Thursday, September 15, 2022

PATHIAN RAWNGBAWL TURA CHHER I NI

 Kohna mila Nun: Eng vangin nge khawvelah hian ka lo pian ve? 

By Rick Warren

— Sept 15, 2022 



“Thil ṭha ti atân Krista Isuaah chuan siama awmin, ama kutchhuak kan ni si a; chu thil ṭha tih chu kan awmna tûrin Pathianin a buatsaih lâwk a ni.” [Ephesi 2:10] 

Mihring tute mah hi inang kan awm lo. Nangmah ngei pawh kha kawng engkimah i danglam bik a ni. I aw phawi a danglam a, i mit rawng leh kutzia pawh a danglam bawk. I lungphu chen khan a danglam a ni.  

Pathian chuan thil pakhat behchhanin engmah a siam lo. Hun kal tawh leh – hun lo la awm turah pawh – nangmah ang an awm miah lo va, an awm ngai lo vang. 

Pathian chuan danglam takin a din che a, khawvelah hian tih tur bik a ruatsak che – thil danglam bik hnutchhiah turin a ti che a ni. Ka thuziak Daily Hope tih hi i lo chhiar ṭhin a nih chuan SHAPE tih chu i lo hmu tawh ṭhin ang a, Pathianin a rawngbawl tura a duh dan che sawifiahna ṭawngkam ka hman ṭhenkhatte chu i lo hre bel fu tawh ang.  

SHAPE ka tih chu hei hi a ni: 

• *Thlarau Thilpek [Spiritual gifts]:* Ringtu i lo nih chiah khan Pathian chuan thilpek a pe che a, chu chu midangte tha zawkin rawng i bawlsak theihna tur a ni. 

• *Thinlung [Heart]:* Thahnemngaihna i lo nei ta a – nuam ti takin rawng i bawl theih phah. 

• *Theihna [Abilities]:* I pian tirh aṭang khan Pathian chuan pianpui theihna a pe che a – infiamna, lemziak emaw chhiarkawp pawh a ni thei. 

• *Mizia [Personality]:* Mi ṭhenkhat chu an zakzum a, midang erawh an zak zum lem lo. Mi ṭhenkhat chuan engkim ruahmanna fel neih an duh a, midang thung chu hun tawp dawn ruaiah an che chawp chuk chuk ṭhin. 

• *Thil Tawn [Experiences]* : Pathian chuan i daihriat a hmang thei – chhungkua, zirna, hnathawh, rilru leh thil dangte chu - midangte ṭanpuina hmanrua atan i hmang thei.  

Mi tute mah hian nihna/ziarang [Shape] inang an nei ngai miah lo. Pathian chuan danglam bikin a siam che a, mite rawng i bawlsak dan tur pawh a bik taka duan a ni. 

Paula chuan Ephesi 2:10-ah chuan hetiang hian a ziak, “Thil ṭha ti atân Krista Isuaah chuan siama awmin, ama kutchhuak kan ni si a; chu thil ṭha tih chu kan awmna tûrin Pathianin a buatsaih lâwk a ni,” tiin. 

I chatuan hun pumpui chu vanramah Pathian rawngbawlna atan i la hmang dawn. Pathian chuan midangte rawngbawlsakna atan he leia i hun kha lo hmang lawk turin a duh che a ni. Pathian chuan chung thil ṭha tih chu rawngbawlna tiin a sawi. 

Pathian chuan ringtu tawh phawt chu rawngbawlna huanga tel turin a ko a – Pastor leh Missionary-te ringawt a ko lo. I thil thiam zawng apiang chu i chet chhuahpui thei ang – chubakah chuan Pathianin a lo hruai tawhna che aṭanga i thil lo zir chhuah tawh apiangte chu i hmang thei bawk ang. 

Ngaihtuah zui atan.  

Pathianin danglam takin a siam che tih i hriatna chuan engtin nge nangmah leh nangmah i inhmuh dan a tihdanglam? 

I nihna ziarang [Shape] danglam bik chu mite ṭanpuina atan engtin nge i lo hman tawh? 

Mi ṭhenkhatten an nihna danglam bik chu engtin nge mite rawngbawlsakna atan an lo hman ve tawh? 

*Pathian thutiam chu i ring thei ang* 

Pathian chuan Amah anna neiin danglam bikin a siam che. Mahse, i sualna chuan Pathian lak atangin a la hrang che, chu Inlaichinna chhia chu I thiltih engmahin a siam tha thei tawh lo. Chuvangin, i sualna lak aṭanga chhandam tur che leh Pathian pawm tlak ni tur chuan chhantu i mamawh a ni. 

Chuvangin chuan Pathianin Isua a rawn tir a. Isua kraws-a a thihna chuan i thil lo tihsual tawh zawng zawng leh i la tihsual tur lak aṭangin a chhandam che. Isua chuan Pa Pathian nena Inlaichinna tha nei leh thei turin a buatsaih ta che a ni. Bible chuan hetiang hian a sawi, “Isua Krista an rin avângin tu pawh a ring apiangte chu Pathianin thiam a chantîr a ni, danglamna rêng a awm lo,” tiin [Rom 3: 22] 

Isua nena inzin kawng chu amah Isua ring leh a hnena thupha chawina nei chungin bul i ṭan thei ang. Amaha tlu lut tura thutlukna i siam thei a nih chuan, he ṭawngṭaina hmang hian inhlan ang che: “Lalpa duhtak, misual ka ni tih ka hria a, i ngaihdamna ka rawn dil a che. Isua Krista chu i Fapa a ni tih ka pawm a. Ka sualte avangin a thi a, nangmahin nunna nei turin i kaitho leh tih ka ring e. Ka chhandamtu atana pawmin ka Lal anga zui ka duh e, vawiin aṭang ngei hian. Ka nun hi hruai la, i duh zawng anga nung turin min pui rawh. Isua hmingin ka dil e. Amen.” 

He ṭawngṭaina hi i hlan thei a nih chuan, he mailah hian Rick@PastorRick.com min lo bia ang che. Isua nena inzin kawng atana thuziak pawimawh tak tak lo thawn che ka duh a ni. 

[ *Lettu* : Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...