Monday, September 19, 2022

VANRAMA CHÊNGTE TANA ZAWM TUR DÂN

 _Chatuan Nihphungte_ 

- Rick Warren

- September 19, 2022 


"In hmaah nunna leh thihna, malsawmna leh ânchhia ka dah tih tunah hian in chungchang thua hretu atan lei leh van ka ko a ni; chutichuan nunna chu thlang rawh u, in nun theih nan, nangni leh inthlahte nen" (Deuteronomy 30:19) 

"Engtinnge hmangaihna Pathian hian mite meidila a paih theih ang?" tih hi mi tam tak zawhna a ni. 

Ruihhlo ngawl veiin khawlaia vak rawlai mai mai ṭhin angin han chan ta che ila. Chu ngawlveina avang chuan i nun a kehchhe mek a, chênna in emaw eina tur emaw inbualna tur emaw takngial pawh i nei miah lo a. 

Tichuan tu emaw lokalin i hnenah, "Ka lo ṭanpui ang che. Ka inah min rawn zui la inbual faina tur ka buatsaihsak che anga, thawmhnaw thar leh ei leh in ka siamsak ang che. Ka inah i chêng thei bawk ang. Ka chhungkaw zingah ka chhiar che anga, ka hnenah ka khawsaktir ang che. Ka hnam min ṭawmpui anga, i leiba ka rulhsak vek bawk ang che. Ka sum lak chhuahna hi ka pe che anga, ka inchhung bungrua engpawh i khawih thei ang. I thawh chhuah ve pawh a ngai lo ang. Hetianga ka tih chhan chu ka hmangaih che a i chungah zahngaihna lantir ka duh a ni." 

"Mahse, ka inah chênga ka chhungkaw zinga mi anga i awm dawn chuan kan chhungkaw inenkawlna dan erawh i zawm ve a ngai ang. Kan inzahtawn a, kan tihtur ṭheuhte tiin kan inpuitawn ṭhin. Tin, in chhungah ruihhlo lakluh reng reng kan phal hauh lo bawk." 

Khing chhungkaw inenkawlna dante i zawm khi i tan a ṭul em ni? Ṭul e a. Chutiang taka duhsakna i chunga an lantir chuan anni laka zahna i lantir kha an khawngaihna i chhan letna an beisei ve theih dan a ni. 


"Ka lawm e, mahse ruihhlo nghei ka duh si lova in mi duhsakna hi ka pawm thei tlat lo. In chhungkaw zinga chêng turin ka thlah phal lo a ni" i ti thei. 

Hetiang duhsakna i hnawl chuan duhsakna hlantu che khan thiam lohna a nei lova, nangmah kha a thiam lo zawk chu i ni. Kha mi khan chhanchhuak tur chein theih tawp chhuahin hmangaihna i chungah a lantir a. Hmangaihna an nei lo tiin i dem thiang lovang. 

Pathianin mite meidilah a paih ringawt ngai lo. Miin chuta kal chu an thlang zawk a ni. 

Isua hnung zui i thlan chuan dan pakhat chiah a awm: Isuan vanram i luh theihna turin a man a pe vek tawh. A ngaidam tawh che! Pawm mai kha i tih tur chu a ni. 

I duhdan anga nunga Pathian khawngaihna i hnar dawn a nih chuan Pathian chu hmangaihna nei lo a ni lo. I nun tihchhiat kha i thlang zawk a ni. 

Pathianin vanrama chêng turte tana dan siam turin dikna a nei. Chumi zawm chu i duhthlanna a ni. 

Ngaihtuah zui atan. 

Pathianin vanrama lut turte chungchanga dan siam theihna a neih i ring em? Engvangin? 

Engtinnge i chatuan hmun tur thlang thei tura Pathianin duhthlanna a pek che hian Pathianin a hmangaih che tih a lantir? 

Engvangin nge Isua hnena inpe tura zalenna i neih? 

*Pathianin nang nen chatuan hun hman a duh* 

Pathianin nang nena chatuan hun hman duh mahsela i sualna khan amah nen a ṭhen hrang che a, chu chu siamṭha turin engmah tih theih i nei lo. Chuvang chuan sualna lak ata chhanchhuak tur che leh Pathian tana pawmtlak ni tura siamtu tur che i mamawh. 

Chuvang chuan, Pathianin Isua a rawn tir a ni. Krawsa Isua thihna khan i sual man a pe zo vek a. Isuan Pa Pathian nena inzawmna nun i neih lehna turin kawng a rawn hawng a ni. Bible chuan heti hian a sawi, _"Chu chu Pathian felna, Isua Krista rin avanga a ring apiangte hnena tihlana awm chu a ni."_ (Rom 3:22) 

Isua hnena i sualte puanga amah ringin a hnung i zui ṭan thei. Isua Krista hnena i nun hlan tura i inpeih anih chuan he ṭawngṭaina hmang hian bul ṭan rawh le: "Lalpa, misual ka ni tih ka hria a, i ngaihdamna ka rawn dil e. Isua Krista hi i Fapa a ni tih ka ring a. Ka sual avanga thiin ani chu i kai tho leh a ni tih ka ring. Min chhandamtu a ni tih pawma vawiin aṭang hian a hnung zui ka duh e. Mi hruai la, i duhzawng hre thei turin min pui ang che. Isua hmingin, Amen." 

Lal Isua hnenah i inhlan thar a, lal leh chhandamtu a i pawm a nih chuan khawngaihin Rick@PastorRick.com-ah hian min lo be dawn nia. Lal Isua nen nitin hun in hman theih nana puitu che atan thil tangkai tur lo thawn che ka duh a ni. 

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...