Monday, August 8, 2022

I HUN ṬHA BER PATHIAN HNENAH PE RAWH

 Inlaichinna ṭha 

- Rick Warren

- August 8, 2022 



"Pathian nena inṭhian ṭhatna chu amah ṭihtute tan a ni a. A thutiamte chu an hnenah chauh a sawi ang." (Sam 25:14, TLB) 

Pathian nena inzawmna thûk tak neih i duh chuan ngawi renga awm i zir a ṭul ang. 

Pathian nena inṭhianna hi midangte nena inṭhianna ang tho- hun pek ngai a ni. He leia i ṭhiante tan hun i pe thei lo a nih chuan i ṭhiante an ni tak tak lo tihna a ni ang. I ṭhiante tan chuan hun i nei ṭhin. Pathian hi ṭhian ṭha bera i siam dawn chuan i hun hlu ber i pek a ngai ang. 

Bible chuan heti hian min hrilh, "Ngawi ula, Pathian ka ni tih hi hre rawh u" tiin (Sam 46:10) 

Pathian hrechiang leh zual tur chuan ngawi renga awm i zir a ṭul - chuvang chuan nitin amah nena fianrial hun i neih a ṭul tihna a ni. 

Sam 25:14-ah chuan heti hian kan hmu, "Pathian nena inṭhian ṭhatna chu amah ṭihtute tan a ni a. A thutiamte chu an hnenah chauh a sawi ang." 

Mi tam tak chuan Pathian an hre lo a. Pathian hmangaihna an la tem chhin hek lo. Engvangin thil a tih ṭhin an hre lo. Bible chuan Pathian nena inṭhianna chu amah ṭihtute tan a ni tih min hrilh - ṭawngkam danga kan sawi dawn chuan amah nena hun hmang ṭhinte a tihna a ni. 

Inṭhiannaah hun i pek ngai loh chuan chu inṭhianna chu eng ang inṭhianna nge a nih ang? Inṭhianna chuan inngaihsakna a mamawh tlat. Biak ina inkhawm chauh duh tawk mi i nih chuan Pathian hriatna thûk tak i nei ngai lovang. 

Pathian thu chhiarin heti hian i zawh ṭhin a ngai, "Lalpa, ka hnena sawi tur i nei em?" tiin. Ṭawngkam mawi leh nalh tak i hman kher a ngai lo. Thinlung takin be mai rawh. Tichuan a aw i ngaithla dawn nia. 

Bible chuan heti hian a sawi, "Tin, in tawngtaiin, mi vervekte angin in ti tur a ni lo . . .  Nang erawh chuan i ṭawngṭaiin, i pindan chhungrilah lut la, i kawng khar la, i Pa aruka awm hnenah chuan ṭawngṭai rawh; tichuan, i Pa aruka hmu tlṭhintu chuan a rul ang che." (Mat. 6:5-6) 

Vawiin hian ngawi rengin, Pathian lam thlir la, a khawngaihna chungchang a hrilh che chu ngaithla rawh. 

Ngaihtuah zui atan. 

Pathian hmaa ngawi renga i awmna daltu engnge? Chung daltu che chu engtin nge i tihbo theih ang? 

Engvangin nge Pathian nena hun hman dun aiin i ṭhiante nena inkawmho a awlsama a nawm zawk fo? Hetiang anga i awm hian engtin nge Pathian i hriat dan a dik tawh loh? 

A chang chuan mite hian Pathian nena fianrial hun hman hi an sawi harsa mah mah ṭhin. Ngawi reng a Pathian nena fianrial hun hmang thei turin eng nge i tih theih le?

*Lettu: Mapuia Fanai*

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...