Friday, September 16, 2022

TIH TUR BIK THAWK TURA SIAM I NI

 Kohna mila Nun: Eng vangin nge khawvelah hian ka lo pian ve? 

By Rick Warren

— Sept 16, 2022 


“Khawvêla mi tîr angin anni pawh khawvêlah ka tirh hi." [Johana 17:18] 

I nun hmanga hmasawnna thar thlentir tura siam i ni. Kan fianrial thuzir hnuhnung berah khan chutianga hmasawnna i thlentir theih dan kawng khat chu kan sawi tawh a: I nihna hmanga i ringtu puite rawng i bawlsak dan tur chungchang a ni ber. 

I kiang vela thil thleng laka rawng i bawl dan tur pawh a tel. Pathian chuan kohhrana rawngbawl tur leh khawvel tana inhmang turin a siam che. 

Isua chuan Johana 17: 18-ah chuan hetiang hian a sawi, “Khawvêla mi tîr angin anni pawh khawvêlah ka tirh hi." Ni khat chu, Pathian hmaah i la ding ang a, he zawhna hi a zawt ang che, “Ka thil kawltir che kha engtin nge i hman?” tiin. Chutah chuan, Pathianin hnathawh tur a pek che chu engtiangin nge i hlen chhuah tih i sawifiah a ngai ang. 

Paula chuan hetiang hian a sawi, “Lalpa Isua hnên ata ka hmuh rawngbâwl hna thawh tûr ka hmabâk, Pathian khawngaihna Chanchin Ṭha puan darh tûr hi ka hlen theih phawt chuan, ka nun pawh hi thlâkhlelh tûrah ka ngai lo,” tiin. [Tirhkohte 20: 24] 

Pathianin hna thawh tur a pek che chu eng nge ni? 

Pathian chuan Chanchin Ṭha hril turin a ti che. Isua chu tu nge a ni tih i hriat a, Pathian nena in inrem theihna tura a hnathawh i hriat chian chuan, chu chanchin tha chu midangte hnena i puan chhuah a ngai ang. 

Tirhkohte Thiltih 1: 8-ah chuan Isuan hetiang hian a sawi, “Jerusalem-ah te, Judai leh Samari ram pumah te, kâwlkil thlengin ka thuhretute in ni tûr a ni,” tiin. 

I hriat tlat tur chu Isua chuan a bungrua hralh tur emaw a thuhretu ni turin a ko lo che. Mite hnenah i hralh a ngai lova, amah hum tuma i din a ngai hek lo. 

Isua chuan a thuhretu ni turin a ko che a ni. I nuna thil thleng i sawi chhuah mai chu a tawk em em a ni. Chuvangin Pathianin i nuna a hnathawh puang chhuak tur chuan khawvelah hian nangmah aia ṭha tumah an awm lo. 

Isua chuan a thuchah chu hmun tina puang chhuak turin a duh che – in ṭhenawmah, nangmah anga khawsa a ni thei ang, i khawsak dang ang lova khawsa a ni thei bawk. An chatuan hun chu a chuang lo. Vanduaithlak takin, kum tin mi maktaduai chuang chu Krista nena inlaichinna mumal nei lovin an liam a ni. 

Isua Chanchin Ṭha hril tluka thil pawimawh zawk hi ka ngaihtuah chhuak thiam lo. Tun hun tluka chu hna thawhna atana hun tha chu a awm lo hial bawk. 

Ka nun innghahna chang chu Tirhkohte 13: 36 kha a ni a, “Davida zawng a dam chhûngin Pathian duhzâwnga rawng a bâwl hnuah a muhîl a, a thlahtute bulah an phûm a, a ṭawih ral tawh alâwm” tih chu a ni. 

Chu chu i tan pawha ka beiseina a ni. Pathian hna chu Ama hun tiamah ngei thawk turin ka duhsak a che. 

Chu aia hna pawimawh zawk chu engmah a awm lo. 

Ngaihtuah zui atan. 

Isua Chanchin Ṭha chu midangte hrilh thei turin engtin nge i inbuatsaih ang? 

Isua chanchin midangte i hrilh theih loh chhan buaina lian ber mai chu engnge ni? 

Tun hnaiah Isua thuhretu engtik laiin nge i lo nih ve tawh? Engtin nge chu thuchah i sawi chhuahna chuan a lo dawn sawn? 

[ *Lettu* : Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...