Saturday, January 7, 2023

I THILTIHTE KHAN IHLUTNA AN TIFIAHLEM LO

 _Pathian Thatna Hnuaia Nun Dan_

Rick Warren

January 7, 2023



"Hmeichhiain a fapa, a rila rah chu, khawngaih lohna tûrin a nau a hnute hne lai chu a theihnghilh thei êm ni? Thei e, chungte chuan an theihnghilh a ni thei e, nimahsela kei chuan ka theihnghilh lo vang che. En teh, ka kutphahahte hian ka ziak che hi" Isaia 49:15-16


Thawhrimnaah talbuai em ema i inhmu a nih chuan Pathian laka i hlut dân hi hrechhuak thin ang che.


Hei hi i thiltih, i eizawnna, i nihna a zira i hlutzawng inteh nen chuan a inperhsan hlauh a. Chin phung awmsa kalh zawng niin, i ngaihdanah pawh inthlakthleng hlauh a tul hial ang. A bik takin, "Tunge i nih tih i fiah hi a tul ve thin" titu aw te reuhte i hriat thinah tak khan.


Mi tam tak hahdam theih lohna chhan chu an hlutna leh an thiltih an hre hrang lo thin hi a ni. An hlutna pumpui chu an inngaihhlutna nen an ngaihpawlh a. An ngaihdan chuan, "Ka thawhrim em em a, ka hlawhtlin chuan, hlutna ka nei a ni. Thawhchhuah ka neih loh chuan hlutna ka nei lo" tih a ni a. Dawt a ni! Khawtlang mite nunah chuan, kan nihna hi kan hnathawhah a innghat thui hle a. Chuvangin thawhrimna hi mahni hlutna infiahna angah an ngai thin. Kan hlenchhuah a tam poh leh, kan hlutna a tam niin kan ngai thin a ni.


Mahse, i pawimawhna hi i hna emaw, eizawnna emaw, i thil hlenchhuahte nen inzawmna a nei hauh lo.


I hlutna hi i fiah kher a ngai lova. Pathian chuan i hlu em em a ni a ti. Tuna i nihna bak khan Pathian lakah i hlu thei chuang lova, tuna i nihna bak khan Pathian lakah i hlu lo thei chuang hek lo.


Eng tiang taka hlu maw i lo nih? Vana i Pa chuan a siam che a; Isua i tan a thi bawk a. Krista zuitu i nih chuan, Thlarau Thianghlim chu nangmahah a nung bawk a ni.


Tum leh chhan nei lovin Pathianin engmah a siam ngai lo. I la nun nachhan chu, Pathianin a hmangaih che a, nung turin a la duh vang che a ni. Hlut tawp lovin i hlu a, kutchhuak ropui tak i ni.


Eng nge i tih lam ni lovin, tu ta nge i nih tihah i hlutna chu a innghat a ni.


Pathian hian a taksaah nangmah kha a chhu kuau mai che tih i hria em? Isaia 49:15-16na chuan, "Hmeichhiain a fapa, a rila rah chu, khawngaih lohna tûrin a nau a hnute hne lai chu a theihnghilh thei êm ni? Thei e, chungte chuan an theihnghilh a ni thei e, nimahsela kei chuan ka theihnghilh lo vang che. En teh, ka kutphahahte hian ka ziak che hi" a ti a ni.


I famkim em? Teuh lo mai. I kehchhia em? Tehreng mai. Misual i ni em? Tehreng mai. Hlut tawp lova hlu i ni em? Ni chiang e a. Nasa taka Pathianin a hmangaih chu i ni.


I hlutna chu Krawsah a tifiah daih tawh zawk a ni.


Ngaihtuah zui atan...


Tu lakah nge i hlutna tihfiah i tum thin? Eng vangin nge?


Pathianin a ngaihhlutzia che i hriatna chuan engtin nge a tih hahdam che?


I hnathawh tawhnaah mi dang tihlawm tum lo khan, Pathian tihlawm tum chunga lo thawk kha ni ta zawk la, eng nge ang zawk daiha i ngaih le?


(Lettu: Msa)

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...