Ngai ru, chanchin ṭha ber chu_
- Rick Warren
- December 25, 2022
"Nangni chuan hlau suh u. Isua, an khenbeha kha, in zawng tih ka hria e. Hetah a awm tawh lo ve; a sawi ang ngeiin a thawhleh tawh kha. A mutna hmun hi rawn en teh mah u. Tin, kal thuai ula, a zirtirte hnenah, ‘Mitthi zing ata a tho leh ta a ni; ngai teh u, Galili ramah in hmaah a kal e; chutah chuan amah chu in hmu ang,’ tiin hrilh rawh u." (Matthaia 28:5-7)
Isua kha lo tho leh ta lo se tumahin krismas an lawm hauh lovang. Engvangin maw? A chhan chu Isua kha dawt sawi hmang leh a lem a ni dawn tihna a ni tlat.
Mi tam takin Isua Pathianna an zawng a, amah ngeiin a ni tih a lantir. Thihna hnehin a tho leh a ni.
Isua thawhlehna kha hun kal tawha thil thleng pawimawh ber a ni - a pawimawh em avangin thil thleng dang pawh khami aṭanga chhut chu a ni. Krismas aiin a pawimawh a; thawhlehna tel lo chuan krismas hi engmah lo mai a ni ang.
A thawhleh tukah khan hmeichhe ṭhenkhat, Isua hmangaihtute kha a thlanah rimtui hnawih tumin an lokal a. Isua thlan kawngka kha lung lian tak maiin an khar a. Van aṭanga vantirhkoh a lo chhuh ve leh lir a lo nghing a. Lung chu lum sawnin a chungah chuan a ṭhu a, hmeichheho hnenah chuan heti hian a sawi a, _"Nangni chuan hlau suh u. Isua, an khenbeha kha, in zawng tih ka hria e. Hetah a awm tawh lo ve; a sawi ang ngeiin a thawhleh tawh kha. A mutna hmun hi rawn en teh mah u. Tin, kal thuai ula, a zirtirte hnenah, ‘Mitthi zing ata a tho leh ta a ni; ngai teh u, Galili ramah in hmaah a kal e; chutah chuan amah chu in hmu ang,’ tiin hrilh rawh u. Ngai teh u, ka hrilh tawh che u hi," a ti a. Tin, hlau leh lawm em em chungin thlan atang chuan an kal thuai thuai a, a zirtirte hrilh turin an tlan ta a._
_"Tin, ngai teh, Isuan anni chu a tawk a, "Chibai u," a ti a. Tichuan anni chuan a kephahte chu an va vuan a, chibai an buk a. Tin, Isuan an hnenah, "Hlau suh u, kal ta ula, Galili rama kal turin ka unaute va hrilh rawh u; chutah chuan mi hmu ang," a ti a."_ (Matthaia 28:5-10)
A thawh leh hnu khan Isua kha vanah a lawn leh nghal mai lo va. Ni 40 chhung chu mite hmaah inlanin an zingah a eiin a in ṭhin. Mi 500 lai hmaah thuchah a sawi bawk!
Ni 40 hnuah, vana a lawn hmain thupek hnuhnung ber heti hian a pe ta a, _"Chutichuan kal ula, hnam tina mi zirtirahte siam ula, Pa leh Fapa leh Thlarau Thianghlim hmingah chuan baptis ula, thu ka pek zawng zawng che u pawm turin zirtir rawh u. Tin, ngai teh u, kei kumkhuain, khawvel tawp thleng pawhin, inhnenah ka awm zel ang."_ (Matthaia 28:19-20)
Pathian chu _Emmanuel,_ kan hnena Pathian awm a nih tlat avangin krismas niah he leiah a rawn chhuk a. Vawiin thlengin kan hnenah a la awm mek a ni.
A pianna, thihna leh thawhlehna hmangin Isuan eng ang taka nasain nge a hmangaih che tih a lantir. Vawiin hian engpawh paltlang mek mahla i hnena awm reng a tiam che a ni. Malin i awm lo ve.
Chu chu a ni, chanchin ṭha ber mai chu!
Ngaihtuah zui atan.
Engvangin nge Isua chu Emmanuel, kan hnena Pathian awm tih hi a mak em em?
Eng ang chiahin nge Isua thupek hnuhnung ber, kal ula chanchin ṭha hi hril rawh u a tih hi i zawm?
Eng kawngtein nge thawhlehna beiseina i hriat thar fo theihna turin krismas niah hian i incheimawi ang?
*Emmanuela tan i thinlung i hawng tawh ngai em?*
Isua chu Emmanuel, kan hnena Pathian awm a ni a. Mahse i nunah tihluihnain a lo lut lovang. Ani chu i lal leh chhandamtu atana i thlan a ngai. Chutiang tura i inpeih a nih chuan heti hian ṭawngṭai rawh le:
"Lalpa, ka thinlung kawngka i rawn kik tih ka hria a, i tan hawn pawh ka duh bawk a ni. I hmaah ka sual tih ka puang a, i mi ngaihdamna leh zahngaihna ka dil a che. Min hmangaih em avangin ngaihdam ka nih theih nan ka sual tana thi turin Isua i rawn tirh avangin ka lawm e.
"Isu, tupawh nangmah ring apiang chu an boral lo anga chatuanin i kiangah vanramah an cheng ang tih min tiam a. Ka lal leh chhandamtuah ka pawm a che. Ka thinlung chhungrilah rawn lut la ka damchhunga i rawngbawl ka duh e. Amen."_
Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.
[Lettu: Mapuia Fanai]

No comments:
Post a Comment