Nun duhawm zawk nei tura inbuatsaih dan_
- Rick Warren
- November 6, 2022
"I chunga rilru nghattu chu, nangmah a rin che avângin, thlamuang tak maia awm tûrin i veng ang." (Isaia 26:3)
Pathianin nun duhawm zawk nei tura a buatsaih lai che hian danglamna thleng vat vat sela i duh mai thei. Chawp leh chilha siamtharna/danglamna i duh a ni mai thei. Mahse Pathian chu a hmanhmawh ve lo, a chhan chu i nungchang/zia kha zawi muanga ṭhan lentir a duh a ni.
Mi pakhat chuan ka hnenah heti hian a sawi, "Pu Rick, ka nun hi harsatna nasa takin min chimbuai avanga tlu mai tur ni hian ka inhria" tiin. Chutia a sawi veleh ka rilrua Bible chang lo lang hmasa ber chu Nova leh tui len chungchang kha a ni: _"Tichuan tui chu lei chung ata a kâm ta deuh deuh va: tichuan ni za leh ni sawmnga chu a ral hnu chuan . . . lawng chu thla sarihna ni sâwm leh ni sarih niah chuan Ararat tlângah chuan a lo innghat ta a"_ (Genesis 8:3-4). Tuilian kha chawp leh chilhin a kam mai lo, chutiang chiah chuan he pa harsatna pawh hi a kiang mai dawn lo tih ka hria. Danglamna tluantling chuan hun a duh tlat a ni.
Thudik tak chu, i damchhung khan lang si lo hian i ṭhang reng a ni. Kan ṭhang lian thut lo. Thutlukna pakhat kan siam fuh avangin kan ṭhang hluai bawk hek lo. Muangchangin kan ṭhan belh hlek hlek a ni. Tihthianghlimna hmangin Pathianin a ṭhan lentir che a ni.
Tirhkoh Paula chuan heti hian a sawi, _"Nangmahnia thil tha ti ṭantu khan Isua Krista ni thlengin a tifamkim zel dawn, chu ngei chu ka ring tlat si a."_ (Philippi 1:6)
I chhunga Pathian hnathawh kha i inpek ni aṭang chiahin a inṭan, "Awle, ka inpe a. Nun ṭha pangngaia tan mai mai ka duh lo. Nun ṭha zawk neih ka duh. Ka tana Pathian ruat zawng zawng neih ka duh. Ka nun hmabak zawng hi ka nun ṭha ber nise ka duh" ti a i inhlan niah.
Isaia 26:3-4 ah chuan hetianga inhlanna hi kan hmu, _"I chunga rilru nghattu chu, nangmah a rin che avângin, thlamuang tak maia awm tûrin i veng ang."_
Thlamuang tak leh hahdam taka awm i duh em? Pathianah i rilru dah la, "awm reng la bansan miah suh."
_"Nangmahnia thil tha ti ṭantu khan Isua Krista ni thlengin a tifamkim zel dawn"_ tih i hriatchian hunah chuan nun ṭha pangngai aṭanga nun ṭha zawk nei turin a hma aiin dawhtheihna nun i ngah ang.
Ngaihtuah zui atan.
Rih hloh thuai theihna lamah emaw hausak thuai theih dan kawngah emaw i tlan a ni mai thei, eng kawngah nge danglam vat tumna i lo neih ṭhin? Engnge a rah chhuak?
I ṭhiante, an nuna hmasawnna thleng thuai tura beiseite engtinnge i fuih ang?
He zirlai i chhiar hnu hian i nunkawng eng berah nge danglamna thleng tura dawhthei taka nghak turin Pathianin a ko che ni a i hriat?
*Vawiin hian Isua i zui dawn em?*
Bible chuan heti hian min hrilh, _"Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan."_ (Johana 3:16)
A thutiam a hlen theih nan Pathian i ring dawn em? Heti hian han ṭawngṭai teh le: "Lalpa, Isua Krista hi i Fapa a ni tih ka ring a . I hmaah ka sualte ka puanga, i ngaihdamna ka rawn dil a che. Isuan ka sualte tlengfai turin a thi tih leh nangin i kai tho leh a ni tih ka ring. Vawiin aṭang hian Isua hi Lal leh Chhandamtu a pawma a hnung zui ka duh a ni. Min hruai la i duhzawnga nung turin min pui ang che. Isua hmingin, Amen."
Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia,
[Lettu: Mapuia Fanai]

No comments:
Post a Comment