Danglam duhna: Thlarau zungkaihna hmasawntir
Rick Warren
October 8, 2022
"Thu tha lo reng in kaan chhuak suh se, a tulzia ang zela siam tha turin thu tha apiang chhuak zawk rawh se, a ngaithlatute tan khawngaihna a lo nih theih nan" Ephesi 4:29
Zungkaiha hlimna awmzia chu eng dinhmun pawh- hun ngah lai te, hun tlem lai te, hun tha, tha lo, dik, eng hun pawh a mi mai - chung ang huna lawm zel hi a ni a. Eng dinhmunah pawh hlim zel turin duhthlanna i siam thei a ni. Zung nghet nei chunga hlim hian midang nun a khawih thin a, rawngbawlna a lo ni thin.
Ringtu zawng zawng hi rawngbawltu kan ni tih hi i hre tawh ngai em? Rawngbawltu i ni! A chhan chu, ringtu zawng zawng hi rawngbawltu an ni a, chumi awmzia chu midang rawngbawlsaktu tihna a ni. Rawngbawlna kawng zawh theih pakhat chu midangte ngaihhlut rawngbawlna hi a ni.
"Ngaihhlut" tih awmzia hi i hre chiah em? Car i lei chuan, a hlutna a tlakhniam dan i hre thei ang. I khalhchhuah chiah atang khan, a thar hlak pawh nise a man i pek ai khan a hlutna a hniam nghal a. Thil hlutna a tlakhniam chuan ngaihhlutna a tlem zel a, chutiang bawkin a hlutna a tam hian ngaihhlut a hlawh thin.
I pasal i ngaihhlut thiam chuan, a hlutna i tihsan sak a. I nupui i ngaihhlut thiam khan, a hlutna i tihpunsak zel a ni. I fate i ngaihhlut khan, an hlutna i tipung zel a. I thawhpuite i ngaihhlut khan, i thawhna pawl tan leh i tan an hlutna i tipung zel a ni. I pu/pi i ngaihhlut khan, a hlutna i tihsansak zel a ni.
Midangte ngaihhlutna rawngbawl hna hian midangte hlutna a chawisang thin a. Hlimna nen zung i kaih khan, midang hlutna tihpunsak zawngin rawngbawlna, anmahni i ngaihhlut chauh khan i thawk teuh thei a ni.
Bible chuan hetiang hian a sawi a, "Thu tha lo reng in kaan chhuak suh se, a tulzia ang zela siam tha turin thu tha apiang chhuak zawk rawh se, a ngaithlatute tan khawngaihna a lo nih theih nan" (Ephesi 4:29) tiin.
Ka hmuhchhuah tak pakhat chu mi reng reng hian fuihna nasa tak kan mamawh fo thin a ni tih hi. "Kei chu fakna ka dawn belh duh miah lo. Ka ngah tawk tawh a. Khawngaihin duh tawk teh u, min fak tawh lul suh u" ti hi tumah ka la tawng ngai miah lo.
Nghet taka awm tur te, hmangaih ni tur te, ngaihhlut ni turte hian mamawhna chen i nei a, mitin hian kan nei theuh a ni. Pathian hman nih i duh chuan, kawng khat awm chu: mitin reng mai hi ngaihlu la, tinghet la, lawm thin ang che.
Chutiang chuan midangte ngaihhlut rawngbawlna i thawk thei reng a ni.
Ngaihtuah zui atan...
Midangte ngaihhlut i nih hian engtin nge i awm thin?
Tawngkam mai bakah, midangte i ngaihhlutna i lantir theih dan engte nge?
Midangte tihchakna leh ngaihhlutna che hian engtin nge Pathian lam a hnaihtir che?
(Lettu: Msa)

No comments:
Post a Comment