nghawngkawl leh hnam chu an inang lo. Hnam chu ran eng emawa i bah chuan a thil rihna zawng zawng chu chu ran chuan a phur ang a. Mahse nghawngkawl nen chuan ran pahnih pathum dah khawm ta la, an phur chu an inchhawk tawn ang a, a lo zang ta hawk ang. Nghawngkawl chuan ran tan an phur a tizang a, a tihharsat belh lo.
Isuan a nghawngkawl bahpui tura a sawm che khan hetianga sawi ang deuh hi a ni, “I phurrit kha nangmah chauha phurh tura ka tih a ni ngai lo. Ka lo ṭanpui ang che! Min thawhpui rawh, min thurualpui la, i phurrit kha ka phurhpui ang che” tiin.
Tunah khan rilru hahna i nei a nih chuan Isua Krista nghawngkawl chu i bahpui lo tihna a ni thei. Rilru hahna chu ralkhel dar ang deuh a ni a. Chu chuan thil awm dan chu thunun tumin nangmaha phurh mai i tum tihna a ni ang.
Isua nena in inzawmna a chhiat apiangin i rilru hahna chu a nasa ve zel ang. Isua Krista zuitu i ni a ni mai thei, tunah khan i phurrit khan a delh nasa lutuk che a nih chuan, a nghawngkawl i bahpui lo tihna a ni ang.
Mahse amah nena in inzawm leh chiah a, a nghawngkawl i bahpui chiah chuan Isua chuan i phurrit chu a chhawk ang che. I rilru hahna pawh a kiam zui ve nghal ang.
Rilru hah tihdamna chu pumpelh kawng zawn emaw tih palh a awl. Mahse buaina awm thei chu rilru hahna chu rilruah a awm – i kalna apiangah i kal kualpui ṭhin a ni. Hmun thawveng tuipui kam tiauphoah rilru hah takin hun i hmang mek thei a, i in chhungah ngei khan buaina nanem lo i nei thei bawk.
A chinfelna chu mahnia tih ve tum loh tur a ni a, Isua nghawngkawl bahpui chu a ni. Chutianga i tih chuan, Isua chuan muanna a pe ang che.
Ngaihtuah zui atan.
I nun khawi lai kha nge nangmahin thunun ve chiam i tum avanga rilru hahna pe ṭhintu che?
A tak takah chuan, Krista hnena thuneihna hlan tih awmzia chu eng nge ni?
I phurrit phur tura a ṭanpui theih nan che Isua nen engtin nge in inzawm leh theih ang?
*Vawiin hian Isua i zui thei dawn em?*
Bible chuan Pathian, a Fapa Isua Krista kaltlang chauh chuan vanram i kai thei a ni tih a sawi:
Nangmah chuan vanram i kai thei lo: “ _Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni_ ,” tiin. [Ephesi 2: 8-9]
“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.
“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamnatu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e.
[ *Lettu* : Peka]

No comments:
Post a Comment