Monday, August 8, 2022

PATHIAN HRIAT HI THIL PAWIMAWH BER A NI

 Inlaichinna ṭha 

- Rick Warren 

- August 7, 2022 



"A ni tak meuh mai, ka Lalpa Krista Isua hriatna ropui bikzia avangin thil engkim pawh channaah ka ruat a ni; amah avangin thil zawng zawng ka chan ta vek a, chung chu hnawmhneah lek ka ngai a, Krista ka hmuh theihna tur leh . . . " (Philippi 3:8) 

Pathian hi, i hun awl hnawh khahna atan chauha i hman chuan a ṭhian duhawm i ni ngai lovang. A ṭhian ṭha ni tur chuan amah hriat hi i ngaih pawimawh ber a ni tur a ni. 

Paula chuan heti hian a sawi, "A ni tak meuh mai, ka Lalpa Krista Isua hriatna ropui bikzia avangin thil engkim pawh channaah ka ruat a ni; amah avangin thil zawng zawng ka chan ta vek a, chung chu hnawmhneah lek ka ngai a, Krista ka hmuh theihna tur leh . . . " (Philippi 3:8) 

Chutiang chuan i ti ve em? Nitin i thinlung zawng zawngin Pathian i zawng em? 

Hei hi hre reng rawh: Pathian hnaih i duh ang tawk zelin Pathian i hnaih ṭhin. Pathian țhian țha tak nih i duh chauhin, chutiang chu i ni ang. 

Pathian nena inhlat ta riaua i inhriatin tu zawk nge kal sawn che u? Nangmah zawk a ni. Tumah dang i puh thei lovang. I kawppui emaw, i nu leh pate emaw, i fate emaw i puh thei lovang. Nangmah ngei kha i ni i nuna Pathian dah hmasa ber lotu chu. 

Pathian hriat leh amah hmangaih hi mihringten hamṭhatna kan neih hlu ber a ni a. Pathian mi hriat leh hmangaih nih hi khawvela thil nuam ber a ni. 

Miten eng nge an chapopui/uanpui tih aṭangin an thil ngaih pawimawh zawng i hre thei tih ka hria. An nunah an fate an pawimawh ber chuan an fate an chhuang ṭhin hle. An hnathawh kha an nuna thil pawimawh ber a nih chuan an hna chu an chhuang hle ang. Zin kuala tawnhriat ngah kha an dah pawimawh ber a nih chuan chu chu an titi ber a ni ang. Ṭhiante nena intihhlimho emaw thawmhnaw thar lei emaw hi i titi duhzawng ber a nih chuan, engnge i ngaihhlut ber ni ta ang le? I ngaihhlut ber apiang i chhuang ṭhin. 

Jeremia 9:23-24ah chuan Pathianin heti hian a sawi, "Mifingte chuan an finna an chapopui tur a ni lova, mi chakin an chakna an uanpui tur a ni hek lo, mi hausa pawhin an hausakna an chhuang tur a ni lo. Tupawhin chhuan tur a duh a nih chuan keimah min hriatna hi an chhuang tur a ni" tiin. 

Pathian hriat hi thil pawimawh ber chu a ni- chu chu nun awmzia chu a ni. Khawvel leh engkim chunga thuneitu Lalpa hian nangmah nena inzawmna neih a duh a. Amah i hnaih chuan muanna leh thlir dan thar a pe ang che. Chanchin lawmawm tak a ni! 

Ngaihtuah zui atan. 

Pathian hriat chian leh zual hi i nuna i dah pawimawh ber a nih theih nan engtin nge i ngaihhlut thilte i thlak danglam ang? 

I titi duhzawng aṭangin miten i tana pawimawh ni a an hriat eng nge ni ang le? 

I chapopui apiangte kha i tana pawimawh ber an ni a. Nitin i thusawiah te engtin nge Pathian nena in inlaichinna i chhuanzia i lantir ang? 

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...