- Inlaichinna tha
- By Rick Warren
- —August 4, 2022

- “Bumin awm suh u, Pathian chu hmuhsit zia a ni lo ve. Miin a theh apiang, chu mi vek chu a seng bawk dâwn si a. Mahni tisa lama thehtu chuan tisaa mi chhiatna a seng ang a; Thlarau lama thehtu erawh chuan Thlarauva mi chatuan nunna a seng dâwn si a.” [Galatians 6:7-8]
- Mahni hmasialna chuan inlaichinna a ei chhia. Innghirnghona, inhnialna, nupa ṭang ṭhenna leh indona hial chhan langsar ber a ni.
- Jakoba 4: 1 chuan hetiang hian a sawi bawk, “In zînga indona leh insualna te hi khawi aṭanga lo chhuak nge ni? Nawmchen in duhna, in thinlung chhûnga indona thlen ṭhîntu atangin a ni lovem ni?” tiin. Buaina tinrengte mai hi mahni indah pawimawhna aṭanga inṭan vek an ni.
- Mahni hmasialna hian mite nena kan inlaichinna hi a luh chhuah mai thei lawi a. Mite nena inlaichinna in neih chiah khan mahni hmasial lo turin i che nghal a ni. Hun a liam zel a, mahni hmasialna erawh a lo inzep ve thuai ṭhin. Mi tam berte hian mite nena inlaichinna bul ṭanna atan chuan tha leh zung an seng mai a, a chawm zuina leh a tihpuitlinna atan erawh an seng nep viau zel.
- Mahni hmasialnain inlaichinna a ei chhia a nih chuan mahni-hmasial-lohna chuan a chawm lian thung. Mahni hmasial lohna chu eng nge ni ta ang? A awmzia chu “kei kei kei” ti hmasa lovin “nangmah zawk le” tihna a ni. Mahni aia midangte ngaihtuah zawk tihna emaw, mahni mamawhna aia midangte mamawhna zawk dah pawimawh tihna a ni bawk ang. Ephesi 2: 4-in a sawi ang ngei khan, “Nimahsela, Pathian chuan khawngaihna a ngahin, a mi hmangaihna nasa tak avang khan” tiin.
- Mahni-hmasial-lohna chuan mite nuna a ṭha lai ber a tarchhuak ṭhin. Inlaichinnaah a tha ber a thur chhuak bawk a. Dik tak chuan mi tu emaw nena in inlaichinnaah mahni hmasial hauh lova i chet chuan i khawsakpui chu a insiam ṭha ve nghal ang; mahni hmasial hauh lova i khawsak chuan mi thar hlak i lo ni ta a, an kawm dan leh biak dan che chu an thlak a ngai ve ta hial a ni.
- Chu chu vawi duai lo ka lo hmu ve ta. Miin an kawm serh leh hmangaih harsa an tih ber berte pawh miten ṭha taka an dawr a, hmasial hauh lova an kawm chuan an insiamṭha tlat zel. Mi tu emaw chu a mamawh an pek chuan, a phu nia hriat ni kher lo chu, awmze neiin mawi takin an danglam ṭhin.
- Bible chuan Galatia 6: 7&8-ah chuan hetiang hian a sawi, Bumin awm suh u, Pathian chu hmuhsit zia a ni lo ve. Miin a theh apiang, chu mi vek chu a seng bawk dâwn si a. Mahni tisa lama thehtu chuan tisaa mi chhiatna a seng ang a; Thlarau lama thehtu erawh chuan Thlarauva mi chatuan nunna a seng dâwn si a.”
