Monday, September 5, 2022

PATHIANIN I NUNA A TUM CHU NAWMSAKNA NI LOVIN I NUNGCHANG SIAM A NI

 Kohna mila nun: Engvangin nge khawvelah hian i lo pian ve? 

- Rick Warren 

- September 5, 2022 


"Nun thar hlak- Pathiana thuam, chhungril aṭanga siamthar, Pathianin a zia i nuna a tuh ang zela nung chhuak chuan inthuam rawh u" (Ephesi 4: 22-24, The Message) 

Sakhuana leh finna zirna in tam takin mihringte hi thianghlim leh pathian kan ni thei tih ngaihdan hi chawi kan an tum fo. Chiang takin ka'n sawi ang e: Engtikah mah Pathian emaw pathian emaw tal pawh i  ni ngai lovang. 

Hetiang dawt tenawm lutuk hi Setana thlemna hmanraw hlui ber a ni. Setana khan Adama leh Evi kha a thu anga awmtir a duh a, a thu an awih chuan "Pathian ang in lo ni ang" (Genesis 3:5) tiin a tiam hial a nih kha. 

I hun tawn te, i hma hun te, leh i bul vela mite i thuhnuaia dah i tum apiangin hetianga pathian nih duhna rilru hi a lo piang ṭhin. Mahse thilsiam mai i ni a; engtikah mah Siamtu i ni ngai lovang. Pathianin pathian i nih a duh lo a; Pathian duh dan anga nung a, a ngaihhlut thilte ngaihlu a, a mizia entawn a, a nungchang ang pu turin a duh che a ni. 

Hetianga siam hi i ni: "Nun thar hlak- Pathiana thuam, chhungril aṭanga siamthar, Pathianin a zia i nuna a tuh ang zela nung chhuak chuan inthuam rawh u" (Ephesi 4: 22-24, The Message) 

He leia i cham chhunga i nuna Pathian thil tum chu nawmsakna ni lovin i nungchang siam kha a ni. Thlaraua ṭhang liana Krista ang ni turin a duh che a ni.. 

Krista ang kan tih hian i nihna hloh emaw rilru nei hauh lo emaw tihna a ni lo. Pathianin danglam bikna neiin a siam che a, chu chu tihchhiat a duh hauh lo. Krista an kan tih hian i nihna tihdanglam ni lovin i nungchang/zia siamṭhat tihna a ni. 

Nungchang siam hi i nuna Pathian thiltumte zinga pakhat a ni tih i theihnghilh apiangin i hun tawnte avangin beidawnna/hnualna i nei ṭhin ang. "Engatinge ka chungah heng hi a thlen? Engatinge hun harsa tak ka tawn bik?" tiin i inzawt fo ang. Chhanna pakhat chu hringnun hi a awlsam lo a ni tih hi a ni. Harsatnate hian a ṭhantir che a ni. He khawvel hi vanram a ni lo tih hre reng rawh. 

Johana 10:10-ah chuan heti hian Isuan min tiam, _"Kei zawng nun an neih nan, tam taka an neih nan, lo kal ka ni."_ Ringtu tam tak chuan helai nun tam tih hi hriselna, nun nuam tak, hlim rengna, suangtuahnate a taka lo thleng zel, leh rinna leh ṭawngṭaina hmanga harsatnate sutkian zelna a kawk niin hrilhfiahna dik tawk lo an pe ṭhin. 

Ringtu nun hi nun awlsam tak ni turin an ngai ṭhin. He leiah hian vanram lo thleng turah an ngai ṭhin. 

Mahse Pathian hi kan duhzawng apiang min pe nghal ṭhintu emaw kan chhiahhlawh emaw a ni hauh lo. Hringnun hi a awlsam hle tih ngaihdan hi i pawm viau chuan fiah lo riauin thil i hmu ang a, nun tak i pawm thiam lovang. 

Hringnun hi i chanchin a ni ngawt lo! Pathian vanga lo awm i ni, nangmah vanga Pathian awm ni lovin. I tan chatuan hmun a buatsaih mek lai hian engvangin nge he leiah hian vanram a rawn dah ngawt ang? 

He leiah hian Pathianin i nungchang siama sawh nghet turin hun a pe che-  chatuan atana i inpeih theihna turin. 

Ngaihtuah zui atan. 

Engtikin nge i hun tawn te, hmabak te leh i kiang vela mite i thuhnuaia dah i tum? 

I nawmsakna te ni lovin i nungchang insiam chhoh dan zawk kha Pathianin a thlir reng. Chu chuan engtinnge harsatna i tawhte thlir thiam dan a pek che? 

Eng kawngin nge Pathianin nun tam, nun awlsam tak ni lo mahse, a pe che ni a i hriat? 

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...