_Danglam Duhna: Thlarau Zungkaihna Hmasawntir_
By Rick Warren
— 10/06/2022
Mi tu emaw hnena lawmthu i sawi apiang chuan amah chu i chawimawi tihna a ni.
Entirnan, ka nupui hnenah, “Duhtak, nizan zanriah tui tak i siam avang kha ka va lawm em,” ka tih chuan ka nupui ka chawimawi tihna a ni. A nu hnenah, “Kay-i ka neih min phalsak avangin lawmthu ka hrilh a che,” ka tih chuan a nu chu ka chawimawi tihna a ni. Tu emaw hnenah, “Kawngkhar min hawnsak avangin ka lawm e,” emaw “I lo inkhawm avangin kan lawm e,” ka tih chuan chu mi chu ka chawimawi tihna a ni.
Lawmthu sawina hi midang kan chawimawi theih dan kawng pawimawh a ni.
Bible chuan Pathian hnena lawmthu sawi chu amah in chawimawi theihna niin a sawi. Sam 50-naah chuan hetiang hian kan hmu: “ _Lâwmthu sawi inthawina hlântu chuan min chawimawi a ni_ .” [Sam 50:23]
Engtin nge lawmthu sawina chu inthawina a nih theih? Thil eng emawa lawmthu sawi tur chuan ngaihtuahna hman hmasak a ngai. Chuvangin, tu emaw hnena lawmthu i sawi a nih chuan i hun i hmang tihna a ni.
Ka nupuiin ka tana thil eng emaw a ti a nih chuan, “Ka lawm e” tih sawi turin min beisei a. Mahse, chu chauh chu ka sawi a nih thung chuan, “Min hmangaih tak zet em, a nih loh pawhin, ka thil tih vang chauh chuan em ni min hmangaih?” tiin a inzawt zui ang.
A chang chuan, lawmthu sawina aia chung hreta ka chet a ngaih chang a awm a – engah nge ka nupui chu a thil min tihsak vang chauh chuan lawmthu ka hrilh ang a, a nihna hrim hrim avang chuan lawmthu ka sawi loh ang ka ti ṭhin. Chu aia thuk zawk chu a ni a, lawmthu sawina puitling zawk a awm.
I fate chuan sum eng emaw i pek chang chauh chea lawmthu an hrilh che a nih chuan, “Anni hian min hmangaih takzet em, emaw anni hian ka sum chauh em ni an duh” a rukin i ti hial mai thei.
Pathian hnena lawmthu i hrilh chhan chu eng hlawhtlinna emaw i chan vang emaw ei tur a pek vang che emaw i tana thil a tih vang emaw a nih mai chuan he zawhna hi inzawt la a ṭha ang, “Pathian chu ka hmangaih takzet em, a nih loh chuan Pathian thil min pek maite em ni ka duh?” tih inzawt ang che.
Pathian chu a thil tihsak mai che bakah a nihna avanga lawmthu sawi i zir a ngai.
Pathian chu a nihna avanga lawmthu i hrilh theih chuan i ṭawngṭaina chu hetiang deuh hi a ni ang, “Lalpa, i finna chu ka finna aia a ropui avangin lawmthu ka hrilh a che. Ka hlimna chu keimah aia i hriat chian zawk avangin lawmthu ka sawi e. Ka inthlahdah lai pawha i inthlahdah loh avangin ka lawm e. I hmangaihna leh zahngaihna avangin lawmthu ka sawi a, chu chu ka tan a ṭha a ni. Thil tam tak ka hriat fiah loh chang pawhin, ka thinlung duhthusam neitu chu nangmah i ni e,” tiin.
Chung lawmthu sawina chu “Ka lawm e, Lalpa, ei in min pek avangin” tih ṭawngṭaina thute aia ril daih a ni. Chung lawmthu sawina chuan Pathian a chawimawi a, thlaraua Hmasawnna a thlen hial thei.
Ngaihtuah zui atan.
Zir chianna tam tak chuan lawmthu sawina chu mihring rilru puthmang hrisel ber a nihzia an nemnghet a. Chu chu eng vang nge ni ang?
Lawmna thinlung nghet tak chuan engtin nge Isua anna kawngah a ṭhanlentir che?
Tun kar chhung chu nitin, Pathianin a thil tihsak che sawm tal ngaihtuah chungin lawmthu sawi rawh. Kar tawpah chuan chung chuan engtin nge i nun an tihdanglam a, a thlakthleng che tih ngaihtuah ang che.
*Isua nen i nun kha i ṭan thar leh duh em?*
Pathian chu a thil pek hlu em em Isua Krista avangin lawmthu kan hrilh thei ang, “ _Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni. Thil ṭha tih avângin a ni lo, chuti ni se miin an chhuang dah ang e_ ,” tiin. [Ephesi 2: 8-9]
Nangmah Siamtu nena inrema awm i duh chuan he ṭawngṭaina hmang hian inhlan ang che: “ _Duhtak Lalpa, misual ka ni tih ka hria a, i ngaihdamna ka rawn dil e. Isua chu i Fapa a ni tih ka ring a. Ka sualte avangin a thi a, a tho leh a ni tih ka ring bawk e. Ka chhandamtu atana pawm a, vawiin ni atang hian ka Lal atana zui turin ka inpeih e. Ka nun hi hruai la, I duh zawng tih min zirtir ang che. Isua hmingin ka dil e. Amen_ .”
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e.
[ *Lettu* : Peka]

No comments:
Post a Comment