_Ngai ru! Chanchin tha ber chu_
Rick Warren
24.12.2022
Tlanna chu miin i sual man an pek a, thiam changa i chhuahna hi a ni a. I ai an inpe a, i tawrh tur an tuar a. I tihsual zawng zawng rah chu mi dangin an seng a ni.
Chu chu Isuan i tana a tih chu a ni. Isua kha Krismas nî atan chauh a lo kal lo va. Nun tha famkima nungin, Pathian rorelna hmaah lungawithlak khawpa a awm theih nan a awm a ni. I sual man zawng zawng chu Krossah a pe vek a ni.
Jordan luiah khan tum khat chu Johana baptis turin Isua kha a lo kal a. Johana khan a lo hmuh chuan, “En teh u, Pathian Beram No, khawvel sual kalpuitu tur saw!"(John 1:29) tiin a puang a.
Juda mi tawh phawt chuan he chang awmzia hi an hrethiam a ni. Juda rin danah chuan, kum khat chhungin vawi khat, beram no hmelhem lo, tha famkim chu Kalhlen kutah an hlan thin a, chu chuan khawvel tlanna a entir a ni.
Kan sual vanga Krossa a thih hnu khan, entirna mai atana inthawina hlan a tul ta lova. Mahse Isua thihna leh thawhlehna hma zawng chuan, mite sual man atana hlan tur beram chu hmelhem lo a ni ngei tur a ni. Mite nun famkim lohna atan nun tha famkim ngei kha a tul a. Chuvang chuan a ni, Isua, Pathian beram no khan a thihna hmangin kan sual chungchangah Pathian a tih lawm theih ni.
Sakhaw hruaitu, khenbehtir duh em emtu ten Pilata hmaah Isua an rawn hruai khan, ram awptu chuan Isua kha kawmin, a fel lohna a hriat loh thu a puang a, "Tin, Pilatan puithiam lalte, hotute, mi zawng zawngte a ko khawm a,
an hnenah, " ‘Mite a tikhawlo,’ tiin he mi hi ka hnenah in rawn hruai kha a ni a; tin, ngai rawh u, in hmaah ka chhuahchhal a, in hekna thu-ah khan he mi chungah hian engmah sual ka hmu lo a ni" (Lk 23:13-14) tiin.
Isuaah khan Pilata'n sualna a hmu lova. Hremna êm tur khawpin Isuaah khan sualna leh tihsual a hmu lo a ni.
I nunah Isua Krista lal tura i lo pawm tawh chuan, amahah chuan eng nge dik lohna i hmuh le? Eng chhuanlam hmangin nge i lo hnial thin? I Chhandamtu ni lo turin eng hmangin nge i lo hnawl?
Pilata khan mipuite kha Isua laka an tih dan tur a thlantir a. Rom sipaite khan an nghaisak hrep hnu khan, "Tin, Isua chu hling lukhum leh puan sen duk chu sin chungin a lo chhuak a. Tin, Pilatan an hnenah, “En teh u, mihringa hi!” a ti a (John 19:5).
Isua hunlaia mite kha "En teh u mihringa hi" tia an sawm ang khan, Pathian chuan Isua, i tih sual tawh zawng zawng leh la tih leh tur zawng zawng man pe tu en turin a sawm che a ni.
Krismas hian thu lawmawm em em a keng tel a- duhthlanna: Isua hi engtin nge i tih dawn tih a pe che a ni.
Ngaihtuah zui atan...
I nun pumpuiah Isua hian lalna chang turin dikna neiin i hria em? Eng vang nge?
Krismas hian Isua pianna a kawh rualin, khenbeh a nihna leh a thawhlehna a entir tel a. Krismas hunah chung hriat tel chu eng nge a pawimawhna?
Tu hnenah nge he chanchin tha ber hi tun karah i hrilh anga, krismas awmze nei berah i chantir theih ang?
*Isua lakah eng duhthlanna nge i siam le?*
Bible chuan, "Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e" (Eph 2:8-9) a ti a.
Krismas hian duhthlanna a pe che a. Isua kaltlanga Pathian chhandamna a pek che hi i pawm dawn nge dawn lo le?
(Lettu: Msa)

No comments:
Post a Comment