Friday, March 24, 2023

LEI REM RAP TURA RAHBI HMASA BER

 _Lei Rem Rap Turin_ 

By Rick Warren

March 23, 2023


“ _Hmânlai thilah innghat suh u_ ,

 _Tûn hma thil kha ngaihtuah suh u_ ;

 _Thil thar ka tih tûr hi thlîr zâwk rawh u_ ,

 _A lo thleng ṭêp tawh e, in hmu lâwm ni?_ 

 _Thlalêrah kawng ka sial ang a_ ,

 _Ram rovah chuan luipui ka luantîr ang_ .” [Isaia 43:18-19] 


Hun liam tain a hrin i ni. I nuna thil ṭha leh ṭha lo chi hrang hrangte chuan an hrual che a. Mahse hun kal tawhin a sal beh theih che chu i ni chuang lo – i zalen thei! 


Chu chu Kristianna kan tih chu a ni ta ber mai. Isua Krista kaltlangin i piangthar theiin nun thar i ṭan leh thei a. Isua chuan hun ṭha dang pe tur chein i nun siamṭhat leh theihna hmehkhep [button] chu a chhawp che. 


Hengte hi Pathianin i hun liam tawh chungchang a sawi dan a ni: 

“Hmânlai thilah innghat suh u,

Tûn hma thil kha ngaihtuah suh u;

Thil thar ka tih tûr hi thlîr zâwk rawh u,

A lo thleng ṭêp tawh e, in hmu lâwm ni?

Thlalêrah kawng ka sial ang a,

Ram rovah chuan luipui ka luantîr ang.”


Pathian chuan hun liam tawh thlir ngar ngar turin a duh lo che. Lirthei i khalh changin, a hnung lam enna darthlalang chu i bih ngar ngar chuan i chesual ngei ngei ang! Hmalam i pan theih dan kawng awm chhun chu i hun hman mek ngaihtuahin i hmalam hun thlir ang che. 


I nun hmabak zawng chu hun lo la awm turah a innghat hun kal tawhah ni lovin. Hun liam tawh chu a liam tawh a ni mai; a zo tawh. I thlak thei lo, chuvangin chu hmunah chuan cheng suh. Chu aiah chuan, Pathian chu i nunah thil thar ti turin dil ang che. 


I nunah khan thil thar engmah a thleng lo angin i ngai mai thei. Eng vang nge i hre mai em? A chhan chu i dil lo a ni. Jakoba 4: 2 chuan hetiangin a sawi, “ _Pathian hnênah in thlen loh avângin in duhzâwng chu in nei lo va_ ,” tiin. Chu thuin eng nge a sawi han ennawn teh: I neih lo chhan chu i dil loh vang a ni. 


I nun siamṭha tura Pathian i la dawr ngai lo a nih chuan, i sawi tur zawng chu hei hi a ni, “Lalpa, a thara bul ṭan ka mamawh e. Ka tichhe zova. Thil ka tisual a, ka nun hi min siamthar leh ka mamawh e,” tiin. 


Hei hi a rahbi hmasa ber chu a ni. Pathian hnenah i dil a ngai. 


Mi zawng zawngin an nun siamthat an mamawh hun a awm- a chhan chu nun hi a harsa a, kan zavaiin thil kan tisual vek. I nuna Pathianin thil thar a tih chu dawng turin i inpeih tawh em? Nun thar ṭan dil rawh, tichuan a ni chuan i chakna a siamthar ang a, i thlarau a dinthar ang a, beiseina leh thinlung a dinthar bawk ang. 


Ngaihtuah zui atan. 


Hun liam tawh thlir lova hmalam hun i en ngar ngar theih nan eng thil hrisel nge i nunpui ang? 


I nun kal zelah khan Pathian chu i nun siamthar leh turin vawi engzat nge i dil thei nia i inhriat? 


 *I nunah khan eng emaw chuan i nun siamthar a hun tawh tih a lo hrilh che em?* 


Pathian chuan a chhungte zinga mi atan a duh che


Pathian chuan amah hmangaih turin a siam che a, chu chu i hmuh chianna ber chu kraws a ni. Isua thihna leh thawhlehnaah chuan, chatuan atana a chhungte zinga mi ni turin Pathian chuan hna a thawk. Eng ang thil pawh lo ti tawhin, khawi hmunah pawh lo awm tawh la, Pathuan chatuan chhungte zingah chuan chanvo neiin an lo nghak mek che. Sawmna chu zau taka hawn a ni. Ring la chang mai rawh.  


I inpeih tawh em? He ṭawngṭaina hmang hian bul i ṭan thei ang: “Lalpa duhtak, ka thih hun chuan keimah chanchin ngei hi ka lo sawi dawn a ni tih ka hria a. I lakah thil ka tisual a ni tih ka hria a, ka duh dan anga nungin, i duh dan nilo zawnin ka nung ṭhin. Tun aṭang ngei hian chu chu thlak danglam ka duh e. Ka sual kalsan a, i lam lo pan ka duh e. 


“Ka sual zawng zawng aia Isua thi tura i rawn tirh avang khan hremna ka pumpelh ta a, lawmthu ka rawn sawi e. I ngaihdamna chu ka phu lo tih ka pawm a. I khawngaihna chauh chuan min chhandam thei tih ka hria e, Lalpa. Hmun famkima lut tur chuan ka ṭha tawk ngai dawn lo tih pawh ka hria. 


“Isu, min hmangaih em avangin ka sualte i phur a, lawmthu ka hrilh a che. Vanram kai tlaka min siam a, min chhandam turin i khawngaihna ka rawn ngen e. Ka ring che, Isu. I thutiam ang takin min chhandam nghal dawn tih ka hria, chiang takin, ka pumin, chatuan atan. Isua hmingin ka dil e. Amen.”


Isua hminga i ṭawngṭai zo chiah a nih chuan, he email Rick@PastorRich.com ah hian min lo hriattir ang che. Isua nena in zin kawng atana thuziak pawimawh a thlawna lo thawn che ka duh e. 


[ *Lettu* : Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...