Tuesday, November 8, 2022

HARSATNA THLIPUI KARA DIN NGHEH DAN

 Nun duhawm zawk nei tura inbuatsaih dan

- Rick Warren 

- November 7, 2022,


"Chutichuan dik lohna ngamthlemna angin, fing verveka mihring bum chawpin, zirtirna thli tinrenga lehlam lehlama vawrh leh len len naupang kan ni tawh lo vang a" (Ephesi 4:14)

Pathian thilsiam zinga chak berte zinga mi chu ti hi a ni. Chuvang chuan Bible hian thli hi tehkhin thuah a hmang nasa hle. Fiahna thli te, buaina thli te, indona thlite leh thlemna thlipuite an awm. Mahse chung zawng zawng chu do zawh theih turin Pathianin a siam a ni.

Ephesi 6:13-ah chuan heti hian kan hmu, "Chuvangin, ni tha lovah chuan in do zawhna tur leh, in tih zawh vek hnu pawha in din theihna turin, Pathian ralthuam famkim chu la rawh u." 

Heta "din ngheh/din" tih hian a sawi tum chu "harsatna thlipui pawhin a nek chhiat zawh loh" tih a ni. Hringnuna thlipui tam tak tleh kara din zawh theih dan thuruk pakhat chu thlarau lam nuna zawmpui neih hi a ni.

Pathianin harsatna thlipui hi nangmah maia lo tawrhtir che kha a tum miah lo. Pathianin a sawi hmasak berte zinga mi chu, "Mihring amah chauhva awm hi a ṭha lo ve" tih hi a ni (Gen. 2:18). Thlipui na tak a tleh lai pawha venpuitu tur i neih theihna turin thlarau lamah chhungkaw zawmpui i neih a ṭul a ni. Isuan kohhran a din chhan bul ber pakhat chu indawmtawn tur atan a ni.

Ephesi 4:11-12, 14 kha han en ila, "Krista famkimna lenzia tluka kan zaa kan lo awm hma loh zawng, rawngbawl hna thawk tura mi thianghlimte tihfamkim nan Krista taksa siam ṭha turin ṭhenkhatte chu tirhkoh atan te, ṭhenkhatte chu zawlnei atan te, ṭhenkhatte chu Chanchin Ṭha hriltu atan te, ṭhenkhatte chu kohhran chawmtu leh zirtirtu atan te a pe a; chutichuan dik lohna ngamthlemna angin, fing verveka mihring bum chawpin, zirtirna thli tinrenga lehlam lehlama vawrh leh len len naupang kan ni tawh lo vang a."

Helai thu aṭang kan zir theih chu Pathian kohhran chu a mite ṭhan lenna tur atana a hmanrua a ni tih hi. Hemi tur hian mi ṭhenkhat thlan bik a nei a ni. Kei pawh chung zinga pakhat chu ka ni. Pastor leh zirtirtu ka ni. Mahse thilpek ka dawnte hi ka tan a ni lo; midangte hamṭhatna atan zawk a ni.

Thil dang kan zir leh theih chu "tirhkoh te, zawlnei te, thuhriltu te, pastor te leh zirtirtute" hna chu rinna dik lo leh zirtirna him lo laka ata a kohhran venhim hi a ni.

Mite rinna hi a nghet lo a, danglam zung zung thei a ni. Kumina an rinna ang khan nakumah chuan an nei leh miah tawh lovang. Mite ngaihtuahna mai ni lovin an thudawn pawh a danglam fo. Computer zirna chungchang lehkhabu kum 10 kal taa ziah tawh tluka ṭangkaina nei tlem tawh hi a awm tam lo viau ang. A chhan chu thil thar leh ṭha zawk hmuh chhuah belh zel a nih avang hian.

Mahse thutak chu a danglam ngai lo. Kum 2000 kal taa dik kha tunah a la dik reng. Isaia 40:8-ah chuan, "Hlobet chu a vuai a, a par chu a chuai thin: kan Pathian thu erawh chu chatuanin a awm reng ang" tih kan hmu.

Kan tunlai khawsak phungah chuan thil danglam, dik tawk si lo a tam em em tawh a ni. Bumna, dawt leh thudik chanve chauh an ni ṭhin. "Lehlam lehlama vawrh leh len len" tih hi hre reng rawh. In kohhran chhungkuate thlahthlam reng reng suh.

Ngaihtuah zui atan.

Engtinnge in kohhran i hmuh le, hun khirh leh harsaa indawm kan tawn kha i rawt chhuah nge midangte rawt?

Isaia 40:8-a  "Hlobet chu a vuai a, a par chu a chuai thin: kan Pathian thu erawh chu chatuanin a awm reng ang" tih hi chhiar hnua i thinlunga thlamuanna i neih kha han sawifiah teh 

"Fing vervek taka bum tumtuten" engtinnge i nunah thu an sawi le?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...