Inlaichinna Ṭha
By Rick Warren
— August 5, 2022
"Mi tinin inngaitlawm takin, mahni aiin mi dang tha zawkah ruat theuh rawh se". [Philippi 2:3]
Chapona chuan inlaichinna a tichhe ṭhin. Hun hrang hrangah kawng hrang hrangin a inlar a, sawiselnaah, inernaah, luhlulnaah leh lemchang nunah te a inlar ṭhin.
Chapona ṭhat loh em emna chu mahni leh mahni inbumna a ni. Chapona i neih len viau chuan nangmah chuan i hmu mai thei lo ang a, midangten an hmu thei thung.
Thufingte 16:18 chuan hetiang hian a sawi, “Chapona chu boralna hmaah a kal a, rilru intivei chu tlukna hmaah,” tiin. Chu thu an sawifiahna ang deuh thu tawi chu dik ka ti viau bawk: “Chapona a awm phawt a, chhiatnain a zui – chapona a nasat poh leh tlakna a sang” tiin.
Chaponain inlaichinna a tihchhiat mek laiin inngaihtlawmna chu mite chalremtu a ni a, inlaichinna a siamṭha bawk. Philipi 2: 3 chuan hetiang hian chapona chu inngaihtlawmna hmanga do tur niin a sawi: Mi tinin inngaitlawm takin, mahni aiin mi dang tha zawkah ruat theuh rawh se." I Petera 3:8 chuan hetiang hian chiang lehzualin a sawi: “A tâwp berah chuan, in za-in rilru hmun khat awm u la, inlainat tawn u la, unau angin inhmangaih u la, khawngaih nei ula, thuhnuairawlhin awm rawh u,” tiin.
Engtin nge inngaihtlawmna nunah chuan i ṭhanlen ang? Isua Krista chu i ngaihtuahna, thinlung, rilru leh awm dan thununtirin bul ṭan ang che. Ephesi 4: 23-24 chuan hetiang hian min kawhhmuh bawk, “In rilru thlarauah chuan atharin lo awm u la. Mihring thar, thutak felna leh thianghlimnaa Pathian anga siam khan inthuam bawk u la.”
Inlaichinna chungchanga a hnukpui chu hetiang deuh hi a ni: Mi tupawh i chenpui tam viau chu anmahni chu i ang deuh ang ang. Mi phunchiar bula i tal tam chuan i phunchiar tial tial ang a. Mi hlim thei tak bula i awm chuan i lo hlim deuh deuh ang.
Mi thar, mi inngaitlawm nih ve i duh chuan Isua Krista bulah hun hmang tam rawh, a chhan chu ani chu a inngaitlawm tlat. A Thu chhiar leh a hnena ṭawngṭaiin amah nen inlaichinna ṭha zawk i siam thei ang a, amah i hre chiang deuh deuhin i lo ang deuh deuh ang, amah i hriat chian ang zel chuan amah chu i lo ang deuh deuh ang.
Philipi 2: 5-6 chuan hetiang hian a nemnghet ve bawk: “He rilru Krista pawha awm bawk kha,nangmahniah awm rawh se. A ni zawngin Pathian anga awm a, Pathian tluka awm chu thil thlakhlelh hleihtheihah a ruat lo a".
Isua chu mi inngaitlawm ber a ni. Van atangin leiah lo kalin mihringah a lo chang a, i tan a nung a, i tan a nun a hlan a, i tan thawhlehna a chang bawk. Amah nena hun in hman chuan a titlawm zel ang che. Chu inngaihtlawmna chuan inlaichinna tha zawk a neihtir ang che.
Ngaihtuah zui atan.
I hmelhriat zinga mi ingaitlawmte chuan eng ang mizia nge an neih theuh?
Mahni infak lova mite faktu nih chu eng nge a awmzia nia i hriat?
Isua i an theihna turin Pathian Thlarau chuan engtin nge pui che sela i duh le?
*Tlawmna nun nei tur leh Pathian ngaihdamna chang tur chuan i inpeih tawh em?*
Pathian thutiamah chuan Isua ringtute tan chuan thiam loh chantirna reng a awm lo. I sual lak aṭanga chhandam tur che chuan Isua a rawn tir a. Krawsa a thihna chuan I thil lo tihsual tawh zawng zawng man chu a tlak a. I sual vanga mahni leh mahni inhlanin ani chuan thiamchantirna a hmuhtir che, Isua chuan Pathian nena inlaichinna i neih theih dan kawng a kawhhmuh che a ni.
Chu chanchin ṭha chu chutah chuan a tawp mai lo. Pathian chuan Isua chu thihna aṭangin akai thova, sual leh thihna chunga thuneitu a nihzia a tarlang. Chu chuan vanramah chatuana a kianga i awm theih nan kawng a buatsaihsak che.
Inngaihtlawm tur leh Isua Krista kuta tlu lut tura i inpeih chuan he ṭawngṭaina mawlmang tak hmang hian ṭawngṭai ang che: “ _Lalpa duhtak, misual ka ni tih ka hria a, i ngaihdamna ka rawn dil a che. Isua Krista chu i Fapa a ni tih ka pawm a. Ka sualte avangin a thi a, nangmahin nunna nei turin i kaitho leh tih ka ring e. Ka chhandamtu atana pawmin ka Lal anga zui ka duh e, vawiin aṭang ngei hian. Ka nun hi hruai la, i duh zawng anga nung turin min pui rawh. Isua hmingin ka dil e. Amen_ .”
He ṭawngṭaina hi i hlan thei a nih chuan, he mailah hian Rick@PastorRick.com min lo bia ang che. Isua nena inzin kawng atana thuziak pawimawh tak tak lo thawn che ka duh a ni.
(Lettu: Peka)

No comments:
Post a Comment