_Hringnun i nun chhuahpui ngei tur chu_
- Rick Warren
- March 12, 2023
Engnge i nun laimu ni ang?
Tu tan nge i nun dawn, emaw eng tan nge i nun dawn tiin kan sawi thei bawk? Duhthlan tur tam tak i nei. I eizawnna, infiamna, tuizawng, pawisa siam emaw intihhlimnain emaw i nun i khalhtir thei.
Heng zawng zawngah hian dik lo a awm lo. An ṭha vek, mahse, nunlaimu atana hmantlak loh vek an ni. Thil engnge maw, danglam thei lo leh u nun aṭanga lak bi theih loh tur nun laimu a i neih a ngai. A chhan chu, i nun laimu chu lak bo a nih chuan i innghahna te i hloh a ni tih i hriatna khan rilru hahna a neihtur dawn che. Chuvang chuan, i nun laimu atan danglam thei lo i neih a ngai.
Thil pakhat chauh i nun laimu atana hmantlak, danglam ve ngai lo tur leh i nun kaihruai tur a chak tawk a awm: Isua Krista hi.
Naupang inawmtleina hmanlai ve tawh tak Superball kha i la hria em? Leia i sawhtir chuan boruakah feet sang tak a sawt thei a ni. Engvangin? A chhan chu Superball kha chu ball dang, tennis ball-te ang lovin a chhung kha a muk ṭha em em mai a. Chu a muk ṭhatna chuan sang tak tak sawt thei turin chakna a pe a ni.
I nun laimu kha Pathiana innghat a nih chuan sang tak tak thleng zuang turin chakna i nei ang. Lungngaihna ata nun ngaia sawh let thuai theihna i nei ang a. Harsatna aṭangin i inpawt let thuai ang. Tlakchhamna ata i let thuai bawk ang. I nunah inthlak danglam ngai lo innghahna i neih chuan lungngaihna i nei tlem ang.
Philippi 4:6-7 ah chuan heti hian kan hmu, _"Engkimah ṭawngṭaia dîlin, lâwmthu sawi tel zêlin, in thil dîlte chu Pathian hnênah hriattîr zêl ang che u. Tichuan, Pathian thlamuanna, rilrûin a chhui phâk rual loh chuan in thinlung leh in ngaihtuahnate chu Krista Isuaah chuan a vênsak ang che u."_ tiin kan hmu.
I nun laimuah Isua a awm a ni tih hriat theihna kawng khat chu lungngaihna i nei tlem hi a ni. I lungngaih apiangin hei hi a entir, "Pathian ni lovin midang emaw thildang emaw kan nunah kan laltir" tih hi. Tu emaw i nunah i laltir chuan hahchawlhna i hmu tlem ang, a chhan chu i nunah a cham hlen dawn loh avangin. I innghahna kha a derthawng a ni tih hriatna chuan lungngaihna a thlen ṭhin.
Anih chuan tunge i nun laimuah i hman le? Bazar lian tak emaw, i tute emaw, i ngaihzawngte emaw, Isua ni lo thildang a nih chuan hahna tam tak i tawng ṭhin ang. Mahse i nun laimu Isua a nih chuan hahdamna i hmu ang.
I kutah duhthlanna a awm: I nun laimuah Pathian i hmang dawn nge mahniah i innghat dawn? Vawiin hian duhthlang rawh le.
Ngaihtuah zui atan.
Engnge i ngaihtuah nasat ber? Chu chuan i nuna i ngaih pawimawh engnge a tihlan?
Engvangin nge i nun laimu a Isua i hman avangin harsatnate a rawn let leh chak zawk a i rin?
Pathian ngai pawimawh tlat nun i hmanin eng danglamna nge i nunah miten na hmuh ang?
*Vawiin hian Isua i zui dawn em?*
A Fapa Isua Krista hmangin Pathianin a ṭhatzia a lantir a. Bible chuan, _"Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan."_ tiin mi hrilh (Johana 3:16)
Chatuan nun min tiam tihhlawhtlin nan Pathian ring turin i inpeih em? I inpeih chuan heti hian ṭawngṭai rawh le: "Lalpa, Isua Krista hi i Fapa a ni tih ka ring a. Ka sual te puangin i ngaihdamna ka dil a che. ka sualte lak bona turin ka tan Isua a thi a nangin i kai tho leh a ni tih ka ring a. Isua hi ka Lal leh Chhandamtua pawmin vawiin aṭang hian a hnung zui ka duh e. Min hruai la i duhzawnga nung turin min pui ang che. Isua hmingin, Amen."
Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia,
[Lettu: Mapuia Fanai]

No comments:
Post a Comment