_Lei Rem Rap Turin_
- March 26, 2023
"Pakhat tâna hneh loh chu pahnih tân hneh theih a ni. Hrui thum hrualkawp chu a chat mai mai lo." (Thuhriltu 4:12)
I nun kha Pathianin a siamṭhat i duh chuan i dil mai tur a ni. Tichuan, i insiamṭhatna thlâwptu tur che mi i zawng bawk tur a ni.
Nun thlak danglam hlawk tur khawp thil lian tham chu nangmahin i ti thei lo. Thei la chuan i ti ngei ang. Mahse, i thei lo; chuvang chuan, i ti lovang. A chhan chu Pathianin min thlunzawm vek a, kan nuna midang kan teltîr ve hma loh chuan kan damin kan famkim thei lo.
Pathian thu chuan Thuhriltu 4:10 - 12 ah, _"Pakhat a tlûkin pakhatin a kaitho thei si a. Mahni chauhva awm chu mi vanduai a ni, a tlûkin kaithotu tur a nei dawn si lo va. Pahnih chu mutnaah pawh an innghêng lum thei a; mahni chauhin engtinnge a intihlum theih ang? Pakhat tâna hneh loh chu pahnih tân hneh theih a ni. Hrui thum hrualkawp chu a chat mai mai lo"_ tiin min hrilh.
Chutiang bawkin, midang thlâwpna i neih chuan awlsam taka hneh i ni ngai lovang. Thlâwptu tam tak neih phei chu a ṭha hlei hlei a ni.
I nuna thlak danglam i neih apiangin tihsual i nei ṭhin ang. I famkim lova - tumah hi kan famkim lo. Tum nei rana nun hman i duhna leh Pathianin a duh ang che a nun hman i tum veleh i tlu ang. I nunah midang nangmah thlâwp tlattu che leh hmangaih theitu che i mamawh a ni.
Khawtlang hi tihnualtu tur che dodâl tura Pathian damdawi a ni. I ṭhian tlemte emaw i Kristian ṭhian tlemte te khan thlirna dik i neih theih nan an pui ang che. I hmuh thei loh kha an hmu thei a. Pathian thudik chu an hriat nawntir thei che.
Rom 12:5 chuan, _"Chutiang bawkin keini pawh tam tak ni mah ila, Kristaah chuan taksa pumkhat kan ni a: a mal mala inpêng tawn ṭheuh kan ni"_ a ti. Pathian chhungkuaah chuan, ka ta i ni a, i ta ka ni. I Kohhran leh i Kristianpuite kha i unaunu leh unaupa te an ni. Pathian a i chhungkua chu i thisen zawmpui chhungkuate aiin an daih rei zawk ang. - chatuan daih a ni ang.
Pathianin i nun a thlak danglam mek laiin i ringtu puite fuihna i mamawh dawn. I lamṭang zawng rawh. Huaisenna leh tuar theihna i mamawh, chung chu tunah tlachham a i in hriat chuan Pathian ṭanpuina dil rawh. Ti tura a tih apiang che chu hlen turin a pui zel ang che.
Ngaihtuah zui atan.
Kan ringtu puite hi midangte nena kan en dan nen a danglam tur niin i hria em? Engvangin?
Kan Kristian ṭhiante hi midangte aiin kan hmangaih dan leh en dan a danglam tur niin i hria em? Engvangin?
I nunah khawtlanga midangten hmun an chang lo ni a i hriat chuan i lo ngaihsak tawk loh vang pawh a ni thei. Heng kawngah hian Pathianin ruahmanna a lo siamsak tawh che chu zawt rawh.
[Lettu: Mapuia Fanai]

No comments:
Post a Comment