Nun duhawm zawk nei tura inbuatsaih dan
- Rick Warren
- November 8, 2022
"Heng thil zawng zawngte hi in lo hre ta a, tichuan ti ula malsawmin in awm ang" (Johana 13:17, NIV)
Kan nuna thlipui lo hrang ṭhin kan thunun theih loh - inlaichinna thlipui te, sum leh pai lama thlipui te leh thlarau lam nuna thlipuite hian chimbuaiin an paih thlu thei che a. Mahse chung thlipui chak ber karah pawh chuan nghet taka ding thei turin Pathian thuin a kaihruai thei che a ni.
Nimin khan kohhran chhungkuate nen inzawmna neih tlat a pawimawhzia kan zirho tawh a. Vawiin hian thlipui lo hrang ṭhin kan hneh theih dan tur kawng, *I zirte kha a takin nunpui rawh* tih hi kan zirho leh dawn a ni.
Pathianin a thu ngaithlatu chauh i nih a duh lo va. Nunpui a, zawm a, a taka chet chhuahpui turin a duh che a ni.
Bible chuan heti hian min hrilh, "Chutichuan, mi tin heng ka thu hi hriaa zawm apiang chu, mi fing lungpui chunga in satu nen tehkhin tur a ni. Ruahte a lo sur a, tuite a lo lian a, thlite a lo tleh a, chu mi in chu a rawn nam sawk sawk a; nimahsela a chim lo va; lungpui chunga rem tlat a nih avangin." (Matthaia 7:24-25)
Thlipui a lo tleha thil lo thleng ṭhin pathumte hi i lo chîk ngai em? Ruah a lo sur a, chu chu i nun himna inchung kha a rawn deng a. Tui chim chin lo sang zelin i nun innghahna a rawn chim a. Tichuan thli lo tleh chuan i nunna inhumhimna kulh bang kha a rawn sawi hlawk hlawk ṭhin a ni. Chunglam, hnuai lam leh sir lam aṭanga beihna i tawk ta ṭhin a nih chu. Chungte chu pakhat mah i thunun thei bawk hek lo.
I nuna i thunun theih miah loh thil - i taksaa harsatna/natna hmuh chhuah te, i fa i thunun theih hauh loh te, leh sum leh paia harsatna i tawhte kha engtinnge i hmachhawn ṭhin? Bible-a i thil zir apiang kha a takin i nunpui ang. Chutia i tih chuan i tlu ngai lovang, a chhan chu lungpui chunga in sa i ni dawn tlat a ni.
Lungpui chu eng nge? Lungpui chu Pathian thu chu a ni. Chumi chungah i innghah thuk poh leh i ding nghet dawn tihna a ni. Thlipui lo hrangin harsatna a rawn siam mai thei, mahse Pathian thu anga i nun tlat chuan i nun a tichhe pha ngai lovang.
Johana 13:17-ah chuan hei hi kan hmu, "Heng thil zawng zawngte hi in lo hre ta a, tichuan ti ula malsawmin in awm ang." (NIV)
Chung thilte chu i hriat chuan malsawm i ni ang a ti miah lo. Ti ula malsawmin in awm ang a ti zawk a ni.
Tunah khan thlipui tleh vel kar aṭanga lo chhuak i ni mai thei, thlipui tleh i tawn tlang dawn chauh pawh a ni zawk thei. Tun aia uara sawi pawh ka thiam lo: Pathian thu tihnghin rual loh ah chuan i nun nghat rawh. Chu chu innghahna rintlak awm chhun a ni.
Ngaihtuah zui atan.
Pathian thu hi "i in" nghahchhan atana i hmanin engin nge a tlusawp tur veng?
Eng kawngah nge Pathian thu zawm tura i beih fan fan le? Inah zaidam taka awm emaw hnathawhna hmuna dawhtheihna lantir emaw pawh nise, Pathianin a kohna che anga i nunin tukar hian engtinnge thil a danglam i rin?
I nunah khan tunge Pathian thu zawm reng nun entirna ni thei ang- Pathian hria ni satliah mai lovin?
[Lettu: Mapuia Fanai]

No comments:
Post a Comment