Thursday, March 23, 2023

I NATNA CHU LAWMNA THUCHAHAH CHANTIR RAWH

 _Tawrhna I Hmachhawn Laiin_ 

 _Pathian Khawiah Nge?_ 

By Rick Warren

March 23, 2023


“ _Kan tih apiangah Pathian rawngbâwltute ni âwm rêngin mi mit tlungin kan awm zâwk ṭhîn. Tihduhdahna te, hrehawm te, nêkchêp te chhel takin kan tuar a_ .” [II Korinth 6:4]

Khawvel hian hnehna kan chante hi ngaisangin kan hlawhtlinna kan chen dante hi lawm takin a thlir dawn emaw kan ti fo. Mahse, a nihna takah chuan ringtu kan nihna anga buaina kan hmachhawn dan hi an bengkhawn zawk daih.  

Taksa natna i tuar lai chuan ring lo mite chuan an hual tuau tuau che a. An natna tuar ang tho i tuar lai chuan ringtu nih awmzia chu eng nge ni tiin an inzawt a ni. I lan dan a danglam em? 

Thudik chu hei hi a ni, mi dang zawng zawng ang chiahin natna kan tuar ṭheuh. An neih ang ni lo hahdamna kan nei mai chauh a ni. 

I hlawhtlinna chuan mi rintlak nihna a pe lo che. I tuarna zawk chuan mi rintlakah a chher che. I nuna natna leh tuarna i hmachhawnte engtianga rinawmin nge i tuar chhuah tih azir chuan mite nun i khawih ve thung ang.  

Tirhkoh Paula khan a nuna tuarna kha a thuchahah awmze neia hman dan a thiam hle. II Korinth 6:4-ah chuan hetiang hian kan hmu, “ _Kan tih apiangah Pathian rawngbâwltute ni âwm rêngin mi mit tlungin kan awm zâwk ṭhîn. Tihduhdahna te, hrehawm te, nêkchêp te chhel takin kan tuar a_ ,” tiin. [II Korinth 6:4]

I nuna thuchah ril ber berte chu i natna ril ber ber aṭanga lo chhuak an ni ang. Khawvel hian ringtu mi famkim emaw ringtu engkim nei a mamawh hran lo. A mamawh chu mi tak leh dik tak a mamawh a ni. Ringtu natna hmuna dawhthei, tuarna hmuna rinawm taka ke pen thei chu a mamawh a ni. 

I nun khawi lai pawh natna i hmachhawn tawhna chu lawmna thuchah puanna atan i hmang thei ang. Pathian chuan leiba tam tak kalsan turin a ṭanpui tawh che em? A na khawp ang – mahse lawmna thuchah a pai thung ang. Pathian chuan natna benvawn dawhthei taka tuar turin a ṭanpui che em? Khawi hmun pawh natna i tuarna leh Pathian ṭanpuina i paltlangna apiang chu lawmna thuchah puanna a ni thei.   

I natna chu khawhral mai lo turin ka ngen a che; I natna chu a lo thlawnin liamtir suh. I khawsakpuite khan i paltlang tawh kawng kha an zawh mek a ni thei a, i ṭanpuina an mamawh a ni thei. I thlamuanna an mamawh ang. 

Pathian hmangaihna tarlangtu ropui ber chu Isua nun famkim, a thuchah, a thilmak tih emaw a thawnthu sawite kha an ni lo. A tuarna kha an ni daih. 

Tuarna hmuna i rinawm tlatna kha Pathian chuan midang nuna malsawmna thlentu a nihtir thei. Dik tak chuan, tuarna hmuna i rinawmna chu thuhretu rinawm a nihtir thei daih che!

Ngaihtuah zui atan. 

I nuna i lo paltlang tawhah eng thil pathumte nge la na ber nia i hriat? 

Thil hrehawm i lo paltlang tawh zingah eng zirlai pawimawh tak tak pathum nge i zir chhuah tawh? 

Eng laiah nge ringtu leh ring lo mi chu kawng thumin tuarna hmunah an danglam? 

 *Isua chu vawiin hian i zui thei ang em?* 

Bible chuan Pathian, a Fapa Isua Krista kaltlang chauh chuan vanram i kai thei a ni tih a sawi: 

Nangmah chuan vanram i kai thei lo: “ _Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni_ ,” tiin. [Ephesi 2: 8-9]

“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.

“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamnatu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu* : Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...