- Bible zirtirnaa miin a theh ngei chu a seng ṭhin tih nen thuhmun an ni. I theh chuan i la seng dawn a ni. Mahni hmasial hauh lova i theh chuan Pathian malsawmna i la dawng em em ang. Chutiang chuan leilung leh van thengrengte chu a buatsaih a: Mahni hmasialna i dah bo ang zelin Pathian malsawmna tam zawk i dawng ang. Amah ang turin a duh che a, ani chu mahni hma a sial ngai lo. I thil neih engkimte kha Pathian aṭanga I dawn a ni a, mahni-hmasialna nei miah lova a thil tih a ni. A vawr tawpah chuan Pathian chuan mahni hmasial lohna chu chatuan nunna pein a chawimawi.
- He khawvela i awm chhung hian midangte tana i luanchhuahna kha i lawmna a sang ber a ni fo ang. Isuan hetiang hian a sawi, “Tu pawh mahni nun humhim tum chuan an chân ang a, tu pawh keimah avâng leh Chanchin Ṭha avânga nun chân chuan an humhim ang.” [Marka 8: 35]
- Ngaihtuah zui atan.
- Midang tana thil pek chhuah harsa i tih ber chu eng nge? [I hun a ni mai thei a, i sum leh ngaihtuahnate pawh a ni thei bawk]
- Chu tak chu tun karah hian engtin nge pek chhuah i zir ang?
- Mahni hmasialna i kalsan khan engtin nge Pathian malsawmna chuan a zui ṭhin che?
- I nun khan Isua a lo ring ve tawh em?
- Bible chuan Isua Pathian Fapa kaltlang chauhin vanram i kai thei dawn a ni tih a sawi a. I vanram kalkawng chu i thawk chhuak thei lo: “Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni. Thil ṭha tih avângin a ni lo, chuti ni se miin an chhuang dah ang e” tiin a sawi. [Ephesi 2: 8-9]
- I sualte thupha chawi tur leh i nuna Isua ring tura i inpeih tawh chuan he ṭawngṭaina thu hman hian ṭawngṭai ang che: “Lalpa duhtak, i thutiama ka hmuh dan chuan Isua ka rin phawt chuan ka thilsual tih zawng zawngte ngaihdam a ni ang, ka damchhan ka zir tawh ang a, i chatuan inah chuan engtik niah emaw chuan min lo la lawm ang.
- “Ka sualte avangin thupha ka chawi a, Isua hnenah amah chu ka Chhandamtu leh Lal atan ka intulut e. Isu, zui che ka duh a, i rawngbawl turin ka inpe e. Tlawm takin ka nunna hi i kutah ka hlan a, i chhungte zinga min lo lawm turin ka ngen a che. I hming ka dil e. Amen.”
- He ṭawngṭaina hi i hlan thei a nih chuan, he mailah hian Rick@PastorRick.com min lo bia ang che. Isua nena inzin kawng atana thuziak pawimawh tak tak lo thawn che ka duh a ni.
- [Lettu: Peka]
Welcome to VL THANSANGA blogspot. He blog hi Pathian Thu ziak dahna tura ruahman a ni a. Pathian Thu hrilhfiahna leh chhuizauna lam pawh la dah zel tura ruahman a ni. This blog is made for both ministry and academic purpose. Sermons, articles, academic papers and other materials will be uploaded.
Thursday, August 4, 2022
INLAICHINNA HRISEL CHU MAHNI-HMASIAL-LOHNA HRIN A NI
Subscribe to:
Post Comments (Atom)
INREM LOH LAIA ZAHNA HLAWH DAN
_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...
-
_Chatuan Nihna Laimu_ — Rick Warren — June 1, 2026 “Tupawh ka thu hriaa mi tirtu ring chuan, chatuana nunna a nei tawh, thiam l...
-
_Koh I Nihna Nunpui Rawh_ By Rick Warren — January 19, 2026 “Hmangaihnaah chuan hlauhna reng a awm lo: hmangaihna famkimin hlau...
-
_Khawngaihna Chungchanga Thu Lawmawm_ By Rick Warren March 27, 2026 “Nimahsela, ka tlânsiakna kawng ka hmabak hlen tûr leh, Path...
No comments:
Post a Comment