Friday, January 6, 2023

CHAWLH DUH LOH CHU PUITLIN LOHNA A NI

 Pathian ṭhatna hnuaia nun dan

By Rick Warren

January 06, 2023


“Ei tûr zawnga zîng tak taka thawha, Tlai tak taka mut hi a hahthlâk thlâwn a ni. LALPAN a hmangaihte chu Malsâwmna a pe mai ṭhîn a ni.” [Sam 127:2]

Saddleback Kohhran bul kan ṭan lai khan ni khatah darkar18 te ka thawk ṭhin. Ka inah chuan kohhran mipui kar khatah ni hnih kan lo dawl zat zat a. A kum hmasa Pathian ni tawp berah chuan thusawi turin ka ding a – ka tlu hnawk mai a. Ka taksa, thlarau leh mite nena inlaichinna chu a chau tawng khawng a ni. 

A kum lehah chuan, Pathian chuan inbuktawka nun dan min zirtir ta a – chu zirlai chu ka zir nawn fo a ṭul hial a ni. Hei hi ka thil zir chhuah chu a ni: Chawlh duh loh chu puitlin lohna a ni tih hi. Hei hi ngaihtuah ila, Rom khu ni khata sak zawh a ni mai lo, kohhran emaw thil dang ropui tak takte pawh chutiang tho chu an ni. 

Bible chuan Sam 127: 2-ah chuan hetiang hian kan hmu: “Ei tûr zawnga zîng tak taka thawha, Tlai tak taka mut hi a hahthlâk thlâwn a ni. LALPAN a hmangaihte chu Malsâwmna a pe mai ṭhîn a ni,” tiin. 

Pathian chuan thil engkim vawi lehkhata zo duak turin a beisei lo che. I nitin nuna lo chhuak apiang lo hma chhawna kal bek bek tur leh puitlinna kawng zawh hret hret turin a duh che. Pathian chuan i hna a tihhmasawn mek lai chuan nangmah pawh a tipuitling zel bawk che a ni. Pathianin i fate a ṭhanlentir hret hret rualin nang pawh a tipuitling zel che. Pathianin i hna a tihphuisui ang zelin nangmah pawh a sawhnghet che a. Chutianga ṭhang zel tur chuan Pathian ṭhatnaa chawlh hahdam i zir zel pawh a ngai a ni. 

Mi ṭhenkhat chuan rim taka hna an thawh changte, an ṭawngṭai lai leh “thlarau” lam thil an buaipui chang chauhin an chungah Pathian lawm turin an ngai tlat. Mahse, Pathian chu i chawlh hahdam mai lai pawhin a lo nui ver ver zel. 

Fa nei tawh i nih chuan i fate an mut laiin an pindanah lutin an awm dan enfiahin i kal ṭhin ngei ang, chutiang hunah chuan an lo mu siai siai tih hmuh mai chuan hlimna nasa tak a pe ṭhin ang che. I Pa vana mi chuan i mut lai leh hahdam lai chuan hmuhnawm ti takin a lo thlir ṭhin che. Chawl hahdam mamawh tura siam i ni a. Pathian pawh a chawl a ni! Pathian aiin i buai em? 

Exodus 31: 17 ah chuan hetiang hian kan hmu, “Kei leh Israel fate, kan inkâra thuthlung chhinchhiahna a ni ang; kei Lalpa hian ni ruk chhûngin lei leh vân ka siam zo va, a ni sarih ni chuan hna ka bânsan a, ka châwl a ni,” tiin. 

Eng vangin nge Pathian kha ni sarih niah a hna thawh bansanin a chawlh? A hah vang a ni mai lo, a chhan pawh Pathian a hah ngai lo. I awm dan tura a duh angin amah kha a khawsa a ni: I hna chawlhsanin hahdam rawh, Chawlhni serh la, Pathian ṭhatnaah chuan chawl rawh. 

Ngaihtuah zui atan. 

Eng vangin nge in in, school leh hnathawhnaah hleihluak taka hna i thawh ṭhin? 

Engtin nge i nunah khan mahni inthununna chungchangah ramri i kham theih ang? 

I nitin hun hman danah chuan pawimawh hmasa i thur chhuah danah thlaraua ṭhan len dan kawng a awm em? 

[ *Lettu* : Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...