_Danglam duhna: Thlarau Zungkaihna hmasawntir_
By Rick Warren
— October 06, 2022
“ _Amahah chuan zung kaiin inrem chho ula, zirtîrna in dawn ang khân rinnaah chuan ding nghet ula, lâwmthu sawi uar rawh u_ .” [Kolossa 2:7]
Lawm tlatna thinlung chu Pathian duh dan a ni, a chhan pawh chu chuan i rinna a siam a ni.
Engtin nge lawmna thinlung chuan i rinna a siam theih? Hun harsaah chu chu a thleng ṭhin – Thil thlengin awmzia a neih loh chang te, a awmzia i hriat fuh theih miah loh lai te, i ṭawngṭaina chhan a nih loh chang te, i duh dan kalh zawng hlira i chunga thil a thlen changte chuan chu chu a thleng ṭhin. “Lalpa, engkim chunga thuneitu i ni. Min hmangaih tih ka hria a, he thil aṭang ngei hian thil ṭha i thlentir thei tih pawh ka hria. Ka harsatna aiin i lian fe zawk tih pawh ka hre bawk” i tih changte chuan chu thiltihtheihna chu i nunin a chang ṭhin.
Mi tinten thil ṭha eng emaw avangin Pathian hnenah lawmthu an sawi thei ang. Hun ṭha lovah pawh Pathian hnena lawmthu i sawi thei thung a nih chuan i rinna chuan nghet zawkin zung a kai thuk deuh deuh zel ang.
Habakuka chuan hun harsa tak a paltlang a. Hetiang hian a sawi,
“ _Theipui rah lovin grep rah dâwn lo mah se_ ,
_Oliv pawh rah lovin lovah eng mah thar dâwn lo mah se_ ,
_Huanga berâm bo zovin, ran in ruak vek mah se_ ,
_Lalpa chungah chuan ka lâwm zêl ang a,_
_Min chhandamtu Pathian chu ka fak zêl ang_ ,” tiin. [Habakkuk 3:17-18]
Thil ṭha lo chi hrang hrang thleng mawlh mawlh karah Habakuka chu a lawm thei tlat a. Eng vangin nge a lawm? Pathianah lawmna a zawng a ni: “Ka chhandamna Pathianah chuan ka lawm fo dawn a ni" tiin a sawi.
Mihring nunin a thil tawn zawng zawng a chhiat vek pawhin i lawm cheu thei ang, a chhan chu Lalpa chu i chhandamtu a nih vangin. A la khai chhuak leh ang che. Malin i awm lo. A kalsan lo ang che. Pathian hnenah lawmthu hrilh ang che!
I nun a buai zual em em lai chuan Pathian hnenah lawmthu i sawi thei em? Chu chu i rinna fiahna kawng pawimawh em em a ni. Kawng harsa i dai lai chuan i thil hloh tawhte chu thlir suh. I chanvo chun chu ngaihtuah la – chutah chuan lungawi tum ang che!
Pathian chu a nihna avang chuan lawmthu i hrilh thei ang. Hun harsa chu paltlang turin a duh che, tichuan i rinna pawh a lo ṭhang lian deuh deuh zel ang.
Kolossa 2:7 ah chuan hetiang hian kan hmu “ _Amahah chuan zung kaiin inrem chho ula, zirtîrna in dawn ang khân rinnaah chuan ding nghet ula, lâwmthu sawi uar rawh u_ .”
Pathianin duh dan nghet i laka a neih chu – Thil engkima lawmthu hrilh a ni. Lawmna nghet tak chuan Pathian a chawimawi a, inpawlna a buatsaih a, tichuan i rinna a tipuitling a ni.
Ngaihtuah zui atan.
Hun harsa a lo thlen chang chuan engtin nge i lo hmachhawn ber thin? Engtin nge Pathian chuan chutiang chu hmachhawn turin a duh che?
Pathian chawimawi tih chu eng nge a awmzia?
I nunin harsatna a paltlang changin eng tin nge Pathian chuan i rinna a tihnghetsak che?
[ *Lettu* : Peka]

No comments:
Post a Comment