_Ngai ru, Chanchin ṭha ber chu
- Rick Warren
- December 26, 2022
“Ngai teh, kawngkhar bula dingin ka kik hi; tupawhin ka aw hriaa kawng a hawn chuan a hnenah ka lut ang a, a hnenah zanriah ka ei ang a, ani pawhin ka hnenah a ei bawk ang." (Thupuan 3:20)
Krismas-ah hian engnge Lal Isua i pek dawn?
A piancham a ni a. I nuna mi pawimawhte chu thilpek i pe ṭhin a. Piancham lawmnaah kal ta la, a piancham in lawmsak tih loh midang zawng kha thilpek pe turin han in ngaihtuah chhin teh?
Engkim neitu chu engnge ka pek ang? i ti a ni mai thei. He krismas-ah hian duh pakhat chauh a nei a chu chu nangmah kha i ni.
I pe a nih zet loh chuan Pathianin i nun a nei thei lova. I ring a nih zet loh chuan i rinna a nei thei lo. I pe a nih zet loh chuan i hmangaihna te, i inpekna te, i chawimawina te, leh i thuawihna te a nei ngawt thei lo. Duhthlan tur a pe che - i thlan kher a duh avangin.
Isuan i hnen aṭanga thilpek dawn a duh chhun kha i pek loh chuan Krismas pawh i lawm chhunzawm tawh lo mai thei. Amah i rin leh i hmangaih hi Pathianin a duh a ni.
Pathianin hmangaih loh lai che a nei miah lo tih hi i hria em? I pian hma pawhin Pathianin a lo hmangaih daih tawh che asin! Heti hian i hnenah a sawi angin han ngaihtuah chhin teh: "Ka tan hian i hlu asin. Ka hmangaih che a. I nunkawng tinreng ka thlir ṭhin. Ka siam che a, nang nena inzawmna ṭha tak neih ka duh. Chuvangin alawm leiah ka lokal - thil zawng zawng tlan turin, nang ngei tiamin, tichuan ka chhungkuaah i tel thei ang."
Bible chuan heti hian min hrilh, _“Ngai teh, kawngkhar bula dingin ka kik hi; tupawhin ka aw hriaa kawng a hawn chuan a hnenah ka lut ang a, a hnenah zanriah ka ei ang a, ani pawhin ka hnenah a ei bawk ang."_ (Thupuan 3:20). Vawiin hian Pathian nen inzawmna nun i nei thei. Sakhuana lam ka sawi lo; Pathian nena inzawmna a ni ka sawi zawk ni.
Sakhuana atan siam i ni lo; Isua kha sakhaw tan a thi miah lo. A hmangaih avang che a thi a ni zawk. Vanramah a hnena i awm a duh a. I chhandamtu ni turin a lokal a ni.
Luka 2:11-ah chuan, _"Vawiinah in tan Davida khuaah chhandamtu a piang ta, Lal Krista chu" tiin kan hmu. Chhandamtu mamawh lo ni ta la, Krismas hi a awm lo ang.
Tun Krismasah hian Isua hi i hnawlin i thlang thei bawk. I ring thei a, i hawisan thei bawk. I pawm thei a, i phatsan thei bawk..
Tun Krismasah hian i nun Isua tan hlan rawh. Chu chu Isuan thilpek a dawn duh chhun a ni.
Ngaihtuah zui atan.
"Kawngkaa dingin kan kik hi" ti a a sawi hian eng angin nge miten Pathian aw an hriat a i rin?
Isua zuitu i nih chuan Pathian nena in inpawlna khan i tan engnge awmzia a neih?
He khawvela Isua lokal chhan tak i hriat theih nan engtinnge krismas i hman dan i thlak danglam a ṭul?
*Pathianin kawngka a kik reng a, tunah hian i chhang thei a ni*
Isua Krista tan i nun i la pe lo a nih chuan vawiin hian he ṭawngṭaina hmang hian ke i pen thei ang: "Lalpa, ka hriatchian theih nan che leh i khawngaihna leh thutak ka hmuh fiah theih nana he leia mihring anga i lo pian avangin ka lawm e. Isu, nun famkim i hman avang leh i thihnain ka sualna man zawng a pek avangin ka lawm e. Thihna hneh tur leh leh kumkhuain i kiangah ka chen theihna tura thu min tiam tura thihna hneha i tho leh tih ka ring e.
"I tum i la zo lo tih leh engtik niah emaw i lokal leh dawn a ni tih ka ring e. Vawiin hian ka nun kawngka bulah dingin kawng i kik a ni tih ka ring e. Thuawihna nen chhangin i hnena ka nun hlan ka duh e. Ka nuna lal atan leh ka Lal leh Chhandamtua pawm che ka duh. Ka sual i hmaah ka puang a, i hmangaihna, chenchilhna leh muannaa min chhung khat turin ka duh che. I hnung ka zui lai hian ka nuna i thiltum hlen tur chein ka duh a, nangmah an zel che ka duh a ni. Isua hmingin, Amen."
Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.
[Lettu: Mapuia Fanai]

No comments:
Post a Comment