Kohna mila nun: Eng vangin nge khawvelah hian ka lo pian ve?
By Rick Warren
— Sept 2, 2022
“Tin, Marin, “Thinlung takin Lalpa ka chawimawi a.
Min chhandamtu Pathian chungah ka lâwm êm êm a ni." [Luka 1:46-47]
Ruahmanna siam ațul changin ringtu tam ber chu ring lo mi ang maiin an awm. Isuan anmahni a chhandam tih an pawm a, mahse an ring takzet lem lo. An nun chu an duh dan dan hawipui mai thei niin an ngai mai a. Mahse, a tak takah chuan Pathian chuan mitinte a siam a, mi chi hrang hrangte chu chhan bik eng emaw atana a din vek an ni. Mitinte chu eng emaw kawng zawh tura duan an ni.
Kum sanghnih vel liam taah khan Pathian chuan nula tuaitir pakhat Mari tan ruahmanna a nei a. A din chhan leh a thlan chhan chu, Pathian Fapa paitu tur chu a ni.
Pathian ruahmanna vantirhkohin a hrilh khan Mari chhanna chu eng nge ni? “Ka nun tana ruahmanna chu ka lo nei tawh e. Ka buai lutuk. Ka tana ṭha ber turin ka awm ang” a lo ti mai lo tlat. Ni lo, Pathian chuan a tan ruahmanna mumal tak a nei tih a hre chiang a, Pathianin ti tura a tih ang ang ti tur chuan a inpuahchah ta a ni.
Fakna hla hmangin a chhang a ni: “Thinlung takin Lalpa ka chawimawi a. Min chhandamtu Pathian chungah ka lâwm êm êm a ni." [Luka 1:46-47] Mari chuan Pathian chu a Lal leh a chhandamtu a nihna a pawm mai a, a duhzawng ti turin a inpeih nghal mai a. A nun pumpuiin amah chu a ring a, mi tumahin amah an ring dawn lo tih a hre reng chung pawhin, angel thusawi chu a awih ta zawk tlat a.
Pathian chuan thil eng emaw tan bik a duang chein i hria em? Bible chuan hetiang hian a sawi, “LALPA hi Pathian chu a ni tih hria ula, Min siamtu chu amah ngei hi a ni. A rama tla ṭhîn a berâmte kan ni,” tiin [Sam 100: 3]
Mi tam takte chuan an nuna Pathian ruahmanna chu tawng khat lekin an thelh ang – an lu leh an thinlung inkar hlat zawng lek chuan. An rilru chuan Pathian chanchin ṭha chu an ring a, an thinlung erawh an thlak danglamtir phal lo tlat thung.
Thudik chu hei hi a ni – nangma tana siam i ni lo. Pathian siam i ni a, Pathian tana siam i ni.
Physics subject laimu chu i lo hre thiam phak mai thei. Buaina thu hla zirna pawh i lo hmelhriat a ni thei. Van thengreng kalna lawng i sa thiam a ni hial thei bawk. Mahse, Pathian i lo hre lo a nih hlauh chuan, nun awmzia pumpui chu i ṭhelh tihna a ni ang.
I nun tawp hun chuan, Pathian chuan i hnathawhnaah engtiang takin nge i hlawhtlin tih a zawt lo che ang a, i sum khawl zat pawh a bengkhawn hek lo vang. He zawhna hi a zawt hlauh ang che: “Keimahni hi min hria em? Ka Fapa i tana krawsa thi tura ka rawn tirh nen khan in lo inhmelhriat em?”
Mihring nuna thil pawimawh ber chu Pathian hriat a ni – a chungchang hriat a ni mai lova, mimal taka inhriat a pawimawh.
Ngaihtuah zui atan
Eng ang ruahmanna nge nangma tan khan i lo siam ve ṭhin? Pathian i rinna leh a duhzawnga i innghahna chu chu chuan engtin nge a tarlan?
I kawng hruaitu atana Pathian i ring takzet a nih chuan engtin nge i ṭawngṭaina chu thlak danglam a nih ang? Engtin nge mite nena in inlaichinna chu tihdanglam a nih ang? Khawvel i thlirnate pawh chu?
Han ngawi hlek la, Pathian tan fakna hla han ziak teh – a duhzawng tih i duhzia tarlanna leh i nun atana a ruahmanna tihhlawhtlin i duhzia tarlanna hla chu ni thei se.
[ *Lettu* : Peka]

No comments:
Post a Comment