Pathian Thatna Hnuaia Nun Dan
-Rick Warren
Jan. 8, 2023
"Kartin ni 6 chhung chu engkim tihfel nan thawk la, mahse, a ni 7na erawh chu Lalpa i Pathian chawimawi nan chawl ang che" (Exo. 20:9-10 NCV)
Bible-ah chuan chawlh hahdamna ni chu 'Sabbath' tiin a sawi a. I hna thawhna hmun atanga chawlhna chu a ni a, i hna vawn lai atanga chawlh ringawt ni lovin, eng hna atang pawha chawlhna chu a ni.
Pathian chuan Sabbath chu ama hlawk nan a siam lova. I tan liau liaua a siam a ni. "Sabbath chu mihringte hlawkna leh chhawr tangkai tura siam a ni a, mihring erawh chu Sabbath tana siam a ni lo" (Marka 2:27 TLB). Pathian chuan Sabbath chu mihring tan a siam a, chuvangin i hahin i chau chhe tur a ni lo.
Nimahsela, mi tam tak chuan Sabbath an mamawhna chu hre lovin, an ngaihthah tlat a ni. Chutianga Pathian dan te chu i ngaihthah luih tlat chuan, tunge chauvin tuartu ni ang? A tuartu chu Pathian a ni lo. I chawlh hahdamna tur i ngaihthah tlat chuan, chauh ngawih ngawihna chauhvin a hmuak ang che.
Mahni kutke a ding tura rim taka hna thawkmi emaw, mahni inruai chawpa hna thawk nasa mi i nih chuan Sabbath a chawlh chu harsa i tiin, chawl tura hun hman chu i ui mai thei. Mahse, chutianga nangma tan ngeia Sabbath chu i hman tangkai si loh chuan, i chawl lai lawk ngai lovang.
Eng hna pawh thawkin, eng dinhmunah pawh awm la, karkhat chhunga i tana siam nikhat 'Sabbath' chu i hmang tur a ni. Nikhat lek chauh chu a pawimawh tak meuh a ni! Kar tluana hun hman dan tur i duan zingah, Sabbath hmang tura inbuatsaih chu i mamawh a ni.
*Enge Sabbath-ah chuan i tih ang?*
*(1) I taksa chawlh hahdam tir rawh:*
French Revolution-ah khan an sorkar hruaitute chuan chawlh hahdam ni atana Sunday-a chawlh an titawp a, mahse, ram puipuia cheng mipuite hriselna chuan a tuarin, an hnam pumin a tlukchhiat phah avangin a hnuah titawpin, an dan pangngai angin an kal tir leh a ni. "Ka chawlh chuan, in thiamloh ruk riauna ka nei" tiin i ngaihtuah mai thei e. Isua tih dan zuiin, zir ang che. Ani chuan Sabbath a nih anga hman chu inthiamloh rukna a nei lova, Sabbath chu a nih anga hmangin, a tihtur hmasaah a dah mai a ni.
*(2) I phurna te chu tuar thar leh ang che:*
Nangmaha phurna leh thathona awm chu ngawi renga i awm theihna hmun, hmun fianrial atang te chuan i siam thar thei a, chutiang a nih loh pawhin midangte nen hun hmangin i intichak thar theiin, i phurin thatho em em thei a ni.
*(3) I thlarau chu ngaihtuah nawn thar leh ang che:*
Pathian chibai bukna (worship) chu i thlir velnaah tel tir rawh. Chumiah chuan biak ina Pathian chibai buk leh chawimawina telin, amah nen chauhva hun hman te a tel tur a ni. Pathian thupek anga Sabbath hmang tura thuawih taka i chet chhuah chuan, enge lo thleng ang? Chutianga hun tam zawka hmanna chu i chakin, i lo duh fo ngei ang. "Taksa leh rilru chawlh hahdamna chu mihringte nun tiseitu a ni a, itsikna erawh chu ruh mawihna a ni" (Thufingte 14:30, TLB)
Hei hi hrereng thin ang che. Mi tuemaw hnenah engemaw fiah tur i nei lova. Pathian laka i hlutna fiahna tur i nei hek lo, a chhan chu a lakah i hluin, i pawimawh em em tawh zawk a ni.
Sabbath chu hmang la, tichuan Pathian thatna leh ngilneihnaah chuan chawl hahdam ang che, ani chuan a hmangaih che asin.
*Ngaihtuah zui teh!*
Kartin maiin darkar 168 i nei a. Kar tluana i hun hman ral dan te leh danglam te chu ngun takin ziak chhuak la ( _hna thawh hun, mut hun, chawei hun, motor khalh hun, i taksa sawizawi hun, thlarau lam thila i inhman hun/kohhran inkhawl leh comtt hun, chhungkuaa hun i hman hun, nuam i tihzawnga hun i hman hun_, etc) chung tih nana darkar 168 i hman dan chu han belhkhawm teh le.
Chutianga i tih chuan kar tluana i hun hman ral dan te i hre thei ang. Kartin darkar engzat nge hna i thawh? Darkar engzat nge hna thawh nan i mamawh ang? Chutianga hun hman ral nan chuan a tam lutuk nge, a tlem lutuk deuh?
Engtikah nge Sabbath-a chawl turin, i hun chu i han siam fel ang le? [CT]

No comments:
Post a Comment