Sunday, September 18, 2022

ENGVANGIN NGE MEIDIL CHANCHIN I NGAIHVEN A ṬUL?

 _Chatuan Nihphungte_ 

- Rick Warren 

- September 18, 2022 


"Mihring rilruah chuan chatuan a dah bawk a" (Thuhriltu 3:11) 

Vanram leh meidilte hi a taka awm ngei an ni. He thudik leh a thu, Bible-in hringnuna thil tak tak a dahte hi Pathianin hre turin a duh che a ni. 

Hringnuna thil dik hmasa ber chu Pathianin a hmangaih atan a siam che tih hi a ni a, amah hmangaih let i zir ve a duh bawk a ni. Thupek ropui chu hei hi a ni, _"Lalpa, i Pathian chu i thinlung zawng zawngin, i thlarau zawng zawngin i rilru zawng zawngin i hmangaih tur a ni"_ (Mat. 22:37) 

Hringnuna thil dik pahnihna chu hei hi a ni: Chatuan daih tura siam i ni. Thuhriltu 3:11-ah chuan heti hian kan hmu, _"Mihring rilruah chuan chatuan a dah bawk a"._ He leiah hian eng anga thil ṭha pawh awm ṭeuh mahse, "Hei aia ṭha hi a awm hrim hrim ang" tih rilru i lut hun a awm ngei dawn. 

A lo awm ngei bawk e! He leia i dam chen aia rei daih zawk thih hnu piah lamah hun i hmang dawn. Tuna i nun kha chatuan hmun atana i inbuatsaihna a ni. 

Chuvang chuan hringnuna thil dik pathumna i hre thei: Pathianin chatuan hmun tur pahnih a siam, vanram leh meidil. 

He khawvel nghahchhan a siam lai aṭang daih tawh khan Pathianin vanram hi a lo siam ṭan daih tawh. Matthaia 25:34-ah chuan Isuan heti hian a sawi, _"Ka pa voh bikte u, lo kal ula khawvel siam ṭantirh ata in tana ram buatsaih chu chang rawh u."_ Sualin a tihchhiat khawvelah hian i awm reng a ngai dawn lo. Famkimna ram, Pathian awmnaa chêng reng turin duhthlanna i siam thei. 

Mahse meidil pawh hi a awm ngei a nia. Isuan heti hian a sawi zel, _"Chu mi zawhah chuan, a vei lama mite hnenah pawh chuan, 'Anchhe dawngte u, kumkhaw mei, diabola leh a tirhkohte tan an buatsaihah chuan mi kal bosan rawh u.'..."_ (Mat. 25:41). Meidil chu Setana leh a tirhkohte, Pathian laka helte tana siam a ni. Mahse tunah chuan Pathian laka hel apiangte tan a ni. 

Kan zir leh turah hian meidil chungchang kan sawi zel dawn a ni - sawi ṭhaih leh rilru hrehawma ka siam duh vang che u erawh a ni lo. 

Hringnuna thil dik palina in hriatfiah zawk theihna turin meidil hi in hriat chian ka duh a ni: I chatuan hmun tur hi i thlan fel tur a ni. 

Deuteronomy 30:19-ah chuan heti hian kan hmu, _"In hmaah nunna leh thihna, malsawmna leh ânchhia ka dah tih tunah hian in chungchang thua hretu atan lei leh van ka ko a ni; chutichuan nunna chu thlang rawh u, in nun theih nan, nangni leh inthlahte nen."_ 

Pathianin nunna thlang tur leh a hnena chatuan hun hmang turin a duh che u a ni. A Fapa Isua Krista hmangin vanram kawng a hawng a ni. Isuan heti hian tiam, _"A ringa baptisma chang chu chhandamin an awm ang a; a ring lo erawh chu thiam loh changin an awm ang."_ (Marka 16:16) 

Isua ring tura duhthlanna i siam khan vanramah Pathian nena chatuana cheng dun tura tiam i ni. Thutiam ropui tak a va ni em! 

Ngaihtuah zui atan. 

Engvangin Pathianin amah i hmangaih leh hmangaih loh thuah duhthlan theihna a pe che ni a i hriat? 

Engtinnge meidil chungchang hriat chianna hian Pathian hmangaihna a hriat fiahtir che? 

Engtinnge Pathianin chatuan atan a buatsaih che? 

*Pathian thutiamah i innghat thei* 

I sualna khan Pathian nen a tihrang che a, chumi siamṭhat lehna tur chuan engmah tih theih i nei lo. Chuvang chuan i sual lak ata chhanchhuak tur che leh Pathian pawmtlak i nih theih nan tu emaw mamawh i nei a ni. 

Chuvang chuan Pathianin Isua a rawn tir a ni. I thil tihsualte leh i la tihsual tur zawng zawng man kha krawsah Isuan a pe vek tawh. Pa Pathian nen inlaichinna i neih theih nan Isuan kawng a hawng a ni. Bible chuan heti hian a ti, _"Isua Kristaa rinna kan nghahna hmangin Pathian nen kan inzawm leh a ni. Hei hi tupawh, a ring apiangte tan a dik a ni."_ (Rom 3:22, NLT) 

Isua ringa a hnena i sualte puangin amah nen hringnun zinkawng in zawhdun thei ang. Isua Krista hnena i nun hlan tura i inpeih chuan he ṭawngtai tawi hmang hian bul i ṭan thei: "Lalpa, misual ka ni tih ka hria a, i ngaihdamna ka rawn dil e. Isua Krista hi i Fapa a ni tih ka ring a. Ka sual avanga thiin ani chu i kai tho leh a ni tih ka ring. Vawiin aṭang hian amah chu min chhandamtu a pawmin a hnung zui ka duh e. Min hruai la, i duhzawnga nung turin min pui ang che. Isua hmingin, Amen." 

Lal Isua hnenah i inhlan thar a, lal leh chhandamtu a i pawm a nih chuan khawngaihin Rick@PastorRick.com-ah hian min lo be dawn nia. Lal Isua nen nitin hun in hman theih nana puitu che atan thil tangkai tur lo thawn che ka duh a ni.

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...