Sunday, September 4, 2022

KRISTA AN DAN KAWNG

 _Kohna mila nun: Engvangin nge khawvelah hian i lo pian ve?_  

- Rick Warren

- August 4, 2022 

"Mi puitling kan lo ni ang, Krista nihna ropui tak tlukpui turin" (Eph. 4:13, GNT) 

Isua zuitu nihna hi amah Krista anna kawng zawhna a ni a. Kan damchhung daih tur zin kawng a ni. 

Hei hi a nih dan chu a ni: Nitin mai hian Pathianin amah ang leh zual turin a duh che a. Bible chuan heti hian a sawi, "Mihring thar chuan in inthuam tawh si a, chu mihring thar chu hriat famkimna nei turin, a siamtu anpui anga siam tharin a awm mek a ni."(Kolossa 3:10) 

Tunlai mite chu hmanhmawh tak, tih thuai thuai duh mi an ni. Mahse Pathian erawh chuan chakna leh nghehna nun a ngai pawimawh zawk. Thil siamṭhat thuai thuai te, pumpelh kawng zawh te, hmun leh hmuna siamṭhat nghal te i duh a ni mai thei. Thuchah sawi emaw, thil zirtir bik nei emaw, tawnhriat ṭha tak nei emawte kha harsatna sutkian vat nan emaw, thlemna zawng zawng hneh nan emaw, i chhungrila hliamte tihdam nan i zawng a ni mai thei. 

Mahse puitlin tak tak erawh chu thil pakhat kan tawnhriat, min hneh em emtu avanga lo thleng a ni mai lo. Bible chuan heti hian a sawi, *Kan nunah Pathian a lo luh avangin kan nun hi a lo mawi telh telh a, amah kan ang tawlh tawlh a ni," (2 Cor. 3:18) 

Mi tam tak chuan thil ṭha lo an tawnte kha an nun kaihruaitu atan an hmang fo. "Ka awm dan ang hi ka nihna chu a ni mai" tiin i inthlak danglam ngawt theih loh thuin i infuih mai thei. 

Kan hriat sual ṭhin, chumi avanga kan lungngaih ṭhin chu i chin ṭhan ṭha lo te, i natna te, i rilru hahna te i paih bo khan, mahni nihna hre tawh lo tur anga kan ngai ṭhin hi. Heng hlauhnate hian ṭhang chak thei lovin emaw ṭhang thei lo hial tur emawin hna a thawk thei. 

Anih chuan engtinnge chung chinṭhan ṭha lote chu paiha Isua ang tura i nun theih ang? Engtinnge amah ang tura i nun ang? Chung nunhluite chu Isua duh dan anga thlak zelin. 

I nungchang kha i thil chin ṭhante belhkhawm a ni a - chung chin ṭhante chuan puitling turin hun an mamawh bawk. Zahngaihna nun nei tur chuan a chang chauh ni lova, i hriat lawk loh lai pawha midangte chunga zahngaihna i lantir nghal theih hun a ngai. Rinawmna hi nunphunga i neih loh chuan inpumkhatna i nei thei lovang. Mi, a nupui laka englai deuh thaw a rinawm chu mi rinawm a ni lo ve! I chin ṭhanten i nungchang an hril ang. 

Isua anna kawnga ṭhang lian turin chin ṭhan dan kawng khat chiah a awm. I nunziaa a beh hma loh chu a takin nunpui/ chet chhuahpui zel rawh. Chu chuan hun a duh ve a ni! 

Mahse hun a liam zel anga, nang leh i kiang vela miten i danglamna an hmu ang. Paula Timothea a ngen ang khan, "Mi zawng zawng hnena i sawtna a lan theih nan chung thilahte chuan taima la, chungah chuan inhmang zo rawh."(1 Tim. 4:15) 

Ngaihtuah zui  atan. 

Eng nunhlui nge i la thlah loh? Engtinnge vawiin hian chung nunhluia chinṭhan ṭha lote chu Isua duhzawnga i thlak ang? 

Miten i nungchangah engnge an hriat hran theih bikna tur che atan i duh. 

Isua nun anga i nun theih nan tuin nge fuiha pui thei che? 

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...